Sūktam 14 — yadindrāha (15 mantras) — Śākala Saṃhitā (Ṛgveda)

Study

yadi̍ndrā̱haṃ yathā̱ tvamīśī̍ya̱ vasva̱ eka̱ it | sto̱tā me̱ goṣa̍khā syāt

||1||

यदि॑न्द्रा॒हं यथा॒ त्वमीशी॑य॒ वस्व॒ एक॒ इत् । स्तो॒ता मे॒ गोष॑खा स्यात्

śikṣe̍yamasmai̱ ditse̍ya̱ṃ śacī̍pate manī̱ṣiṇe̍ | yada̱haṃ gopa̍ti̱: syām

||2||

शिक्षे॑यमस्मै॒ दित्से॑यं॒ शची॑पते मनी॒षिणे॑ । यद॒हं गोप॑ति॒: स्याम्

dhe̱nuṣṭa̍ indra sū̱nṛtā̱ yaja̍mānāya sunva̱te | gāmaśva̍ṃ pi̱pyuṣī̍ duhe

||3||

धे॒नुष्ट॑ इन्द्र सू॒नृता॒ यज॑मानाय सुन्व॒ते । गामश्वं॑ पि॒प्युषी॑ दुहे

na te̍ va̱rtāsti̱ rādha̍sa̱ indra̍ de̱vo na martya̍: | yadditsa̍si stu̱to ma̱gham

||4||

न ते॑ व॒र्तास्ति॒ राध॑स॒ इन्द्र॑ दे॒वो न मर्त्य॑: । यद्दित्स॑सि स्तु॒तो म॒घम्

ya̱jña indra̍mavardhaya̱dyadbhūmi̱ṃ vyava̍rtayat | ca̱krā̱ṇa o̍pa̱śaṃ di̱vi

||5||

य॒ज्ञ इन्द्र॑मवर्धय॒द्यद्भूमिं॒ व्यव॑र्तयत् । च॒क्रा॒ण ओ॑प॒शं दि॒वि

vā̱vṛ̱dhā̱nasya̍ te va̱yaṃ viśvā̱ dhanā̍ni ji̱gyuṣa̍: | ū̱timi̱ndrā vṛ̍ṇīmahe

||6||

वा॒वृ॒धा॒नस्य॑ ते व॒यं विश्वा॒ धना॑नि जि॒ग्युष॑: । ऊ॒तिमि॒न्द्रा वृ॑णीमहे

vya1ntari̍kṣamatira̱nmade̱ soma̍sya roca̱nā | indro̱ yadabhi̍nadva̱lam

||7||

व्य१न्तरि॑क्षमतिर॒न्मदे॒ सोम॑स्य रोच॒ना । इन्द्रो॒ यदभि॑नद्व॒लम्

udgā ā̍ja̱daṅgi̍robhya ā̱viṣkṛ̱ṇvanguhā̍ sa̱tīḥ | a̱rvāñca̍ṃ nunude va̱lam

||8||

उद्गा आ॑ज॒दङ्गि॑रोभ्य आ॒विष्कृ॒ण्वन्गुहा॑ स॒तीः । अ॒र्वाञ्चं॑ नुनुदे व॒लम्

indre̍ṇa roca̱nā di̱vo dṛ̱l̤hāni̍ dṛṃhi̱tāni̍ ca | sthi̱rāṇi̱ na pa̍rā̱ṇude̍

||9||

इन्द्रे॑ण रोच॒ना दि॒वो दृ॒ळ्हानि॑ दृंहि॒तानि॑ च । स्थि॒राणि॒ न प॑रा॒णुदे॑

a̱pāmū̱rmirmada̍nniva̱ stoma̍ indrājirāyate | vi te̱ madā̍ arājiṣuḥ

||10||

अ॒पामू॒र्मिर्मद॑न्निव॒ स्तोम॑ इन्द्राजिरायते । वि ते॒ मदा॑ अराजिषुः

tvaṃ hi sto̍ma̱vardha̍na̱ indrāsyu̍ktha̱vardha̍naḥ | sto̱tṝ̱ṇāmu̱ta bha̍dra̱kṛt

||11||

त्वं हि स्तो॑म॒वर्ध॑न॒ इन्द्रास्यु॑क्थ॒वर्ध॑नः । स्तो॒तॄ॒णामु॒त भ॑द्र॒कृत्

indra̱mitke̱śinā̱ harī̍ soma̱peyā̍ya vakṣataḥ | upa̍ ya̱jñaṃ su̱rādha̍sam

||12||

इन्द्र॒मित्के॒शिना॒ हरी॑ सोम॒पेया॑य वक्षतः । उप॑ य॒ज्ञं सु॒राध॑सम्

a̱pāṃ phene̍na̱ namu̍ce̱: śira̍ i̱ndroda̍vartayaḥ | viśvā̱ yadaja̍ya̱: spṛdha̍:

||13||

अ॒पां फेने॑न॒ नमु॑चे॒: शिर॑ इ॒न्द्रोद॑वर्तयः । विश्वा॒ यदज॑य॒: स्पृध॑:

mā̱yābhi̍ru̱tsisṛ̍psata̱ indra̱ dyāmā̱ruru̍kṣataḥ | ava̱ dasyū̍m̐radhūnuthāḥ

||14||

मा॒याभि॑रु॒त्सिसृ॑प्सत॒ इन्द्र॒ द्यामा॒रुरु॑क्षतः । अव॒ दस्यूँ॑रधूनुथाः

a̱su̱nvāmi̍ndra sa̱ṃsada̱ṃ viṣū̍cī̱ṃ vya̍nāśayaḥ | so̱ma̱pā utta̍ro̱ bhava̍n

||15||

अ॒सु॒न्वामि॑न्द्र सं॒सदं॒ विषू॑चीं॒ व्य॑नाशयः । सो॒म॒पा उत्त॑रो॒ भव॑न्