Study
- Anukramaṇī
- Source
15 sudīti- purumīl̤ahāvāṅgirasau, tayorvānyatara: | agni: | gāyatrī, 10-15 pragātha: = ( viṣamā bṛhatī, samā satobṛhatī ) |
tvaṃ no̍ agne̱ maho̍bhiḥ pā̱hi viśva̍syā̱ arā̍teḥ | u̱ta dvi̱ṣo martya̍sya
||1||त्वं नो॑ अग्ने॒ महो॑भिः पा॒हि विश्व॑स्या॒ अरा॑तेः । उ॒त द्वि॒षो मर्त्य॑स्य
na̱hi ma̱nyuḥ pauru̍ṣeya̱ īśe̱ hi va̍: priyajāta | tvamida̍si̱ kṣapā̍vān
||2||न॒हि म॒न्युः पौरु॑षेय॒ ईशे॒ हि व॑: प्रियजात । त्वमिद॑सि॒ क्षपा॑वान्
sa no̱ viśve̍bhirde̱vebhi̱rūrjo̍ napā̱dbhadra̍śoce | ra̱yiṃ de̍hi vi̱śvavā̍ram
||3||स नो॒ विश्वे॑भिर्दे॒वेभि॒रूर्जो॑ नपा॒द्भद्र॑शोचे । र॒यिं दे॑हि वि॒श्ववा॑रम्
na tama̍gne̱ arā̍tayo̱ marta̍ṃ yuvanta rā̱yaḥ | yaṃ trāya̍se dā̱śvāṃsa̍m
||4||न तम॑ग्ने॒ अरा॑तयो॒ मर्तं॑ युवन्त रा॒यः । यं त्राय॑से दा॒श्वांस॑म्
yaṃ tvaṃ vi̍pra me̱dhasā̍tā̱vagne̍ hi̱noṣi̱ dhanā̍ya | sa tavo̱tī goṣu̱ gantā̍
||5||यं त्वं वि॑प्र मे॒धसा॑ता॒वग्ने॑ हि॒नोषि॒ धना॑य । स तवो॒ती गोषु॒ गन्ता॑
tvaṃ ra̱yiṃ pu̍ru̱vīra̱magne̍ dā̱śuṣe̱ martā̍ya | pra ṇo̍ naya̱ vasyo̱ accha̍
||6||त्वं र॒यिं पु॑रु॒वीर॒मग्ने॑ दा॒शुषे॒ मर्ता॑य । प्र णो॑ नय॒ वस्यो॒ अच्छ॑
u̱ru̱ṣyā ṇo̱ mā parā̍ dā aghāya̱te jā̍tavedaḥ | du̱rā̱dhye̱3 martā̍ya
||7||उ॒रु॒ष्या णो॒ मा परा॑ दा अघाय॒ते जा॑तवेदः । दु॒रा॒ध्ये॒३ मर्ता॑य
agne̱ māki̍ṣṭe de̱vasya̍ rā̱timade̍vo yuyota | tvamī̍śiṣe̱ vasū̍nām
||8||अग्ने॒ माकि॑ष्टे दे॒वस्य॑ रा॒तिमदे॑वो युयोत । त्वमी॑शिषे॒ वसू॑नाम्
sa no̱ vasva̱ upa̍ mā̱syūrjo̍ napā̱nmāhi̍nasya | sakhe̍ vaso jari̱tṛbhya̍:
||9||स नो॒ वस्व॒ उप॑ मा॒स्यूर्जो॑ नपा॒न्माहि॑नस्य । सखे॑ वसो जरि॒तृभ्य॑:
acchā̍ naḥ śī̱raśo̍ciṣa̱ṃ giro̍ yantu darśa̱tam | acchā̍ ya̱jñāso̱ nama̍sā purū̱vasu̍ṃ purupraśa̱stamū̱taye̍
||10||अच्छा॑ नः शी॒रशो॑चिषं॒ गिरो॑ यन्तु दर्श॒तम् । अच्छा॑ य॒ज्ञासो॒ नम॑सा पुरू॒वसुं॑ पुरुप्रश॒स्तमू॒तये॑
a̱gniṃ sū̱nuṃ saha̍so jā̱tave̍dasaṃ dā̱nāya̱ vāryā̍ṇām | dvi̱tā yo bhūda̱mṛto̱ martye̱ṣvā hotā̍ ma̱ndrata̍mo vi̱śi
||11||अ॒ग्निं सू॒नुं सह॑सो जा॒तवे॑दसं दा॒नाय॒ वार्या॑णाम् । द्वि॒ता यो भूद॒मृतो॒ मर्त्ये॒ष्वा होता॑ म॒न्द्रत॑मो वि॒शि
a̱gniṃ vo̍ devaya̱jyayā̱'gniṃ pra̍ya̱tya̍dhva̱re | a̱gniṃ dhī̱ṣu pra̍tha̱mama̱gnimarva̍tya̱gniṃ kṣaitrā̍ya̱ sādha̍se
||12||अ॒ग्निं वो॑ देवय॒ज्यया॒ऽग्निं प्र॑य॒त्य॑ध्व॒रे । अ॒ग्निं धी॒षु प्र॑थ॒मम॒ग्निमर्व॑त्य॒ग्निं क्षैत्रा॑य॒ साध॑से
a̱gniri̱ṣāṃ sa̱khye da̍dātu na̱ īśe̱ yo vāryā̍ṇām | a̱gniṃ to̱ke tana̍ye̱ śaśva̍dīmahe̱ vasu̱ṃ santa̍ṃ tanū̱pām
||13||अ॒ग्निरि॒षां स॒ख्ये द॑दातु न॒ ईशे॒ यो वार्या॑णाम् । अ॒ग्निं तो॒के तन॑ये॒ शश्व॑दीमहे॒ वसुं॒ सन्तं॑ तनू॒पाम्
a̱gnimī̍l̤i̱ṣvāva̍se̱ gāthā̍bhiḥ śī̱raśo̍ciṣam | a̱gniṃ rā̱ye pu̍rumīl̤ha śru̱taṃ naro̱'gniṃ su̍dī̱taye̍ cha̱rdiḥ
||14||अ॒ग्निमी॑ळि॒ष्वाव॑से॒ गाथा॑भिः शी॒रशो॑चिषम् । अ॒ग्निं रा॒ये पु॑रुमीळ्ह श्रु॒तं नरो॒ऽग्निं सु॑दी॒तये॑ छ॒र्दिः
a̱gniṃ dveṣo̱ yota̱vai no̍ gṛṇīmasya̱gniṃ śaṃ yośca̱ dāta̍ve | viśvā̍su vi̱kṣva̍vi̱teva̱ havyo̱ bhuva̱dvastu̍ṝṣū̱ṇām
||15||अ॒ग्निं द्वेषो॒ योत॒वै नो॑ गृणीमस्य॒ग्निं शं योश्च॒ दात॑वे । विश्वा॑सु वि॒क्ष्व॑वि॒तेव॒ हव्यो॒ भुव॒द्वस्तु॑ॠषू॒णाम्