Study
- Anukramaṇī
- Source
9 kusīdī kāṇva:| viśve devā: | gāyatrī |
de̱vānā̱midavo̍ ma̱hattadā vṛ̍ṇīmahe va̱yam | vṛṣṇā̍ma̱smabhya̍mū̱taye̍
||1||दे॒वाना॒मिदवो॑ म॒हत्तदा वृ॑णीमहे व॒यम् । वृष्णा॑म॒स्मभ्य॑मू॒तये॑
te na̍: santu̱ yuja̱: sadā̱ varu̍ṇo mi̱tro a̍rya̱mā | vṛ̱dhāsa̍śca̱ prace̍tasaḥ
||2||ते न॑: सन्तु॒ युज॒: सदा॒ वरु॑णो मि॒त्रो अ॑र्य॒मा । वृ॒धास॑श्च॒ प्रचे॑तसः
ati̍ no viṣpi̱tā pu̱ru nau̱bhira̱po na pa̍rṣatha | yū̱yamṛ̱tasya̍ rathyaḥ
||3||अति॑ नो विष्पि॒ता पु॒रु नौ॒भिर॒पो न प॑र्षथ । यू॒यमृ॒तस्य॑ रथ्यः
vā̱maṃ no̍ astvaryamanvā̱maṃ va̍ruṇa̱ śaṃsya̍m | vā̱maṃ hyā̍vṛṇī̱mahe̍
||4||वा॒मं नो॑ अस्त्वर्यमन्वा॒मं व॑रुण॒ शंस्य॑म् । वा॒मं ह्या॑वृणी॒महे॑
vā̱masya̱ hi pra̍cetasa̱ īśā̍nāśo riśādasaḥ | nemā̍dityā a̱ghasya̱ yat
||5||वा॒मस्य॒ हि प्र॑चेतस॒ ईशा॑नाशो रिशादसः । नेमा॑दित्या अ॒घस्य॒ यत्
va̱yamidva̍: sudānavaḥ kṣi̱yanto̱ yānto̱ adhva̱nnā | devā̍ vṛ̱dhāya̍ hūmahe
||6||व॒यमिद्व॑: सुदानवः क्षि॒यन्तो॒ यान्तो॒ अध्व॒न्ना । देवा॑ वृ॒धाय॑ हूमहे
adhi̍ na indraiṣā̱ṃ viṣṇo̍ sajā̱tyā̍nām | i̱tā maru̍to̱ aśvi̍nā
||7||अधि॑ न इन्द्रैषां॒ विष्णो॑ सजा॒त्या॑नाम् । इ॒ता मरु॑तो॒ अश्वि॑ना
pra bhrā̍tṛ̱tvaṃ su̍dāna̱vo'dha̍ dvi̱tā sa̍mā̱nyā | mā̱turgarbhe̍ bharāmahe
||8||प्र भ्रा॑तृ॒त्वं सु॑दान॒वोऽध॑ द्वि॒ता स॑मा॒न्या । मा॒तुर्गर्भे॑ भरामहे
yū̱yaṃ hi ṣṭhā su̍dānava̱ indra̍jyeṣṭhā a̱bhidya̍vaḥ | adhā̍ cidva u̱ta bru̍ve
||9||यू॒यं हि ष्ठा सु॑दानव॒ इन्द्र॑ज्येष्ठा अ॒भिद्य॑वः । अधा॑ चिद्व उ॒त ब्रु॑वे