Study
- Anukramaṇī
- Source
33 nārada: kāṇva: | indra: | uṣṇik |
indra̍: su̱teṣu̱ some̍ṣu̱ kratu̍ṃ punīta u̱kthya̍m | vi̱de vṛ̱dhasya̱ dakṣa̍so ma̱hānhi ṣaḥ
||1||इन्द्र॑: सु॒तेषु॒ सोमे॑षु॒ क्रतुं॑ पुनीत उ॒क्थ्य॑म् । वि॒दे वृ॒धस्य॒ दक्ष॑सो म॒हान्हि षः
sa pra̍tha̱me vyo̍mani de̱vānā̱ṃ sada̍ne vṛ̱dhaḥ | su̱pā̱raḥ su̱śrava̍stama̱: sama̍psu̱jit
||2||स प्र॑थ॒मे व्यो॑मनि दे॒वानां॒ सद॑ने वृ॒धः । सु॒पा॒रः सु॒श्रव॑स्तम॒: सम॑प्सु॒जित्
tama̍hve̱ vāja̍sātaya̱ indra̱ṃ bharā̍ya śu̱ṣmiṇa̍m | bhavā̍ naḥ su̱mne anta̍ma̱: sakhā̍ vṛ̱dhe
||3||तम॑ह्वे॒ वाज॑सातय॒ इन्द्रं॒ भरा॑य शु॒ष्मिण॑म् । भवा॑ नः सु॒म्ने अन्त॑म॒: सखा॑ वृ॒धे
i̱yaṃ ta̍ indra girvaṇo rā̱tiḥ kṣa̍rati sunva̱taḥ | ma̱ndā̱no a̱sya ba̱rhiṣo̱ vi rā̍jasi
||4||इ॒यं त॑ इन्द्र गिर्वणो रा॒तिः क्ष॑रति सुन्व॒तः । म॒न्दा॒नो अ॒स्य ब॒र्हिषो॒ वि रा॑जसि
nū̱naṃ tadi̍ndra daddhi no̱ yattvā̍ su̱nvanta̱ īma̍he | ra̱yiṃ na̍ści̱tramā bha̍rā sva̱rvida̍m
||5||नू॒नं तदि॑न्द्र दद्धि नो॒ यत्त्वा॑ सु॒न्वन्त॒ ईम॑हे । र॒यिं न॑श्चि॒त्रमा भ॑रा स्व॒र्विद॑म्
sto̱tā yatte̱ vica̍rṣaṇiratipraśa̱rdhaya̱dgira̍: | va̱yā i̱vānu̍ rohate ju̱ṣanta̱ yat
||6||स्तो॒ता यत्ते॒ विच॑र्षणिरतिप्रश॒र्धय॒द्गिर॑: । व॒या इ॒वानु॑ रोहते जु॒षन्त॒ यत्
pra̱tna̱vajja̍nayā̱ gira̍: śṛṇu̱dhī ja̍ri̱turhava̍m | made̍made vavakṣithā su̱kṛtva̍ne
||7||प्र॒त्न॒वज्ज॑नया॒ गिर॑: शृणु॒धी ज॑रि॒तुर्हव॑म् । मदे॑मदे ववक्षिथा सु॒कृत्व॑ने
krīl̤a̍ntyasya sū̱nṛtā̱ āpo̱ na pra̱vatā̍ ya̱tīḥ | a̱yā dhi̱yā ya u̱cyate̱ pati̍rdi̱vaḥ
||8||क्रीळ॑न्त्यस्य सू॒नृता॒ आपो॒ न प्र॒वता॑ य॒तीः । अ॒या धि॒या य उ॒च्यते॒ पति॑र्दि॒वः
u̱to pati̱rya u̱cyate̍ kṛṣṭī̱nāmeka̱ idva̱śī | na̱mo̱vṛ̱dhaira̍va̱syubhi̍: su̱te ra̍ṇa
||9||उ॒तो पति॒र्य उ॒च्यते॑ कृष्टी॒नामेक॒ इद्व॒शी । न॒मो॒वृ॒धैर॑व॒स्युभि॑: सु॒ते र॑ण
stu̱hi śru̱taṃ vi̍pa̱ścita̱ṃ harī̱ yasya̍ prasa̱kṣiṇā̍ | gantā̍rā dā̱śuṣo̍ gṛ̱haṃ na̍ma̱svina̍:
||10||स्तु॒हि श्रु॒तं वि॑प॒श्चितं॒ हरी॒ यस्य॑ प्रस॒क्षिणा॑ । गन्ता॑रा दा॒शुषो॑ गृ॒हं न॑म॒स्विन॑:
tū̱tu̱jā̱no ma̍hema̱te'śve̍bhiḥ pruṣi̱tapsu̍bhiḥ | ā yā̍hi ya̱jñamā̱śubhi̱: śamiddhi te̍
||11||तू॒तु॒जा॒नो म॑हेम॒तेऽश्वे॑भिः प्रुषि॒तप्सु॑भिः । आ या॑हि य॒ज्ञमा॒शुभि॒: शमिद्धि ते॑
indra̍ śaviṣṭha satpate ra̱yiṃ gṛ̱ṇatsu̍ dhāraya | śrava̍: sū̱ribhyo̍ a̱mṛta̍ṃ vasutva̱nam
||12||इन्द्र॑ शविष्ठ सत्पते र॒यिं गृ॒णत्सु॑ धारय । श्रव॑: सू॒रिभ्यो॑ अ॒मृतं॑ वसुत्व॒नम्
have̍ tvā̱ sūra̱ udi̍te̱ have̍ ma̱dhyaṃdi̍ne di̱vaḥ | ju̱ṣā̱ṇa i̍ndra̱ sapti̍bhirna̱ ā ga̍hi
||13||हवे॑ त्वा॒ सूर॒ उदि॑ते॒ हवे॑ म॒ध्यंदि॑ने दि॒वः । जु॒षा॒ण इ॑न्द्र॒ सप्ति॑भिर्न॒ आ ग॑हि
ā tū ga̍hi̱ pra tu dra̍va̱ matsvā̍ su̱tasya̱ goma̍taḥ | tantu̍ṃ tanuṣva pū̱rvyaṃ yathā̍ vi̱de
||14||आ तू ग॑हि॒ प्र तु द्र॑व॒ मत्स्वा॑ सु॒तस्य॒ गोम॑तः । तन्तुं॑ तनुष्व पू॒र्व्यं यथा॑ वि॒दे
yaccha̱krāsi̍ parā̱vati̱ yada̍rvā̱vati̍ vṛtrahan | yadvā̍ samu̱dre andha̍so'vi̱teda̍si
||15||यच्छ॒क्रासि॑ परा॒वति॒ यद॑र्वा॒वति॑ वृत्रहन् । यद्वा॑ समु॒द्रे अन्ध॑सोऽवि॒तेद॑सि
indra̍ṃ vardhantu no̱ gira̱ indra̍ṃ su̱tāsa̱ inda̍vaḥ | indre̍ ha̱viṣma̍tī̱rviśo̍ arāṇiṣuḥ
||16||इन्द्रं॑ वर्धन्तु नो॒ गिर॒ इन्द्रं॑ सु॒तास॒ इन्द॑वः । इन्द्रे॑ ह॒विष्म॑ती॒र्विशो॑ अराणिषुः
tamidviprā̍ ava̱syava̍: pra̱vatva̍tībhirū̱tibhi̍: | indra̍ṃ kṣo̱ṇīra̍vardhayanva̱yā i̍va
||17||तमिद्विप्रा॑ अव॒स्यव॑: प्र॒वत्व॑तीभिरू॒तिभि॑: । इन्द्रं॑ क्षो॒णीर॑वर्धयन्व॒या इ॑व
trika̍drukeṣu̱ ceta̍naṃ de̱vāso̍ ya̱jñama̍tnata | tamidva̍rdhantu no̱ gira̍: sa̱dāvṛ̍dham
||18||त्रिक॑द्रुकेषु॒ चेत॑नं दे॒वासो॑ य॒ज्ञम॑त्नत । तमिद्व॑र्धन्तु नो॒ गिर॑: स॒दावृ॑धम्
sto̱tā yatte̱ anu̍vrata u̱kthānyṛ̍tu̱thā da̱dhe | śuci̍: pāva̱ka u̍cyate̱ so adbhu̍taḥ
||19||स्तो॒ता यत्ते॒ अनु॑व्रत उ॒क्थान्यृ॑तु॒था द॒धे । शुचि॑: पाव॒क उ॑च्यते॒ सो अद्भु॑तः
tadidru̱drasya̍ cetati ya̱hvaṃ pra̱tneṣu̱ dhāma̍su | mano̱ yatrā̱ vi tadda̱dhurvice̍tasaḥ
||20||तदिद्रु॒द्रस्य॑ चेतति य॒ह्वं प्र॒त्नेषु॒ धाम॑सु । मनो॒ यत्रा॒ वि तद्द॒धुर्विचे॑तसः
yadi̍ me sa̱khyamā̱vara̍ i̱masya̍ pā̱hyandha̍saḥ | yena̱ viśvā̱ ati̱ dviṣo̱ atā̍rima
||21||यदि॑ मे स॒ख्यमा॒वर॑ इ॒मस्य॑ पा॒ह्यन्ध॑सः । येन॒ विश्वा॒ अति॒ द्विषो॒ अता॑रिम
ka̱dā ta̍ indra girvaṇaḥ sto̱tā bha̍vāti̱ śaṃta̍maḥ | ka̱dā no̱ gavye̱ aśvye̱ vasau̍ dadhaḥ
||22||क॒दा त॑ इन्द्र गिर्वणः स्तो॒ता भ॑वाति॒ शंत॑मः । क॒दा नो॒ गव्ये॒ अश्व्ये॒ वसौ॑ दधः
u̱ta te̱ suṣṭu̍tā̱ harī̱ vṛṣa̍ṇā vahato̱ ratha̍m | a̱ju̱ryasya̍ ma̱dinta̍ma̱ṃ yamīma̍he
||23||उ॒त ते॒ सुष्टु॑ता॒ हरी॒ वृष॑णा वहतो॒ रथ॑म् । अ॒जु॒र्यस्य॑ म॒दिन्त॑मं॒ यमीम॑हे
tamī̍mahe puruṣṭu̱taṃ ya̱hvaṃ pra̱tnābhi̍rū̱tibhi̍: | ni ba̱rhiṣi̍ pri̱ye sa̍da̱dadha̍ dvi̱tā
||24||तमी॑महे पुरुष्टु॒तं य॒ह्वं प्र॒त्नाभि॑रू॒तिभि॑: । नि ब॒र्हिषि॑ प्रि॒ये स॑द॒दध॑ द्वि॒ता
vardha̍svā̱ su pu̍ruṣṭuta̱ ṛṣi̍ṣṭutābhirū̱tibhi̍: | dhu̱kṣasva̍ pi̱pyuṣī̱miṣa̱mavā̍ ca naḥ
||25||वर्ध॑स्वा॒ सु पु॑रुष्टुत॒ ऋषि॑ष्टुताभिरू॒तिभि॑: । धु॒क्षस्व॑ पि॒प्युषी॒मिष॒मवा॑ च नः
indra̱ tvama̍vi̱teda̍sī̱tthā stu̍va̱to a̍drivaḥ | ṛ̱tādi̍yarmi te̱ dhiya̍ṃ mano̱yuja̍m
||26||इन्द्र॒ त्वम॑वि॒तेद॑सी॒त्था स्तु॑व॒तो अ॑द्रिवः । ऋ॒तादि॑यर्मि ते॒ धियं॑ मनो॒युज॑म्
i̱ha tyā sa̍dha̱mādyā̍ yujā̱naḥ soma̍pītaye | harī̍ indra pra̱tadva̍sū a̱bhi sva̍ra
||27||इ॒ह त्या स॑ध॒माद्या॑ युजा॒नः सोम॑पीतये । हरी॑ इन्द्र प्र॒तद्व॑सू अ॒भि स्व॑र
a̱bhi sva̍rantu̱ ye tava̍ ru̱drāsa̍: sakṣata̱ śriya̍m | u̱to ma̱rutva̍tī̱rviśo̍ a̱bhi praya̍:
||28||अ॒भि स्व॑रन्तु॒ ये तव॑ रु॒द्रास॑: सक्षत॒ श्रिय॑म् । उ॒तो म॒रुत्व॑ती॒र्विशो॑ अ॒भि प्रय॑:
i̱mā a̍sya̱ pratū̍rtayaḥ pa̱daṃ ju̍ṣanta̱ yaddi̱vi | nābhā̍ ya̱jñasya̱ saṃ da̍dhu̱ryathā̍ vi̱de
||29||इ॒मा अ॑स्य॒ प्रतू॑र्तयः प॒दं जु॑षन्त॒ यद्दि॒वि । नाभा॑ य॒ज्ञस्य॒ सं द॑धु॒र्यथा॑ वि॒दे
a̱yaṃ dī̱rghāya̱ cakṣa̍se̱ prāci̍ praya̱tya̍dhva̱re | mimī̍te ya̱jñamā̍nu̱ṣagvi̱cakṣya̍
||30||अ॒यं दी॒र्घाय॒ चक्ष॑से॒ प्राचि॑ प्रय॒त्य॑ध्व॒रे । मिमी॑ते य॒ज्ञमा॑नु॒षग्वि॒चक्ष्य॑
vṛṣā̱yami̍ndra te̱ ratha̍ u̱to te̱ vṛṣa̍ṇā̱ harī̍ | vṛṣā̱ tvaṃ śa̍takrato̱ vṛṣā̱ hava̍:
||31||वृषा॒यमि॑न्द्र ते॒ रथ॑ उ॒तो ते॒ वृष॑णा॒ हरी॑ । वृषा॒ त्वं श॑तक्रतो॒ वृषा॒ हव॑:
vṛṣā̱ grāvā̱ vṛṣā̱ mado̱ vṛṣā̱ somo̍ a̱yaṃ su̱taḥ | vṛṣā̍ ya̱jño yaminva̍si̱ vṛṣā̱ hava̍:
||32||वृषा॒ ग्रावा॒ वृषा॒ मदो॒ वृषा॒ सोमो॑ अ॒यं सु॒तः । वृषा॑ य॒ज्ञो यमिन्व॑सि॒ वृषा॒ हव॑:
vṛṣā̍ tvā̱ vṛṣa̍ṇaṃ huve̱ vajri̍ñci̱trābhi̍rū̱tibhi̍: | vā̱vantha̱ hi prati̍ṣṭuti̱ṃ vṛṣā̱ hava̍:
||33||वृषा॑ त्वा॒ वृष॑णं हुवे॒ वज्रि॑ञ्चि॒त्राभि॑रू॒तिभि॑: । वा॒वन्थ॒ हि प्रति॑ष्टुतिं॒ वृषा॒ हव॑: