Study
- Anukramaṇī
- Source
12 bindu: pūtadakṣo vā āṅgirasa: | maruta: | gāyatrī |
gaurdha̍yati ma̱rutā̍ṃ śrava̱syurmā̱tā ma̱ghonā̍m | yu̱ktā vahnī̱ rathā̍nām
||1||गौर्ध॑यति म॒रुतां॑ श्रव॒स्युर्मा॒ता म॒घोना॑म् । यु॒क्ता वह्नी॒ रथा॑नाम्
yasyā̍ de̱vā u̱pasthe̍ vra̱tā viśve̍ dhā̱raya̍nte | sūryā̱māsā̍ dṛ̱śe kam
||2||यस्या॑ दे॒वा उ॒पस्थे॑ व्र॒ता विश्वे॑ धा॒रय॑न्ते । सूर्या॒मासा॑ दृ॒शे कम्
tatsu no̱ viśve̍ a̱rya ā sadā̍ gṛṇanti kā̱rava̍: | ma̱ruta̱: soma̍pītaye
||3||तत्सु नो॒ विश्वे॑ अ॒र्य आ सदा॑ गृणन्ति का॒रव॑: । म॒रुत॒: सोम॑पीतये
asti̱ somo̍ a̱yaṃ su̱taḥ piba̍ntyasya ma̱ruta̍: | u̱ta sva̱rājo̍ a̱śvinā̍
||4||अस्ति॒ सोमो॑ अ॒यं सु॒तः पिब॑न्त्यस्य म॒रुत॑: । उ॒त स्व॒राजो॑ अ॒श्विना॑
piba̍nti mi̱tro a̍rya̱mā tanā̍ pū̱tasya̱ varu̍ṇaḥ | tri̱ṣa̱dha̱sthasya̱ jāva̍taḥ
||5||पिब॑न्ति मि॒त्रो अ॑र्य॒मा तना॑ पू॒तस्य॒ वरु॑णः । त्रि॒ष॒ध॒स्थस्य॒ जाव॑तः
u̱to nva̍sya̱ joṣa̱mām̐ indra̍: su̱tasya̱ goma̍taḥ | prā̱tarhote̍va matsati
||6||उ॒तो न्व॑स्य॒ जोष॒माँ इन्द्र॑: सु॒तस्य॒ गोम॑तः । प्रा॒तर्होते॑व मत्सति
kada̍tviṣanta sū̱raya̍sti̱ra āpa̍ iva̱ sridha̍: | arṣa̍nti pū̱tada̍kṣasaḥ
||7||कद॑त्विषन्त सू॒रय॑स्ति॒र आप॑ इव॒ स्रिध॑: । अर्ष॑न्ति पू॒तद॑क्षसः
kadvo̍ a̱dya ma̱hānā̍ṃ de̱vānā̱mavo̍ vṛṇe | tmanā̍ ca da̱smava̍rcasām
||8||कद्वो॑ अ॒द्य म॒हानां॑ दे॒वाना॒मवो॑ वृणे । त्मना॑ च द॒स्मव॑र्चसाम्
ā ye viśvā̱ pārthi̍vāni pa̱pratha̍nroca̱nā di̱vaḥ | ma̱ruta̱: soma̍pītaye
||9||आ ये विश्वा॒ पार्थि॑वानि प॒प्रथ॑न्रोच॒ना दि॒वः । म॒रुत॒: सोम॑पीतये
tyānnu pū̱tada̍kṣaso di̱vo vo̍ maruto huve | a̱sya soma̍sya pī̱taye̍
||10||त्यान्नु पू॒तद॑क्षसो दि॒वो वो॑ मरुतो हुवे । अ॒स्य सोम॑स्य पी॒तये॑
tyānnu ye vi roda̍sī tasta̱bhurma̱ruto̍ huve | a̱sya soma̍sya pī̱taye̍
||11||त्यान्नु ये वि रोद॑सी तस्त॒भुर्म॒रुतो॑ हुवे । अ॒स्य सोम॑स्य पी॒तये॑
tyaṃ nu māru̍taṃ ga̱ṇaṃ gi̍ri̱ṣṭhāṃ vṛṣa̍ṇaṃ huve | a̱sya soma̍sya pī̱taye̍
||12||त्यं नु मारु॑तं ग॒णं गि॑रि॒ष्ठां वृष॑णं हुवे । अ॒स्य सोम॑स्य पी॒तये॑