Study
- Anukramaṇī
- Source
9 kṛṣṇa āṅgirasa: | aśvinau |gāyatrī |
ā me̱ hava̍ṃ nāsa̱tyā'śvi̍nā̱ gaccha̍taṃ yu̱vam | madhva̱: soma̍sya pī̱taye̍
||1||आ मे॒ हवं॑ नास॒त्याऽश्वि॑ना॒ गच्छ॑तं यु॒वम् । मध्व॒: सोम॑स्य पी॒तये॑
i̱maṃ me̱ stoma̍maśvine̱maṃ me̍ śṛṇuta̱ṃ hava̍m | madhva̱: soma̍sya pī̱taye̍
||2||इ॒मं मे॒ स्तोम॑मश्विने॒मं मे॑ शृणुतं॒ हव॑म् । मध्व॒: सोम॑स्य पी॒तये॑
a̱yaṃ vā̱ṃ kṛṣṇo̍ aśvinā̱ hava̍te vājinīvasū | madhva̱: soma̍sya pī̱taye̍
||3||अ॒यं वां॒ कृष्णो॑ अश्विना॒ हव॑ते वाजिनीवसू । मध्व॒: सोम॑स्य पी॒तये॑
śṛ̱ṇu̱taṃ ja̍ri̱turhava̱ṃ kṛṣṇa̍sya stuva̱to na̍rā | madhva̱: soma̍sya pī̱taye̍
||4||शृ॒णु॒तं ज॑रि॒तुर्हवं॒ कृष्ण॑स्य स्तुव॒तो न॑रा । मध्व॒: सोम॑स्य पी॒तये॑
cha̱rdirya̍nta̱madā̍bhya̱ṃ viprā̍ya stuva̱te na̍rā | madhva̱: soma̍sya pī̱taye̍
||5||छ॒र्दिर्य॑न्त॒मदा॑भ्यं॒ विप्रा॑य स्तुव॒ते न॑रा । मध्व॒: सोम॑स्य पी॒तये॑
gaccha̍taṃ dā̱śuṣo̍ gṛ̱hami̱tthā stu̍va̱to a̍śvinā | madhva̱: soma̍sya pī̱taye̍
||6||गच्छ॑तं दा॒शुषो॑ गृ॒हमि॒त्था स्तु॑व॒तो अ॑श्विना । मध्व॒: सोम॑स्य पी॒तये॑
yu̱ñjāthā̱ṃ rāsa̍bha̱ṃ rathe̍ vī̱ḍva̍ṅge vṛṣaṇvasū | madhva̱: soma̍sya pī̱taye̍
||7||यु॒ञ्जाथां॒ रास॑भं॒ रथे॑ वी॒ड्व॑ङ्गे वृषण्वसू । मध्व॒: सोम॑स्य पी॒तये॑
tri̱va̱ndhu̱reṇa̍ tri̱vṛtā̱ rathe̱nā yā̍tamaśvinā | madhva̱: soma̍sya pī̱taye̍
||8||त्रि॒व॒न्धु॒रेण॑ त्रि॒वृता॒ रथे॒ना या॑तमश्विना । मध्व॒: सोम॑स्य पी॒तये॑
nū me̱ giro̍ nāsa̱tyā'śvi̍nā̱ prāva̍taṃ yu̱vam | madhva̱: soma̍sya pī̱taye̍
||9||नू मे॒ गिरो॑ नास॒त्याऽश्वि॑ना॒ प्राव॑तं यु॒वम् । मध्व॒: सोम॑स्य पी॒तये॑