Study
- Anukramaṇī
- Source
24 viśvamanā vaiyaśva: | mitrāvaruṇau, 10-12 viśve devā : | uṣṇik ,23 uṣṇiggarbhā |
tā vā̱ṃ viśva̍sya go̱pā de̱vā de̱veṣu̍ ya̱jñiyā̍ | ṛ̱tāvā̍nā yajase pū̱tada̍kṣasā
||1||ता वां॒ विश्व॑स्य गो॒पा दे॒वा दे॒वेषु॑ य॒ज्ञिया॑ । ऋ॒तावा॑ना यजसे पू॒तद॑क्षसा
mi̱trā tanā̱ na ra̱thyā̱3 varu̍ṇo̱ yaśca̍ su̱kratu̍: | sa̱nātsu̍jā̱tā tana̍yā dhṛ̱tavra̍tā
||2||मि॒त्रा तना॒ न र॒थ्या॒३ वरु॑णो॒ यश्च॑ सु॒क्रतु॑: । स॒नात्सु॑जा॒ता तन॑या धृ॒तव्र॑ता
tā mā̱tā vi̱śvave̍dasā'su̱ryā̍ya̱ prama̍hasā | ma̱hī ja̍jā̱nādi̍tiṝ̱tāva̍rī
||3||ता मा॒ता वि॒श्ववे॑दसाऽसु॒र्या॑य॒ प्रम॑हसा । म॒ही ज॑जा॒नादि॑तिॠ॒ताव॑री
ma̱hāntā̍ mi̱trāvaru̍ṇā sa̱mrājā̍ de̱vāvasu̍rā | ṛ̱tāvā̍nāvṛ̱tamā gho̍ṣato bṛ̱hat
||4||म॒हान्ता॑ मि॒त्रावरु॑णा स॒म्राजा॑ दे॒वावसु॑रा । ऋ॒तावा॑नावृ॒तमा घो॑षतो बृ॒हत्
napā̍tā̱ śava̍so ma̱haḥ sū̱nū dakṣa̍sya su̱kratū̍ | sṛ̱pradā̍nū i̱ṣo vāstvadhi̍ kṣitaḥ
||5||नपा॑ता॒ शव॑सो म॒हः सू॒नू दक्ष॑स्य सु॒क्रतू॑ । सृ॒प्रदा॑नू इ॒षो वास्त्वधि॑ क्षितः
saṃ yā dānū̍ni ye̱mathu̍rdi̱vyāḥ pārthi̍vī̱riṣa̍: | nabha̍svatī̱rā vā̍ṃ carantu vṛ̱ṣṭaya̍:
||6||सं या दानू॑नि ये॒मथु॑र्दि॒व्याः पार्थि॑वी॒रिष॑: । नभ॑स्वती॒रा वां॑ चरन्तु वृ॒ष्टय॑:
adhi̱ yā bṛ̍ha̱to di̱vo̱3'bhi yū̱theva̱ paśya̍taḥ | ṛ̱tāvā̍nā sa̱mrājā̱ nama̍se hi̱tā
||7||अधि॒ या बृ॑ह॒तो दि॒वो॒३ऽभि यू॒थेव॒ पश्य॑तः । ऋ॒तावा॑ना स॒म्राजा॒ नम॑से हि॒ता
ṛ̱tāvā̍nā̱ ni ṣe̍datu̱: sāmrā̍jyāya su̱kratū̍ | dhṛ̱tavra̍tā kṣa̱triyā̍ kṣa̱tramā̍śatuḥ
||8||ऋ॒तावा॑ना॒ नि षे॑दतु॒: साम्रा॑ज्याय सु॒क्रतू॑ । धृ॒तव्र॑ता क्ष॒त्रिया॑ क्ष॒त्रमा॑शतुः
a̱kṣṇaści̍dgātu̱vitta̍rānulba̱ṇena̱ cakṣa̍sā | ni ci̍nmi̱ṣantā̍ nici̱rā ni ci̍kyatuḥ
||9||अ॒क्ष्णश्चि॑द्गातु॒वित्त॑रानुल्ब॒णेन॒ चक्ष॑सा । नि चि॑न्मि॒षन्ता॑ निचि॒रा नि चि॑क्यतुः
u̱ta no̍ de̱vyadi̍tiruru̱ṣyatā̱ṃ nāsa̍tyā | u̱ru̱ṣyantu̍ ma̱ruto̍ vṛ̱ddhaśa̍vasaḥ
||10||उ॒त नो॑ दे॒व्यदि॑तिरुरु॒ष्यतां॒ नास॑त्या । उ॒रु॒ष्यन्तु॑ म॒रुतो॑ वृ॒द्धश॑वसः
te no̍ nā̱vamu̍ruṣyata̱ divā̱ nakta̍ṃ sudānavaḥ | ari̍ṣyanto̱ ni pā̱yubhi̍: sacemahi
||11||ते नो॑ ना॒वमु॑रुष्यत॒ दिवा॒ नक्तं॑ सुदानवः । अरि॑ष्यन्तो॒ नि पा॒युभि॑: सचेमहि
aghna̍te̱ viṣṇa̍ve va̱yamari̍ṣyantaḥ su̱dāna̍ve | śru̱dhi sva̍yāvantsindho pū̱rvaci̍ttaye
