Study
- Anukramaṇī
- Source
26 sobhari: kāṇva:| maruta: | pragātha:= ( viṣamā kakup , samā satobṛhatī ), 14 sato virāṭ |
ā ga̍ntā̱ mā ri̍ṣaṇyata̱ prasthā̍vāno̱ māpa̍ sthātā samanyavaḥ | sthi̱rā ci̍nnamayiṣṇavaḥ
||1||आ ग॑न्ता॒ मा रि॑षण्यत॒ प्रस्था॑वानो॒ माप॑ स्थाता समन्यवः । स्थि॒रा चि॑न्नमयिष्णवः
vī̱l̤u̱pa̱vibhi̍rmaruta ṛbhukṣaṇa̱ ā ru̍drāsaḥ sudī̱tibhi̍: | i̱ṣā no̍ a̱dyā ga̍tā puruspṛho ya̱jñamā so̍bharī̱yava̍:
||2||वी॒ळु॒प॒विभि॑र्मरुत ऋभुक्षण॒ आ रु॑द्रासः सुदी॒तिभि॑: । इ॒षा नो॑ अ॒द्या ग॑ता पुरुस्पृहो य॒ज्ञमा सो॑भरी॒यव॑:
vi̱dmā hi ru̱driyā̍ṇā̱ṃ śuṣma̍mu̱graṃ ma̱rutā̱ṃ śimī̍vatām | viṣṇo̍re̱ṣasya̍ mī̱l̤huṣā̍m
||3||वि॒द्मा हि रु॒द्रिया॑णां॒ शुष्म॑मु॒ग्रं म॒रुतां॒ शिमी॑वताम् । विष्णो॑रे॒षस्य॑ मी॒ळ्हुषा॑म्
vi dvī̱pāni̱ pāpa̍ta̱ntiṣṭha̍ddu̱cchuno̱bhe yu̍janta̱ roda̍sī | pra dhanvā̍nyairata śubhrakhādayo̱ yadeja̍tha svabhānavaḥ
||4||वि द्वी॒पानि॒ पाप॑त॒न्तिष्ठ॑द्दु॒च्छुनो॒भे यु॑जन्त॒ रोद॑सी । प्र धन्वा॑न्यैरत शुभ्रखादयो॒ यदेज॑थ स्वभानवः
acyu̍tā cidvo̱ ajma̱nnā nāna̍dati̱ parva̍tāso̱ vana̱spati̍: | bhūmi̱ryāme̍ṣu rejate
||5||अच्यु॑ता चिद्वो॒ अज्म॒न्ना नान॑दति॒ पर्व॑तासो॒ वन॒स्पति॑: । भूमि॒र्यामे॑षु रेजते
amā̍ya vo maruto̱ yāta̍ve̱ dyaurjihī̍ta̱ utta̍rā bṛ̱hat | yatrā̱ naro̱ dedi̍śate ta̱nūṣvā tvakṣā̍ṃsi bā̱hvo̍jasaḥ
||6||अमा॑य वो मरुतो॒ यात॑वे॒ द्यौर्जिही॑त॒ उत्त॑रा बृ॒हत् । यत्रा॒ नरो॒ देदि॑शते त॒नूष्वा त्वक्षां॑सि बा॒ह्वो॑जसः
sva̱dhāmanu̱ śriya̱ṃ naro̱ mahi̍ tve̱ṣā ama̍vanto̱ vṛṣa̍psavaḥ | vaha̍nte̱ ahru̍tapsavaḥ
||7||स्व॒धामनु॒ श्रियं॒ नरो॒ महि॑ त्वे॒षा अम॑वन्तो॒ वृष॑प्सवः । वह॑न्ते॒ अह्रु॑तप्सवः
gobhi̍rvā̱ṇo a̍jyate̱ sobha̍rīṇā̱ṃ rathe̱ kośe̍ hira̱ṇyaye̍ | goba̍ndhavaḥ sujā̱tāsa̍ i̱ṣe bhu̱je ma̱hānto̍ na̱: spara̍se̱ nu
||8||गोभि॑र्वा॒णो अ॑ज्यते॒ सोभ॑रीणां॒ रथे॒ कोशे॑ हिर॒ण्यये॑ । गोब॑न्धवः सुजा॒तास॑ इ॒षे भु॒जे म॒हान्तो॑ न॒: स्पर॑से॒ नु
prati̍ vo vṛṣadañjayo̱ vṛṣṇe̱ śardhā̍ya̱ māru̍tāya bharadhvam | ha̱vyā vṛṣa̍prayāvṇe
