Study
- Anukramaṇī
- Source
6 kṛṣṇa āṅgiraso, vāsiṣṭho vā dyumnīka:, priyamedha āṅgiraso vā|aśvinau | pragātha: = ( viṣamā bṛhatī, samā satobṛhatī ) |
dyu̱mnī vā̱ṃ stomo̍ aśvinā̱ krivi̱rna seka̱ ā ga̍tam | madhva̍: su̱tasya̱ sa di̱vi pri̱yo na̍rā pā̱taṃ gau̱rāvi̱veri̍ṇe
||1||द्यु॒म्नी वां॒ स्तोमो॑ अश्विना॒ क्रिवि॒र्न सेक॒ आ ग॑तम् । मध्व॑: सु॒तस्य॒ स दि॒वि प्रि॒यो न॑रा पा॒तं गौ॒रावि॒वेरि॑णे
piba̍taṃ gha̱rmaṃ madhu̍mantamaśvi̱nā ''ba̱rhiḥ sī̍dataṃ narā | tā ma̍ndasā̱nā manu̍ṣo duro̱ṇa ā ni pā̍ta̱ṃ veda̍sā̱ vaya̍:
||2||पिब॑तं घ॒र्मं मधु॑मन्तमश्वि॒ना ऽऽब॒र्हिः सी॑दतं नरा । ता म॑न्दसा॒ना मनु॑षो दुरो॒ण आ नि पा॑तं॒ वेद॑सा॒ वय॑:
ā vā̱ṃ viśvā̍bhirū̱tibhi̍: pri̱yame̍dhā ahūṣata | tā va̱rtiryā̍ta̱mupa̍ vṛ̱ktaba̍rhiṣo̱ juṣṭa̍ṃ ya̱jñaṃ divi̍ṣṭiṣu
||3||आ वां॒ विश्वा॑भिरू॒तिभि॑: प्रि॒यमे॑धा अहूषत । ता व॒र्तिर्या॑त॒मुप॑ वृ॒क्तब॑र्हिषो॒ जुष्टं॑ य॒ज्ञं दिवि॑ष्टिषु
piba̍ta̱ṃ soma̱ṃ madhu̍mantamaśvi̱nā ''ba̱rhiḥ sī̍dataṃ su̱mat |
tā vā̍vṛdhā̱nā upa̍ suṣṭu̱tiṃ di̱vo ga̱ntaṃ gau̱rāvi̱veri̍ṇam
||4||पिब॑तं॒ सोमं॒ मधु॑मन्तमश्वि॒ना ऽऽब॒र्हिः सी॑दतं सु॒मत् ।
ता वा॑वृधा॒ना उप॑ सुष्टु॒तिं दि॒वो ग॒न्तं गौ॒रावि॒वेरि॑णम्
ā nū̱naṃ yā̍tamaśvi̱nā'śve̍bhiḥ pruṣi̱tapsu̍bhiḥ | dasrā̱ hira̍ṇyavartanī śubhaspatī pā̱taṃ soma̍mṛtāvṛdhā
||5||आ नू॒नं या॑तमश्वि॒नाऽश्वे॑भिः प्रुषि॒तप्सु॑भिः । दस्रा॒ हिर॑ण्यवर्तनी शुभस्पती पा॒तं सोम॑मृतावृधा
va̱yaṃ hi vā̱ṃ havā̍mahe vipa̱nyavo̱ viprā̍so̱ vāja̍sātaye | tā va̱lgū da̱srā pu̍ru̱daṃsa̍sā dhi̱yā'śvi̍nā śru̱ṣṭyā ga̍tam
||6||व॒यं हि वां॒ हवा॑महे विप॒न्यवो॒ विप्रा॑सो॒ वाज॑सातये । ता व॒ल्गू द॒स्रा पु॑रु॒दंस॑सा धि॒याऽश्वि॑ना श्रु॒ष्ट्या ग॑तम्