Study
- Anukramaṇī
- Source
9 uśanā kāvya: | agni: |gāyatrī |
preṣṭha̍ṃ vo̱ ati̍thiṃ stu̱ṣe mi̱trami̍va pri̱yam | a̱gniṃ ratha̱ṃ na vedya̍m
||1||प्रेष्ठं॑ वो॒ अति॑थिं स्तु॒षे मि॒त्रमि॑व प्रि॒यम् । अ॒ग्निं रथं॒ न वेद्य॑म्
ka̱vimi̍va̱ prace̍tasa̱ṃ yaṃ de̱vāso̱ adha̍ dvi̱tā | ni martye̍ṣvāda̱dhuḥ
||2||क॒विमि॑व॒ प्रचे॑तसं॒ यं दे॒वासो॒ अध॑ द्वि॒ता । नि मर्त्ये॑ष्वाद॒धुः
tvaṃ ya̍viṣṭha dā̱śuṣo̱ nṝm̐: pā̍hi śṛṇu̱dhī gira̍: | rakṣā̍ to̱kamu̱ta tmanā̍
||3||त्वं य॑विष्ठ दा॒शुषो॒ नॄँ: पा॑हि शृणु॒धी गिर॑: । रक्षा॑ तो॒कमु॒त त्मना॑
kayā̍ te agne aṅgira̱ ūrjo̍ napā̱dupa̍stutim | varā̍ya deva ma̱nyave̍
||4||कया॑ ते अग्ने अङ्गिर॒ ऊर्जो॑ नपा॒दुप॑स्तुतिम् । वरा॑य देव म॒न्यवे॑
dāśe̍ma̱ kasya̱ mana̍sā ya̱jñasya̍ sahaso yaho | kadu̍ voca i̱daṃ nama̍:
||5||दाशे॑म॒ कस्य॒ मन॑सा य॒ज्ञस्य॑ सहसो यहो । कदु॑ वोच इ॒दं नम॑:
adhā̱ tvaṃ hi na̱skaro̱ viśvā̍ a̱smabhya̍ṃ sukṣi̱tīḥ | vāja̍draviṇaso̱ gira̍:
||6||अधा॒ त्वं हि न॒स्करो॒ विश्वा॑ अ॒स्मभ्यं॑ सुक्षि॒तीः । वाज॑द्रविणसो॒ गिर॑:
kasya̍ nū̱naṃ parī̍ṇaso̱ dhiyo̍ jinvasi dampate | goṣā̍tā̱ yasya̍ te̱ gira̍:
||7||कस्य॑ नू॒नं परी॑णसो॒ धियो॑ जिन्वसि दम्पते । गोषा॑ता॒ यस्य॑ ते॒ गिर॑:
taṃ ma̍rjayanta su̱kratu̍ṃ puro̱yāvā̍namā̱jiṣu̍ | sveṣu̱ kṣaye̍ṣu vā̱jina̍m
||8||तं म॑र्जयन्त सु॒क्रतुं॑ पुरो॒यावा॑नमा॒जिषु॑ । स्वेषु॒ क्षये॑षु वा॒जिन॑म्
kṣeti̱ kṣeme̍bhiḥ sā̱dhubhi̱rnaki̱ryaṃ ghnanti̱ hanti̱ yaḥ | agne̍ su̱vīra̍ edhate
||9||क्षेति॒ क्षेमे॑भिः सा॒धुभि॒र्नकि॒र्यं घ्नन्ति॒ हन्ति॒ यः । अग्ने॑ सु॒वीर॑ एधते