||9||प्रति॑ वो वृषदञ्जयो॒ वृष्णे॒ शर्धा॑य॒ मारु॑ताय भरध्वम् । ह॒व्या वृष॑प्रयाव्णे
vṛ̱ṣa̱ṇa̱śvena̍ maruto̱ vṛṣa̍psunā̱ rathe̍na̱ vṛṣa̍nābhinā | ā śye̱nāso̱ na pa̱kṣiṇo̱ vṛthā̍ naro ha̱vyā no̍ vī̱taye̍ gata
||10||वृ॒ष॒ण॒श्वेन॑ मरुतो॒ वृष॑प्सुना॒ रथे॑न॒ वृष॑नाभिना । आ श्ये॒नासो॒ न प॒क्षिणो॒ वृथा॑ नरो ह॒व्या नो॑ वी॒तये॑ गत
sa̱mā̱nama̱ñjye̍ṣā̱ṃ vi bhrā̍jante ru̱kmāso̱ adhi̍ bā̱huṣu̍ | davi̍dyutatyṛ̱ṣṭaya̍:
||11||स॒मा॒नम॒ञ्ज्ये॑षां॒ वि भ्रा॑जन्ते रु॒क्मासो॒ अधि॑ बा॒हुषु॑ । दवि॑द्युतत्यृ॒ष्टय॑:
ta u̱grāso̱ vṛṣa̍ṇa u̱grabā̍havo̱ naki̍ṣṭa̱nūṣu̍ yetire | sthi̱rā dhanvā̱nyāyu̍dhā̱ rathe̍ṣu̱ vo'nī̍ke̱ṣvadhi̱ śriya̍:
||12||त उ॒ग्रासो॒ वृष॑ण उ॒ग्रबा॑हवो॒ नकि॑ष्ट॒नूषु॑ येतिरे । स्थि॒रा धन्वा॒न्यायु॑धा॒ रथे॑षु॒ वोऽनी॑के॒ष्वधि॒ श्रिय॑:
yeṣā̱marṇo̱ na sa̱pratho̱ nāma̍ tve̱ṣaṃ śaśva̍tā̱meka̱midbhu̱je | vayo̱ na pitrya̱ṃ saha̍:
||13||येषा॒मर्णो॒ न स॒प्रथो॒ नाम॑ त्वे॒षं शश्व॑ता॒मेक॒मिद्भु॒जे । वयो॒ न पित्र्यं॒ सह॑:
tānva̍ndasva ma̱ruta̱stām̐ upa̍ stuhi̱ teṣā̱ṃ hi dhunī̍nām | a̱rāṇā̱ṃ na ca̍ra̱mastade̍ṣāṃ dā̱nā ma̱hnā tade̍ṣām
||14||तान्व॑न्दस्व म॒रुत॒स्ताँ उप॑ स्तुहि॒ तेषां॒ हि धुनी॑नाम् । अ॒राणां॒ न च॑र॒मस्तदे॑षां दा॒ना म॒ह्ना तदे॑षाम्
su̱bhaga̱: sa va̍ ū̱tiṣvāsa̱ pūrvā̍su maruto̱ vyu̍ṣṭiṣu | yo vā̍ nū̱namu̱tāsa̍ti
||15||सु॒भग॒: स व॑ ऊ॒तिष्वास॒ पूर्वा॑सु मरुतो॒ व्यु॑ष्टिषु । यो वा॑ नू॒नमु॒तास॑ति
yasya̍ vā yū̱yaṃ prati̍ vā̱jino̍ nara̱ ā ha̱vyā vī̱taye̍ ga̱tha |
a̱bhi ṣa dyu̱mnairu̱ta vāja̍sātibhiḥ su̱mnā vo̍ dhūtayo naśat
||16||यस्य॑ वा यू॒यं प्रति॑ वा॒जिनो॑ नर॒ आ ह॒व्या वी॒तये॑ ग॒थ ।
अ॒भि ष द्यु॒म्नैरु॒त वाज॑सातिभिः सु॒म्ना वो॑ धूतयो नशत्
yathā̍ ru̱drasya̍ sū̱navo̍ di̱vo vaśa̱ntyasu̍rasya ve̱dhasa̍: | yuvā̍na̱statheda̍sat
||17||यथा॑ रु॒द्रस्य॑ सू॒नवो॑ दि॒वो वश॒न्त्यसु॑रस्य वे॒धस॑: । युवा॑न॒स्तथेद॑सत्
ye cārha̍nti ma̱ruta̍: su̱dāna̍va̱: smanmī̱l̤huṣa̱ścara̍nti̱ ye | ata̍ści̱dā na̱ upa̱ vasya̍sā hṛ̱dā yuvā̍na̱ ā va̍vṛdhvam
