Study
- Anukramaṇī
- Source
12 pragātho ghaura: kāṇva:| indra: | paṃkti: , 7-9 bṛhatī |
pro a̍smā̱ upa̍stuti̱ṃ bhara̍tā̱ yajjujo̍ṣati |
u̱kthairindra̍sya̱ māhi̍na̱ṃ vayo̍ vardhanti so̱mino̍ bha̱drā indra̍sya rā̱taya̍:
||1||प्रो अ॑स्मा॒ उप॑स्तुतिं॒ भर॑ता॒ यज्जुजो॑षति ।
उ॒क्थैरिन्द्र॑स्य॒ माहि॑नं॒ वयो॑ वर्धन्ति सो॒मिनो॑ भ॒द्रा इन्द्र॑स्य रा॒तय॑:
a̱yu̱jo asa̍mo̱ nṛbhi̱reka̍: kṛ̱ṣṭīra̱yāsya̍: | pū̱rvīrati̱ pra vā̍vṛdhe̱ viśvā̍ jā̱tānyoja̍sā bha̱drā indra̍sya rā̱taya̍:
||2||अ॒यु॒जो अस॑मो॒ नृभि॒रेक॑: कृ॒ष्टीर॒यास्य॑: । पू॒र्वीरति॒ प्र वा॑वृधे॒ विश्वा॑ जा॒तान्योज॑सा भ॒द्रा इन्द्र॑स्य रा॒तय॑:
ahi̍tena ci̱darva̍tā jī̱radā̍nuḥ siṣāsati | pra̱vācya̍mindra̱ tattava̍ vī̱ryā̍ṇi kariṣya̱to bha̱drā indra̍sya rā̱taya̍:
||3||अहि॑तेन चि॒दर्व॑ता जी॒रदा॑नुः सिषासति । प्र॒वाच्य॑मिन्द्र॒ तत्तव॑ वी॒र्या॑णि करिष्य॒तो भ॒द्रा इन्द्र॑स्य रा॒तय॑:
ā yā̍hi kṛ̱ṇavā̍ma ta̱ indra̱ brahmā̍ṇi̱ vardha̍nā |
yebhi̍: śaviṣṭha cā̱kano̍ bha̱drami̱ha śra̍vasya̱te bha̱drā indra̍sya rā̱taya̍:
||4||आ या॑हि कृ॒णवा॑म त॒ इन्द्र॒ ब्रह्मा॑णि॒ वर्ध॑ना ।
येभि॑: शविष्ठ चा॒कनो॑ भ॒द्रमि॒ह श्र॑वस्य॒ते भ॒द्रा इन्द्र॑स्य रा॒तय॑:
dhṛ̱ṣa̱taści̍ddhṛ̱ṣanmana̍: kṛ̱ṇoṣī̍ndra̱ yattvam | tī̱vraiḥ somai̍: saparya̱to namo̍bhiḥ prati̱bhūṣa̍to bha̱drā indra̍sya rā̱taya̍:
||5||धृ॒ष॒तश्चि॑द्धृ॒षन्मन॑: कृ॒णोषी॑न्द्र॒ यत्त्वम् । ती॒व्रैः सोमै॑: सपर्य॒तो नमो॑भिः प्रति॒भूष॑तो भ॒द्रा इन्द्र॑स्य रा॒तय॑:
ava̍ caṣṭa̱ ṛcī̍ṣamo'va̱tām̐ i̍va̱ mānu̍ṣaḥ | ju̱ṣṭvī dakṣa̍sya so̱mina̱: sakhā̍yaṃ kṛṇute̱ yuja̍ṃ bha̱drā indra̍sya rā̱taya̍:
||6||अव॑ चष्ट॒ ऋची॑षमोऽव॒ताँ इ॑व॒ मानु॑षः । जु॒ष्ट्वी दक्ष॑स्य सो॒मिन॒: सखा॑यं कृणुते॒ युजं॑ भ॒द्रा इन्द्र॑स्य रा॒तय॑:
viśve̍ ta indra vī̱rya̍ṃ de̱vā anu̱ kratu̍ṃ daduḥ | bhuvo̱ viśva̍sya̱ gopa̍tiḥ puruṣṭuta bha̱drā indra̍sya rā̱taya̍:
||7||विश्वे॑ त इन्द्र वी॒र्यं॑ दे॒वा अनु॒ क्रतुं॑ ददुः । भुवो॒ विश्व॑स्य॒ गोप॑तिः पुरुष्टुत भ॒द्रा इन्द्र॑स्य रा॒तय॑:
gṛ̱ṇe tadi̍ndra te̱ śava̍ upa̱maṃ de̱vatā̍taye | yaddhaṃsi̍ vṛ̱tramoja̍sā śacīpate bha̱drā indra̍sya rā̱taya̍:
||8||गृ॒णे तदि॑न्द्र ते॒ शव॑ उप॒मं दे॒वता॑तये । यद्धंसि॑ वृ॒त्रमोज॑सा शचीपते भ॒द्रा इन्द्र॑स्य रा॒तय॑:
sama̍neva vapuṣya̱taḥ kṛ̱ṇava̱nmānu̍ṣā yu̱gā | vi̱de tadindra̱śceta̍na̱madha̍ śru̱to bha̱drā indra̍sya rā̱taya̍:
||9||सम॑नेव वपुष्य॒तः कृ॒णव॒न्मानु॑षा यु॒गा । वि॒दे तदिन्द्र॒श्चेत॑न॒मध॑ श्रु॒तो भ॒द्रा इन्द्र॑स्य रा॒तय॑:
ujjā̱tami̍ndra te̱ śava̱ uttvāmuttava̱ kratu̍m | bhūri̍go̱ bhūri̍ vāvṛdhu̱rmagha̍va̱ntava̱ śarma̍ṇi bha̱drā indra̍sya rā̱taya̍:
||10||उज्जा॒तमि॑न्द्र ते॒ शव॒ उत्त्वामुत्तव॒ क्रतु॑म् । भूरि॑गो॒ भूरि॑ वावृधु॒र्मघ॑व॒न्तव॒ शर्म॑णि भ॒द्रा इन्द्र॑स्य रा॒तय॑:
a̱haṃ ca̱ tvaṃ ca̍ vṛtraha̱ntsaṃ yu̍jyāva sa̱nibhya̱ ā |
a̱rā̱tī̱vā ci̍dadri̱vo'nu̍ nau śūra maṃsate bha̱drā indra̍sya rā̱taya̍:
||11||अ॒हं च॒ त्वं च॑ वृत्रह॒न्त्सं यु॑ज्याव स॒निभ्य॒ आ ।
अ॒रा॒ती॒वा चि॑दद्रि॒वोऽनु॑ नौ शूर मंसते भ॒द्रा इन्द्र॑स्य रा॒तय॑:
sa̱tyamidvā u̱ taṃ va̱yamindra̍ṃ stavāma̱ nānṛ̍tam |
ma̱hām̐ asu̍nvato va̱dho bhūri̱ jyotī̍ṃṣi sunva̱to bha̱drā indra̍sya rā̱taya̍:
||12||स॒त्यमिद्वा उ॒ तं व॒यमिन्द्रं॑ स्तवाम॒ नानृ॑तम् ।
म॒हाँ असु॑न्वतो व॒धो भूरि॒ ज्योतीं॑षि सुन्व॒तो भ॒द्रा इन्द्र॑स्य रा॒तय॑: