Study
- Anukramaṇī
- Source
7 nṛmedha-purumedhāvāṅgirasau | indra: | 1-4 pragātha: = ( viṣamā bṛhatī, samā satobṛhatī ) | 5-6 anuṣṭup
bṛ̱hadindrā̍ya gāyata̱ maru̍to vṛtra̱hanta̍mam | yena̱ jyoti̱raja̍nayannṛtā̱vṛdho̍ de̱vaṃ de̱vāya̱ jāgṛ̍vi
||1||बृ॒हदिन्द्रा॑य गायत॒ मरु॑तो वृत्र॒हन्त॑मम् । येन॒ ज्योति॒रज॑नयन्नृता॒वृधो॑ दे॒वं दे॒वाय॒ जागृ॑वि
apā̍dhamada̱bhiśa̍stīraśasti̱hā'thendro̍ dyu̱mnyābha̍vat | de̱vāsta̍ indra sa̱khyāya̍ yemire̱ bṛha̍dbhāno̱ maru̍dgaṇa
||2||अपा॑धमद॒भिश॑स्तीरशस्ति॒हाऽथेन्द्रो॑ द्यु॒म्न्याभ॑वत् । दे॒वास्त॑ इन्द्र स॒ख्याय॑ येमिरे॒ बृह॑द्भानो॒ मरु॑द्गण
pra va̱ indrā̍ya bṛha̱te maru̍to̱ brahmā̍rcata | vṛ̱traṃ ha̍nati vṛtra̱hā śa̱takra̍tu̱rvajre̍ṇa śa̱tapa̍rvaṇā
||3||प्र व॒ इन्द्रा॑य बृह॒ते मरु॑तो॒ ब्रह्मा॑र्चत । वृ॒त्रं ह॑नति वृत्र॒हा श॒तक्र॑तु॒र्वज्रे॑ण श॒तप॑र्वणा
a̱bhi pra bha̍ra dhṛṣa̱tā dhṛ̍ṣanmana̱: śrava̍ścitte asadbṛ̱hat | arṣa̱ntvāpo̱ java̍sā̱ vi mā̱taro̱ hano̍ vṛ̱traṃ jayā̱ sva̍:
||4||अ॒भि प्र भ॑र धृष॒ता धृ॑षन्मन॒: श्रव॑श्चित्ते असद्बृ॒हत् । अर्ष॒न्त्वापो॒ जव॑सा॒ वि मा॒तरो॒ हनो॑ वृ॒त्रं जया॒ स्व॑:
yajjāya̍thā apūrvya̱ magha̍vanvṛtra̱hatyā̍ya | tatpṛ̍thi̱vīma̍prathaya̱stada̍stabhnā u̱ta dyām
||5||यज्जाय॑था अपूर्व्य॒ मघ॑वन्वृत्र॒हत्या॑य । तत्पृ॑थि॒वीम॑प्रथय॒स्तद॑स्तभ्ना उ॒त द्याम्
tatte̍ ya̱jño a̍jāyata̱ tada̱rka u̱ta haskṛ̍tiḥ | tadviśva̍mabhi̱bhūra̍si̱ yajjā̱taṃ yacca̱ jantva̍m
||6||तत्ते॑ य॒ज्ञो अ॑जायत॒ तद॒र्क उ॒त हस्कृ॑तिः । तद्विश्व॑मभि॒भूर॑सि॒ यज्जा॒तं यच्च॒ जन्त्व॑म्
ā̱māsu̍ pa̱kvamaira̍ya̱ ā sūrya̍ṃ rohayo di̱vi | gha̱rmaṃ na sāma̍ntapatā suvṛ̱ktibhi̱rjuṣṭa̱ṃ girva̍ṇase bṛ̱hat
||7||आ॒मासु॑ प॒क्वमैर॑य॒ आ सूर्यं॑ रोहयो दि॒वि । घ॒र्मं न साम॑न्तपता सुवृ॒क्तिभि॒र्जुष्टं॒ गिर्व॑णसे बृ॒हत्