||18||ये चार्ह॑न्ति म॒रुत॑: सु॒दान॑व॒: स्मन्मी॒ळ्हुष॒श्चर॑न्ति॒ ये । अत॑श्चि॒दा न॒ उप॒ वस्य॑सा हृ॒दा युवा॑न॒ आ व॑वृध्वम्
yūna̍ ū̱ ṣu navi̍ṣṭhayā̱ vṛṣṇa̍: pāva̱kām̐ a̱bhi so̍bhare gi̱rā | gāya̱ gā i̍va̱ carkṛ̍ṣat
||19||यून॑ ऊ॒ षु नवि॑ष्ठया॒ वृष्ण॑: पाव॒काँ अ॒भि सो॑भरे गि॒रा । गाय॒ गा इ॑व॒ चर्कृ॑षत्
sā̱hā ye santi̍ muṣṭi̱heva̱ havyo̱ viśvā̍su pṛ̱tsu hotṛ̍ṣu |
vṛṣṇa̍śca̱ndrānna su̱śrava̍stamāngi̱rā vanda̍sva ma̱ruto̱ aha̍
||20||सा॒हा ये सन्ति॑ मुष्टि॒हेव॒ हव्यो॒ विश्वा॑सु पृ॒त्सु होतृ॑षु ।
वृष्ण॑श्च॒न्द्रान्न सु॒श्रव॑स्तमान्गि॒रा वन्द॑स्व म॒रुतो॒ अह॑
gāva̍ścidghā samanyavaḥ sajā̱tye̍na maruta̱: saba̍ndhavaḥ | ri̱ha̱te ka̱kubho̍ mi̱thaḥ
||21||गाव॑श्चिद्घा समन्यवः सजा॒त्ये॑न मरुत॒: सब॑न्धवः । रि॒ह॒ते क॒कुभो॑ मि॒थः
marta̍ścidvo nṛtavo rukmavakṣasa̱ upa̍ bhrātṛ̱tvamāya̍ti |
adhi̍ no gāta maruta̱: sadā̱ hi va̍ āpi̱tvamasti̱ nidhru̍vi
||22||मर्त॑श्चिद्वो नृतवो रुक्मवक्षस॒ उप॑ भ्रातृ॒त्वमाय॑ति ।
अधि॑ नो गात मरुत॒: सदा॒ हि व॑ आपि॒त्वमस्ति॒ निध्रु॑वि
maru̍to̱ māru̍tasya na̱ ā bhe̍ṣa̱jasya̍ vahatā sudānavaḥ | yū̱yaṃ sa̍khāyaḥ saptayaḥ
||23||मरु॑तो॒ मारु॑तस्य न॒ आ भे॑ष॒जस्य॑ वहता सुदानवः । यू॒यं स॑खायः सप्तयः
yābhi̱: sindhu̱mava̍tha̱ yābhi̱stūrva̍tha̱ yābhi̍rdaśa̱syathā̱ krivi̍m |
mayo̍ no bhūto̱tibhi̍rmayobhuvaḥ śi̱vābhi̍rasacadviṣaḥ
||24||याभि॒: सिन्धु॒मव॑थ॒ याभि॒स्तूर्व॑थ॒ याभि॑र्दश॒स्यथा॒ क्रिवि॑म् ।
मयो॑ नो भूतो॒तिभि॑र्मयोभुवः शि॒वाभि॑रसचद्विषः
yatsindhau̱ yadasi̍knyā̱ṃ yatsa̍mu̱dreṣu̍ marutaḥ subarhiṣaḥ | yatparva̍teṣu bheṣa̱jam
||25||यत्सिन्धौ॒ यदसि॑क्न्यां॒ यत्स॑मु॒द्रेषु॑ मरुतः सुबर्हिषः । यत्पर्व॑तेषु भेष॒जम्
viśva̱ṃ paśya̍nto bibhṛthā ta̱nūṣvā tenā̍ no̱ adhi̍ vocata | kṣa̱mā rapo̍ maruta̱ ātu̍rasya na̱ iṣka̍rtā̱ vihru̍ta̱ṃ puna̍:
||26||विश्वं॒ पश्य॑न्तो बिभृथा त॒नूष्वा तेना॑ नो॒ अधि॑ वोचत । क्ष॒मा रपो॑ मरुत॒ आतु॑रस्य न॒ इष्क॑र्ता॒ विह्रु॑तं॒ पुन॑: