Study
- Anukramaṇī
- Source
18 gopavana ātreya: saptavadhrirvā | aśvinau |gāyatrī |
udī̍rāthāmṛtāya̱te yu̱ñjāthā̍maśvinā̱ ratha̍m | anti̱ ṣadbhū̍tu vā̱mava̍:
||1||उदी॑राथामृताय॒ते यु॒ञ्जाथा॑मश्विना॒ रथ॑म् । अन्ति॒ षद्भू॑तु वा॒मव॑:
ni̱miṣa̍ści̱jjavī̍yasā̱ rathe̱nā yā̍tamaśvinā | anti̱ ṣadbhū̍tu vā̱mava̍:
||2||नि॒मिष॑श्चि॒ज्जवी॑यसा॒ रथे॒ना या॑तमश्विना । अन्ति॒ षद्भू॑तु वा॒मव॑:
upa̍ stṛṇīta̱matra̍ye hi̱mena̍ gha̱rmama̍śvinā | anti̱ ṣadbhū̍tu vā̱mava̍:
||3||उप॑ स्तृणीत॒मत्र॑ये हि॒मेन॑ घ॒र्मम॑श्विना । अन्ति॒ षद्भू॑तु वा॒मव॑:
kuha̍ stha̱: kuha̍ jagmathu̱: kuha̍ śye̱neva̍ petathuḥ | anti̱ ṣadbhū̍tu vā̱mava̍:
||4||कुह॑ स्थ॒: कुह॑ जग्मथु॒: कुह॑ श्ये॒नेव॑ पेतथुः । अन्ति॒ षद्भू॑तु वा॒मव॑:
yada̱dya karhi̱ karhi̍ cicchuśrū̱yāta̍mi̱maṃ hava̍m | anti̱ ṣadbhū̍tu vā̱mava̍:
||5||यद॒द्य कर्हि॒ कर्हि॑ चिच्छुश्रू॒यात॑मि॒मं हव॑म् । अन्ति॒ षद्भू॑तु वा॒मव॑:
a̱śvinā̍ yāma̱hūta̍mā̱ nedi̍ṣṭhaṃ yā̱myāpya̍m | anti̱ ṣadbhū̍tu vā̱mava̍:
||6||अ॒श्विना॑ याम॒हूत॑मा॒ नेदि॑ष्ठं या॒म्याप्य॑म् । अन्ति॒ षद्भू॑तु वा॒मव॑:
ava̍nta̱matra̍ye gṛ̱haṃ kṛ̍ṇu̱taṃ yu̱vama̍śvinā | anti̱ ṣadbhū̍tu vā̱mava̍:
||7||अव॑न्त॒मत्र॑ये गृ॒हं कृ॑णु॒तं यु॒वम॑श्विना । अन्ति॒ षद्भू॑तु वा॒मव॑:
vare̍the a̱gnimā̱tapo̱ vada̍te va̱lgvatra̍ye | anti̱ ṣadbhū̍tu vā̱mava̍:
||8||वरे॑थे अ॒ग्निमा॒तपो॒ वद॑ते व॒ल्ग्वत्र॑ये । अन्ति॒ षद्भू॑तु वा॒मव॑:
pra sa̱ptava̍dhrirā̱śasā̱ dhārā̍ma̱gnera̍śāyata | anti̱ ṣadbhū̍tu vā̱mava̍:
||9||प्र स॒प्तव॑ध्रिरा॒शसा॒ धारा॑म॒ग्नेर॑शायत । अन्ति॒ षद्भू॑तु वा॒मव॑:
i̱hā ga̍taṃ vṛṣaṇvasū śṛṇu̱taṃ ma̍ i̱maṃ hava̍m | anti̱ ṣadbhū̍tu vā̱mava̍:
||10||इ॒हा ग॑तं वृषण्वसू शृणु॒तं म॑ इ॒मं हव॑म् । अन्ति॒ षद्भू॑तु वा॒मव॑:
kimi̱daṃ vā̍ṃ purāṇa̱vajjara̍toriva śasyate | anti̱ ṣadbhū̍tu vā̱mava̍:
||11||किमि॒दं वां॑ पुराण॒वज्जर॑तोरिव शस्यते । अन्ति॒ षद्भू॑तु वा॒मव॑:
sa̱mā̱naṃ vā̍ṃ sajā̱tya̍ṃ samā̱no bandhu̍raśvinā | anti̱ ṣadbhū̍tu vā̱mava̍:
||12||स॒मा॒नं वां॑ सजा॒त्यं॑ समा॒नो बन्धु॑रश्विना । अन्ति॒ षद्भू॑तु वा॒मव॑:
yo vā̱ṃ rajā̍ṃsyaśvinā̱ ratho̍ vi̱yāti̱ roda̍sī | anti̱ ṣadbhū̍tu vā̱mava̍:
||13||यो वां॒ रजां॑स्यश्विना॒ रथो॑ वि॒याति॒ रोद॑सी । अन्ति॒ षद्भू॑तु वा॒मव॑:
ā no̱ gavye̍bhi̱raśvyai̍: sa̱hasrai̱rupa̍ gacchatam | anti̱ ṣadbhū̍tu vā̱mava̍:
||14||आ नो॒ गव्ये॑भि॒रश्व्यै॑: स॒हस्रै॒रुप॑ गच्छतम् । अन्ति॒ षद्भू॑तु वा॒मव॑:
mā no̱ gavye̍bhi̱raśvyai̍: sa̱hasre̍bhi̱rati̍ khyatam | anti̱ ṣadbhū̍tu vā̱mava̍:
||15||मा नो॒ गव्ये॑भि॒रश्व्यै॑: स॒हस्रे॑भि॒रति॑ ख्यतम् । अन्ति॒ षद्भू॑तु वा॒मव॑:
a̱ru̱ṇapsu̍ru̱ṣā a̍bhū̱daka̱rjyoti̍ṝ̱tāva̍rī | anti̱ ṣadbhū̍tu vā̱mava̍:
||16||अ॒रु॒णप्सु॑रु॒षा अ॑भू॒दक॒र्ज्योति॑ॠ॒ताव॑री । अन्ति॒ षद्भू॑तु वा॒मव॑:
a̱śvinā̱ su vi̱cāka̍śadvṛ̱kṣaṃ pa̍raśu̱mām̐ i̍va | anti̱ ṣadbhū̍tu vā̱mava̍:
||17||अ॒श्विना॒ सु वि॒चाक॑शद्वृ॒क्षं प॑रशु॒माँ इ॑व । अन्ति॒ षद्भू॑तु वा॒मव॑:
pura̱ṃ na dhṛ̍ṣṇa̱vā ru̍ja kṛ̱ṣṇayā̍ bādhi̱to vi̱śā | anti̱ ṣadbhū̍tu vā̱mava̍:
||18||पुरं॒ न धृ॑ष्ण॒वा रु॑ज कृ॒ष्णया॑ बाधि॒तो वि॒शा । अन्ति॒ षद्भू॑तु वा॒मव॑: