Study
- Anukramaṇī
- Source
7 suparṇa: kāṇva:| indrāvaruṇau |jagatī |
i̱māni̍ vāṃ bhāga̱dheyā̍ni sisrata̱ indrā̍varuṇā̱ pra ma̱he su̱teṣu̍ vām |
ya̱jñeya̍jñe ha̱ sava̍nā bhura̱ṇyatho̱ yatsu̍nva̱te yaja̍mānāya̱ śikṣa̍thaḥ
||1||इ॒मानि॑ वां भाग॒धेया॑नि सिस्रत॒ इन्द्रा॑वरुणा॒ प्र म॒हे सु॒तेषु॑ वाम् ।
य॒ज्ञेय॑ज्ञे ह॒ सव॑ना भुर॒ण्यथो॒ यत्सु॑न्व॒ते यज॑मानाय॒ शिक्ष॑थः
ni̱ṣṣidhva̍rī̱roṣa̍dhī̱rāpa̍ āstā̱mindrā̍varuṇā mahi̱māna̱māśa̍ta |
yā sisra̍tū̱ raja̍saḥ pā̱re adhva̍no̱ yayo̱: śatru̱rnaki̱rāde̍va̱ oha̍te
||2||नि॒ष्षिध्व॑री॒रोष॑धी॒राप॑ आस्ता॒मिन्द्रा॑वरुणा महि॒मान॒माश॑त ।
या सिस्र॑तू॒ रज॑सः पा॒रे अध्व॑नो॒ ययो॒: शत्रु॒र्नकि॒रादे॑व॒ ओह॑ते
sa̱tyaṃ tadi̍ndrāvaruṇā kṛ̱śasya̍ vā̱ṃ madhva̍ ū̱rmiṃ du̍hate sa̱pta vāṇī̍: |
tābhi̍rdā̱śvāṃsa̍mavataṃ śubhaspatī̱ yo vā̱mada̍bdho a̱bhi pāti̱ citti̍bhiḥ
||3||स॒त्यं तदि॑न्द्रावरुणा कृ॒शस्य॑ वां॒ मध्व॑ ऊ॒र्मिं दु॑हते स॒प्त वाणी॑: ।
ताभि॑र्दा॒श्वांस॑मवतं शुभस्पती॒ यो वा॒मद॑ब्धो अ॒भि पाति॒ चित्ति॑भिः
ghṛ̱ta̱pruṣa̱: saumyā̍ jī̱radā̍navaḥ sa̱pta svasā̍ra̱: sada̍na ṛ̱tasya̍ |
yā ha̍ vāmindrāvaruṇā ghṛta̱ścuta̱stābhi̍rdhatta̱ṃ yaja̍mānāya śikṣatam
||4||घृ॒त॒प्रुष॒: सौम्या॑ जी॒रदा॑नवः स॒प्त स्वसा॑र॒: सद॑न ऋ॒तस्य॑ ।
या ह॑ वामिन्द्रावरुणा घृत॒श्चुत॒स्ताभि॑र्धत्तं॒ यज॑मानाय शिक्षतम्
avo̍cāma maha̱te saubha̍gāya sa̱tyaṃ tve̱ṣābhyā̍ṃ mahi̱māna̍mindri̱yam |
a̱smāntsvi̍ndrāvaruṇā ghṛta̱ścuta̱stribhi̍: sā̱ptebhi̍ravataṃ śubhaspatī
||5||अवो॑चाम मह॒ते सौभ॑गाय स॒त्यं त्वे॒षाभ्यां॑ महि॒मान॑मिन्द्रि॒यम् ।
अ॒स्मान्त्स्वि॑न्द्रावरुणा घृत॒श्चुत॒स्त्रिभि॑: सा॒प्तेभि॑रवतं शुभस्पती
indrā̍varuṇā̱ yadṛ̱ṣibhyo̍ manī̱ṣāṃ vā̱co ma̱tiṃ śru̱tama̍datta̱magre̍ |
yāni̱ sthānā̍nyasṛjanta̱ dhīrā̍ ya̱jñaṃ ta̍nvā̱nāstapa̍sā̱bhya̍paśyam
||6||इन्द्रा॑वरुणा॒ यदृ॒षिभ्यो॑ मनी॒षां वा॒चो म॒तिं श्रु॒तम॑दत्त॒मग्रे॑ ।
यानि॒ स्थाना॑न्यसृजन्त॒ धीरा॑ य॒ज्ञं त॑न्वा॒नास्तप॑सा॒भ्य॑पश्यम्
indrā̍varuṇā saumana̱samadṛ̍ptaṃ rā̱yaspoṣa̱ṃ yaja̍māneṣu dhattam |
pra̱jāṃ pu̱ṣṭiṃ bhū̍tima̱smāsu̍ dhattaṃ dīrghāyu̱tvāya̱ pra ti̍rataṃ na̱ āyu̍:
||7||इन्द्रा॑वरुणा सौमन॒समदृ॑प्तं रा॒यस्पोषं॒ यज॑मानेषु धत्तम् ।
प्र॒जां पु॒ष्टिं भू॑तिम॒स्मासु॑ धत्तं दीर्घायु॒त्वाय॒ प्र ति॑रतं न॒ आयु॑: