Study
- Anukramaṇī
- Source
16 virūpa āṅgirasa: |agni: | gāyatrī |
yu̱kṣvā hi de̍va̱hūta̍mā̱m̐ aśvā̍m̐ agne ra̱thīri̍va | ni hotā̍ pū̱rvyaḥ sa̍daḥ
||1||यु॒क्ष्वा हि दे॑व॒हूत॑माँ॒ अश्वाँ॑ अग्ने र॒थीरि॑व । नि होता॑ पू॒र्व्यः स॑दः
u̱ta no̍ deva de̱vām̐ acchā̍ voco vi̱duṣṭa̍raḥ | śradviśvā̱ vāryā̍ kṛdhi
||2||उ॒त नो॑ देव दे॒वाँ अच्छा॑ वोचो वि॒दुष्ट॑रः । श्रद्विश्वा॒ वार्या॑ कृधि
tvaṃ ha̱ yadya̍viṣṭhya̱ saha̍saḥ sūnavāhuta | ṛ̱tāvā̍ ya̱jñiyo̱ bhuva̍:
||3||त्वं ह॒ यद्य॑विष्ठ्य॒ सह॑सः सूनवाहुत । ऋ॒तावा॑ य॒ज्ञियो॒ भुव॑:
a̱yama̱gniḥ sa̍ha̱sriṇo̱ vāja̍sya śa̱tina̱spati̍: | mū̱rdhā ka̱vī ra̍yī̱ṇām
||4||अ॒यम॒ग्निः स॑ह॒स्रिणो॒ वाज॑स्य श॒तिन॒स्पति॑: । मू॒र्धा क॒वी र॑यी॒णाम्
taṃ ne̱mimṛ̱bhavo̍ ya̱thā ''na̍masva̱ sahū̍tibhiḥ | nedī̍yo ya̱jñama̍ṅgiraḥ
||5||तं ने॒मिमृ॒भवो॑ य॒था ऽऽन॑मस्व॒ सहू॑तिभिः । नेदी॑यो य॒ज्ञम॑ङ्गिरः
tasmai̍ nū̱nama̱bhidya̍ve vā̱cā vi̍rūpa̱ nitya̍yā | vṛṣṇe̍ codasva suṣṭu̱tim
||6||तस्मै॑ नू॒नम॒भिद्य॑वे वा॒चा वि॑रूप॒ नित्य॑या । वृष्णे॑ चोदस्व सुष्टु॒तिम्
kamu̍ ṣvidasya̱ sena̍yā̱gnerapā̍kacakṣasaḥ | pa̱ṇiṃ goṣu̍ starāmahe
||7||कमु॑ ष्विदस्य॒ सेन॑या॒ग्नेरपा॑कचक्षसः । प॒णिं गोषु॑ स्तरामहे
mā no̍ de̱vānā̱ṃ viśa̍: prasnā̱tīri̍vo̱srāḥ | kṛ̱śaṃ na hā̍su̱raghnyā̍:
||8||मा नो॑ दे॒वानां॒ विश॑: प्रस्ना॒तीरि॑वो॒स्राः । कृ॒शं न हा॑सु॒रघ्न्या॑:
mā na̍: samasya dū̱ḍhya1: pari̍dveṣaso aṃha̱tiḥ | ū̱rmirna nāva̱mā va̍dhīt
||9||मा न॑: समस्य दू॒ढ्य१: परि॑द्वेषसो अंह॒तिः । ऊ॒र्मिर्न नाव॒मा व॑धीत्
nama̍ste agna̱ oja̍se gṛ̱ṇanti̍ deva kṛ̱ṣṭaya̍: | amai̍ra̱mitra̍mardaya
||10||नम॑स्ते अग्न॒ ओज॑से गृ॒णन्ति॑ देव कृ॒ष्टय॑: । अमै॑र॒मित्र॑मर्दय
ku̱vitsu no̱ gavi̍ṣṭa̱ye'gne̍ sa̱ṃveṣi̍ṣo ra̱yim | uru̍kṛdu̱ru ṇa̍skṛdhi
||11||कु॒वित्सु नो॒ गवि॑ष्ट॒येऽग्ने॑ सं॒वेषि॑षो र॒यिम् । उरु॑कृदु॒रु ण॑स्कृधि
mā no̍ a̱sminma̍hādha̱ne parā̍ vargbhāra̱bhṛdya̍thā | sa̱ṃvarga̱ṃ saṃ ra̱yiṃ ja̍ya
||12||मा नो॑ अ॒स्मिन्म॑हाध॒ने परा॑ वर्ग्भार॒भृद्य॑था । सं॒वर्गं॒ सं र॒यिं ज॑य
a̱nyama̱smadbhi̱yā i̱yamagne̱ siṣa̍ktu du̱cchunā̍ | vardhā̍ no̱ ama̍va̱cchava̍:
||13||अ॒न्यम॒स्मद्भि॒या इ॒यमग्ने॒ सिष॑क्तु दु॒च्छुना॑ । वर्धा॑ नो॒ अम॑व॒च्छव॑:
yasyāju̍ṣannama̱svina̱: śamī̱madu̍rmakhasya vā | taṃ gheda̱gnirvṛ̱dhāva̍ti
||14||यस्याजु॑षन्नम॒स्विन॒: शमी॒मदु॑र्मखस्य वा । तं घेद॒ग्निर्वृ॒धाव॑ति
para̍syā̱ adhi̍ sa̱ṃvato'va̍rām̐ a̱bhyā ta̍ra | yatrā̱hamasmi̱ tām̐ a̍va
||15||पर॑स्या॒ अधि॑ सं॒वतोऽव॑राँ अ॒भ्या त॑र । यत्रा॒हमस्मि॒ ताँ अ॑व
vi̱dmā hi te̍ pu̱rā va̱yamagne̍ pi̱turyathāva̍saḥ | adhā̍ te su̱mnamī̍mahe
||16||वि॒द्मा हि ते॑ पु॒रा व॒यमग्ने॑ पि॒तुर्यथाव॑सः । अधा॑ ते सु॒म्नमी॑महे