Study
- Anukramaṇī
- Source
10 śyāvāśva ātreya: | indrāgnī | gāyatrī |
ya̱jñasya̱ hi stha ṛ̱tvijā̱ sasnī̱ vāje̍ṣu̱ karma̍su | indrā̍gnī̱ tasya̍ bodhatam
||1||य॒ज्ञस्य॒ हि स्थ ऋ॒त्विजा॒ सस्नी॒ वाजे॑षु॒ कर्म॑सु । इन्द्रा॑ग्नी॒ तस्य॑ बोधतम्
to̱śāsā̍ ratha̱yāvā̍nā vṛtra̱haṇāpa̍rājitā | indrā̍gnī̱ tasya̍ bodhatam
||2||तो॒शासा॑ रथ॒यावा॑ना वृत्र॒हणाप॑राजिता । इन्द्रा॑ग्नी॒ तस्य॑ बोधतम्
i̱daṃ vā̍ṃ madi̱raṃ madhvadhu̍kṣa̱nnadri̍bhi̱rnara̍: | indrā̍gnī̱ tasya̍ bodhatam
||3||इ॒दं वां॑ मदि॒रं मध्वधु॑क्ष॒न्नद्रि॑भि॒र्नर॑: । इन्द्रा॑ग्नी॒ तस्य॑ बोधतम्
ju̱ṣethā̍ṃ ya̱jñami̱ṣṭaye̍ su̱taṃ soma̍ṃ sadhastutī | indrā̍gnī̱ ā ga̍taṃ narā
||4||जु॒षेथां॑ य॒ज्ञमि॒ष्टये॑ सु॒तं सोमं॑ सधस्तुती । इन्द्रा॑ग्नी॒ आ ग॑तं नरा
i̱mā ju̍ṣethā̱ṃ sava̍nā̱ yebhi̍rha̱vyānyū̱hathu̍: | indrā̍gnī̱ ā ga̍taṃ narā
||5||इ॒मा जु॑षेथां॒ सव॑ना॒ येभि॑र्ह॒व्यान्यू॒हथु॑: । इन्द्रा॑ग्नी॒ आ ग॑तं नरा
i̱māṃ gā̍ya̱trava̍rtaniṃ ju̱ṣethā̍ṃ suṣṭu̱tiṃ mama̍ | indrā̍gnī̱ ā ga̍taṃ narā
||6||इ॒मां गा॑य॒त्रव॑र्तनिं जु॒षेथां॑ सुष्टु॒तिं मम॑ । इन्द्रा॑ग्नी॒ आ ग॑तं नरा
prā̱ta̱ryāva̍bhi̱rā ga̍taṃ de̱vebhi̍rjenyāvasū | indrā̍gnī̱ soma̍pītaye
||7||प्रा॒त॒र्याव॑भि॒रा ग॑तं दे॒वेभि॑र्जेन्यावसू । इन्द्रा॑ग्नी॒ सोम॑पीतये
śyā̱vāśva̍sya sunva̱to'trī̍ṇāṃ śṛṇuta̱ṃ hava̍m | indrā̍gnī̱ soma̍pītaye
||8||श्या॒वाश्व॑स्य सुन्व॒तोऽत्री॑णां शृणुतं॒ हव॑म् । इन्द्रा॑ग्नी॒ सोम॑पीतये
e̱vā vā̍mahva ū̱taye̱ yathāhu̍vanta̱ medhi̍rāḥ | indrā̍gnī̱ soma̍pītaye
||9||ए॒वा वा॑मह्व ऊ॒तये॒ यथाहु॑वन्त॒ मेधि॑राः । इन्द्रा॑ग्नी॒ सोम॑पीतये
āhaṃ sara̍svatīvatorindrā̱gnyoravo̍ vṛṇe | yābhyā̍ṃ gāya̱tramṛ̱cyate̍
||10||आहं सर॑स्वतीवतोरिन्द्रा॒ग्न्योरवो॑ वृणे । याभ्यां॑ गाय॒त्रमृ॒च्यते॑