Study
- Anukramaṇī
- Source
9 kusīdī kāṇva:| indra: | gāyatrī |
ā pra dra̍va parā̱vato̍'rvā̱vata̍śca vṛtrahan | madhva̱: prati̱ prabha̍rmaṇi
||1||आ प्र द्र॑व परा॒वतो॑ऽर्वा॒वत॑श्च वृत्रहन् । मध्व॒: प्रति॒ प्रभ॑र्मणि
tī̱vrāḥ somā̍sa̱ ā ga̍hi su̱tāso̍ mādayi̱ṣṇava̍: | pibā̍ da̱dhṛgyatho̍ci̱ṣe
||2||ती॒व्राः सोमा॑स॒ आ ग॑हि सु॒तासो॑ मादयि॒ष्णव॑: । पिबा॑ द॒धृग्यथो॑चि॒षे
i̱ṣā ma̍nda̱svādu̱ te'ra̱ṃ varā̍ya ma̱nyave̍ | bhuva̍tta indra̱ śaṃ hṛ̱de
||3||इ॒षा म॑न्द॒स्वादु॒ तेऽरं॒ वरा॑य म॒न्यवे॑ । भुव॑त्त इन्द्र॒ शं हृ॒दे
ā tva̍śatra̱vā ga̍hi̱ nyu1kthāni̍ ca hūyase | u̱pa̱me ro̍ca̱ne di̱vaḥ
||4||आ त्व॑शत्र॒वा ग॑हि॒ न्यु१क्थानि॑ च हूयसे । उ॒प॒मे रो॑च॒ने दि॒वः
tubhyā̱yamadri̍bhiḥ su̱to gobhi̍: śrī̱to madā̍ya̱ kam | pra soma̍ indra hūyate
||5||तुभ्या॒यमद्रि॑भिः सु॒तो गोभि॑: श्री॒तो मदा॑य॒ कम् । प्र सोम॑ इन्द्र हूयते
indra̍ śru̱dhi su me̱ hava̍ma̱sme su̱tasya̱ goma̍taḥ | vi pī̱tiṃ tṛ̱ptima̍śnuhi
||6||इन्द्र॑ श्रु॒धि सु मे॒ हव॑म॒स्मे सु॒तस्य॒ गोम॑तः । वि पी॒तिं तृ॒प्तिम॑श्नुहि
ya i̍ndra cama̱seṣvā soma̍śca̱mūṣu̍ te su̱taḥ | pibeda̍sya̱ tvamī̍śiṣe
||7||य इ॑न्द्र चम॒सेष्वा सोम॑श्च॒मूषु॑ ते सु॒तः । पिबेद॑स्य॒ त्वमी॑शिषे
yo a̱psu ca̱ndramā̍ iva̱ soma̍śca̱mūṣu̱ dadṛ̍śe | pibeda̍sya̱ tvamī̍śiṣe
||8||यो अ॒प्सु च॒न्द्रमा॑ इव॒ सोम॑श्च॒मूषु॒ ददृ॑शे । पिबेद॑स्य॒ त्वमी॑शिषे
yaṃ te̍ śye̱naḥ pa̱dābha̍ratti̱ro rajā̱ṃsyaspṛ̍tam | pibeda̍sya̱ tvamī̍śiṣe
||9||यं ते॑ श्ये॒नः प॒दाभ॑रत्ति॒रो रजां॒स्यस्पृ॑तम् । पिबेद॑स्य॒ त्वमी॑शिषे