Study
- Anukramaṇī
- Source
(18) 1 15 nīpātithi: kāṇva:, 16 -18 sahasraṃ vasurociṣo'ṅgirasa: | indra: | anuṣṭup , 16-18 gāyatrī |
endra̍ yāhi̱ hari̍bhi̱rupa̱ kaṇva̍sya suṣṭu̱tim | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||1||एन्द्र॑ याहि॒ हरि॑भि॒रुप॒ कण्व॑स्य सुष्टु॒तिम् । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā tvā̱ grāvā̱ vada̍nni̱ha so̱mī ghoṣe̍ṇa yacchatu | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||2||आ त्वा॒ ग्रावा॒ वद॑न्नि॒ह सो॒मी घोषे॑ण यच्छतु । दि॒वो अ॒मुष्य॒ शास॑तो॒ दिवं॑ य॒य दि॑वावसो
atrā̱ vi ne̱mire̍ṣā̱murā̱ṃ na dhū̍nute̱ vṛka̍: | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||3||अत्रा॒ वि ने॒मिरे॑षा॒मुरां॒ न धू॑नुते॒ वृक॑: । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā tvā̱ kaṇvā̍ i̱hāva̍se̱ hava̍nte̱ vāja̍sātaye | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||4||आ त्वा॒ कण्वा॑ इ॒हाव॑से॒ हव॑न्ते॒ वाज॑सातये । दि॒वो अ॒मुष्य॒ शास॑तो॒ दिवं॑ य॒य दि॑वावसो
dadhā̍mi te su̱tānā̱ṃ vṛṣṇe̱ na pū̍rva̱pāyya̍m | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||5||दधा॑मि ते सु॒तानां॒ वृष्णे॒ न पू॑र्व॒पाय्य॑म् । दि॒वो अ॒मुष्य॒ शास॑तो॒ दिवं॑ य॒य दि॑वावसो
smatpu̍raṃdhirna̱ ā ga̍hi vi̱śvato̍dhīrna ū̱taye̍ | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||6||स्मत्पु॑रंधिर्न॒ आ ग॑हि वि॒श्वतो॑धीर्न ऊ॒तये॑ । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā no̍ yāhi mahemate̱ saha̍srote̱ śatā̍magha | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||7||आ नो॑ याहि महेमते॒ सह॑स्रोते॒ शता॑मघ । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā tvā̱ hotā̱ manu̍rhito deva̱trā va̍kṣa̱dīḍya̍: | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||8||आ त्वा॒ होता॒ मनु॑र्हितो देव॒त्रा व॑क्ष॒दीड्य॑: । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā tvā̍ mada̱cyutā̱ harī̍ śye̱naṃ pa̱kṣeva̍ vakṣataḥ | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||9||आ त्वा॑ मद॒च्युता॒ हरी॑ श्ये॒नं प॒क्षेव॑ वक्षतः । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā yā̍hya̱rya ā pari̱ svāhā̱ soma̍sya pī̱taye̍ | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||10||आ या॑ह्य॒र्य आ परि॒ स्वाहा॒ सोम॑स्य पी॒तये॑ । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā no̍ yā̱hyupa̍śrutyu̱ktheṣu̍ raṇayā i̱ha | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||11||आ नो॑ या॒ह्युप॑श्रुत्यु॒क्थेषु॑ रणया इ॒ह । दि॒वो अ॒मुष्य॒ शास॑तो॒ दिवं॑ य॒य दि॑वावसो
sarū̍pai̱rā su no̍ gahi̱ sambhṛ̍tai̱: sambhṛ̍tāśvaḥ | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||12||सरू॑पै॒रा सु नो॑ गहि॒ सम्भृ॑तै॒: सम्भृ॑ताश्वः । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā yā̍hi̱ parva̍tebhyaḥ samu̱drasyādhi̍ vi̱ṣṭapa̍: | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||13||आ या॑हि॒ पर्व॑तेभ्यः समु॒द्रस्याधि॑ वि॒ष्टप॑: । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā no̱ gavyā̱nyaśvyā̍ sa̱hasrā̍ śūra dardṛhi | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||14||आ नो॒ गव्या॒न्यश्व्या॑ स॒हस्रा॑ शूर दर्दृहि । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā na̍: sahasra̱śo bha̍rā̱'yutā̍ni śa̱tāni̍ ca | di̱vo a̱muṣya̱ śāsa̍to̱ diva̍ṃ ya̱ya di̍vāvaso
||15||आ न॑: सहस्र॒शो भ॑रा॒ऽयुता॑नि श॒तानि॑ च । दि॒वो अ॒मुष्य॒ शास॑तो॒ दिवं॑ य॒य दि॑वावसो
ā yadindra̍śca̱ dadva̍he sa̱hasra̱ṃ vasu̍rociṣaḥ | oji̍ṣṭha̱maśvya̍ṃ pa̱śum
||16||आ यदिन्द्र॑श्च॒ दद्व॑हे स॒हस्रं॒ वसु॑रोचिषः । ओजि॑ष्ठ॒मश्व्यं॑ प॒शुम्
ya ṛ̱jrā vāta̍raṃhaso'ru̱ṣāso̍ raghu̱ṣyada̍: | bhrāja̍nte̱ sūryā̍ iva
||17||य ऋ॒ज्रा वात॑रंहसोऽरु॒षासो॑ रघु॒ष्यद॑: । भ्राज॑न्ते॒ सूर्या॑ इव
pārā̍vatasya rā̱tiṣu̍ dra̱vacca̍kreṣvā̱śuṣu̍ | tiṣṭha̱ṃ vana̍sya̱ madhya̱ ā
||18||पारा॑वतस्य रा॒तिषु॑ द्र॒वच्च॑क्रेष्वा॒शुषु॑ । तिष्ठं॒ वन॑स्य॒ मध्य॒ आ