||12||अघ्न॑ते॒ विष्ण॑वे व॒यमरि॑ष्यन्तः सु॒दान॑वे । श्रु॒धि स्व॑यावन्त्सिन्धो पू॒र्वचि॑त्तये
tadvārya̍ṃ vṛṇīmahe̱ vari̍ṣṭhaṃ gopa̱yatya̍m | mi̱tro yatpānti̱ varu̍ṇo̱ yada̍rya̱mā
||13||तद्वार्यं॑ वृणीमहे॒ वरि॑ष्ठं गोप॒यत्य॑म् । मि॒त्रो यत्पान्ति॒ वरु॑णो॒ यद॑र्य॒मा
u̱ta na̱: sindhu̍ra̱pāṃ tanma̱ruta̱stada̱śvinā̍ | indro̱ viṣṇu̍rmī̱ḍhvāṃsa̍: sa̱joṣa̍saḥ
||14||उ॒त न॒: सिन्धु॑र॒पां तन्म॒रुत॒स्तद॒श्विना॑ । इन्द्रो॒ विष्णु॑र्मी॒ढ्वांस॑: स॒जोष॑सः
te hi ṣmā̍ va̱nuṣo̱ naro̱'bhimā̍ti̱ṃ kaya̍sya cit | ti̱gmaṃ na kṣoda̍: prati̱ghnanti̱ bhūrṇa̍yaḥ
||15||ते हि ष्मा॑ व॒नुषो॒ नरो॒ऽभिमा॑तिं॒ कय॑स्य चित् । ति॒ग्मं न क्षोद॑: प्रति॒घ्नन्ति॒ भूर्ण॑यः
a̱yameka̍ i̱tthā pu̱rūru ca̍ṣṭe̱ vi vi̱śpati̍: | tasya̍ vra̱tānyanu̍ vaścarāmasi
||16||अ॒यमेक॑ इ॒त्था पु॒रूरु च॑ष्टे॒ वि वि॒श्पति॑: । तस्य॑ व्र॒तान्यनु॑ वश्चरामसि
anu̱ pūrvā̍ṇyo̱kyā̍ sāmrā̱jyasya̍ saścima | mi̱trasya̍ vra̱tā varu̍ṇasya dīrgha̱śrut
||17||अनु॒ पूर्वा॑ण्यो॒क्या॑ साम्रा॒ज्यस्य॑ सश्चिम । मि॒त्रस्य॑ व्र॒ता वरु॑णस्य दीर्घ॒श्रुत्
pari̱ yo ra̱śminā̍ di̱vo'ntā̍nma̱me pṛ̍thi̱vyāḥ | u̱bhe ā pa̍prau̱ roda̍sī mahi̱tvā
||18||परि॒ यो र॒श्मिना॑ दि॒वोऽन्ता॑न्म॒मे पृ॑थि॒व्याः । उ॒भे आ प॑प्रौ॒ रोद॑सी महि॒त्वा
udu̱ ṣya śa̍ra̱ṇe di̱vo jyoti̍rayaṃsta̱ sūrya̍: | a̱gnirna śu̱kraḥ sa̍midhā̱na āhu̍taḥ
||19||उदु॒ ष्य श॑र॒णे दि॒वो ज्योति॑रयंस्त॒ सूर्य॑: । अ॒ग्निर्न शु॒क्रः स॑मिधा॒न आहु॑तः
vaco̍ dī̱rghapra̍sadma̱nīśe̱ vāja̍sya̱ goma̍taḥ | īśe̱ hi pi̱tvo̍'vi̱ṣasya̍ dā̱vane̍
||20||वचो॑ दी॒र्घप्र॑सद्म॒नीशे॒ वाज॑स्य॒ गोम॑तः । ईशे॒ हि पि॒त्वो॑ऽवि॒षस्य॑ दा॒वने॑
tatsūrya̱ṃ roda̍sī u̱bhe do̱ṣā vasto̱rupa̍ bruve | bho̱jeṣva̱smām̐ a̱bhyucca̍rā̱ sadā̍
||21||तत्सूर्यं॒ रोद॑सी उ॒भे दो॒षा वस्तो॒रुप॑ ब्रुवे । भो॒जेष्व॒स्माँ अ॒भ्युच्च॑रा॒ सदा॑
ṛ̱jramu̍kṣa̱ṇyāya̍ne raja̱taṃ hara̍yāṇe | ratha̍ṃ yu̱ktama̍sanāma su̱ṣāma̍ṇi
||22||ऋ॒ज्रमु॑क्ष॒ण्याय॑ने रज॒तं हर॑याणे । रथं॑ यु॒क्तम॑सनाम सु॒षाम॑णि
tā me̱ aśvyā̍nā̱ṃ harī̍ṇāṃ ni̱tośa̍nā | u̱to nu kṛtvyā̍nāṃ nṛ̱vāha̍sā
||23||ता मे॒ अश्व्या॑नां॒ हरी॑णां नि॒तोश॑ना । उ॒तो नु कृत्व्या॑नां नृ॒वाह॑सा
smada̍bhīśū̱ kaśā̍vantā̱ viprā̱ navi̍ṣṭhayā ma̱tī | ma̱ho vā̱jinā̱varva̍ntā̱ sacā̍sanam
||24||स्मद॑भीशू॒ कशा॑वन्ता॒ विप्रा॒ नवि॑ष्ठया म॒ती । म॒हो वा॒जिना॒वर्व॑न्ता॒ सचा॑सनम्