Study
- Anukramaṇī
- Source
18 priyamedha āṅgirasa: | indra:, 11 ( ardharcasya ) viśve devā :, 11 ( uttarārdhasya ) – 12 varuṇa: | anuṣṭup , 2 uṣṇik ,4-6 gāyatrī , 11,16 paṃkti:, 17- 18 bṛhatī |
prapra̍ vastri̱ṣṭubha̱miṣa̍ṃ ma̱ndadvī̍rā̱yenda̍ve | dhi̱yā vo̍ me̱dhasā̍taye̱ pura̱ṃdhyā vi̍vāsati
||1||प्रप्र॑ वस्त्रि॒ष्टुभ॒मिषं॑ म॒न्दद्वी॑रा॒येन्द॑वे । धि॒या वो॑ मे॒धसा॑तये॒ पुरं॒ध्या वि॑वासति
na̱daṃ va̱ oda̍tīnāṃ na̱daṃ yoyu̍vatīnām | pati̍ṃ vo̱ aghnyā̍nāṃ dhenū̱nāmi̍ṣudhyasi
||2||न॒दं व॒ ओद॑तीनां न॒दं योयु॑वतीनाम् । पतिं॑ वो॒ अघ्न्या॑नां धेनू॒नामि॑षुध्यसि
tā a̍sya̱ sūda̍dohasa̱: soma̍ṃ śrīṇanti̱ pṛśna̍yaḥ | janma̍nde̱vānā̱ṃ viśa̍stri̱ṣvā ro̍ca̱ne di̱vaḥ
||3||ता अ॑स्य॒ सूद॑दोहस॒: सोमं॑ श्रीणन्ति॒ पृश्न॑यः । जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः
a̱bhi pra gopa̍tiṃ gi̱rendra̍marca̱ yathā̍ vi̱de | sū̱nuṃ sa̱tyasya̱ satpa̍tim
||4||अ॒भि प्र गोप॑तिं गि॒रेन्द्र॑मर्च॒ यथा॑ वि॒दे । सू॒नुं स॒त्यस्य॒ सत्प॑तिम्
ā hara̍yaḥ sasṛjri̱re'ru̍ṣī̱radhi̍ ba̱rhiṣi̍ | yatrā̱bhi sa̱ṃnavā̍mahe
||5||आ हर॑यः ससृज्रि॒रेऽरु॑षी॒रधि॑ ब॒र्हिषि॑ । यत्रा॒भि सं॒नवा॑महे
indrā̍ya̱ gāva̍ ā̱śira̍ṃ dudu̱hre va̱jriṇe̱ madhu̍ | yatsī̍mupahva̱re vi̱dat
||6||इन्द्रा॑य॒ गाव॑ आ॒शिरं॑ दुदु॒ह्रे व॒ज्रिणे॒ मधु॑ । यत्सी॑मुपह्व॒रे वि॒दत्
udyadbra̱dhnasya̍ vi̱ṣṭapa̍ṃ gṛ̱hamindra̍śca̱ ganva̍hi | madhva̍: pī̱tvā sa̍cevahi̱ triḥ sa̱pta sakhyu̍: pa̱de
||7||उद्यद्ब्र॒ध्नस्य॑ वि॒ष्टपं॑ गृ॒हमिन्द्र॑श्च॒ गन्व॑हि । मध्व॑: पी॒त्वा स॑चेवहि॒ त्रिः स॒प्त सख्यु॑: प॒दे
arca̍ta̱ prārca̍ta̱ priya̍medhāso̱ arca̍ta | arca̍ntu putra̱kā u̱ta pura̱ṃ na dhṛ̱ṣṇva̍rcata
||8||अर्च॑त॒ प्रार्च॑त॒ प्रिय॑मेधासो॒ अर्च॑त । अर्च॑न्तु पुत्र॒का उ॒त पुरं॒ न धृ॒ष्ण्व॑र्चत
ava̍ svarāti̱ garga̍ro go̱dhā pari̍ saniṣvaṇat | piṅgā̱ pari̍ caniṣkada̱dindrā̍ya̱ brahmodya̍tam
||9||अव॑ स्वराति॒ गर्ग॑रो गो॒धा परि॑ सनिष्वणत् । पिङ्गा॒ परि॑ चनिष्कद॒दिन्द्रा॑य॒ ब्रह्मोद्य॑तम्
ā yatpata̍ntye̱nya̍: su̱dughā̱ ana̍pasphuraḥ | a̱pa̱sphura̍ṃ gṛbhāyata̱ soma̱mindrā̍ya̱ pāta̍ve
||10||आ यत्पत॑न्त्ये॒न्य॑: सु॒दुघा॒ अन॑पस्फुरः । अ॒प॒स्फुरं॑ गृभायत॒ सोम॒मिन्द्रा॑य॒ पात॑वे
apā̱dindro̱ apā̍da̱gnirviśve̍ de̱vā a̍matsata | varu̍ṇa̱ idi̱ha kṣa̍ya̱ttamāpo̍ a̱bhya̍nūṣata va̱tsaṃ sa̱ṃśiśva̍rīriva
||11||अपा॒दिन्द्रो॒ अपा॑द॒ग्निर्विश्वे॑ दे॒वा अ॑मत्सत । वरु॑ण॒ इदि॒ह क्ष॑य॒त्तमापो॑ अ॒भ्य॑नूषत व॒त्सं सं॒शिश्व॑रीरिव
su̱de̱vo a̍si varuṇa̱ yasya̍ te sa̱pta sindha̍vaḥ | a̱nu̱kṣara̍nti kā̱kuda̍ṃ sū̱rmya̍ṃ suṣi̱rāmi̍va
||12||सु॒दे॒वो अ॑सि वरुण॒ यस्य॑ ते स॒प्त सिन्ध॑वः । अ॒नु॒क्षर॑न्ति का॒कुदं॑ सू॒र्म्यं॑ सुषि॒रामि॑व
yo vyatī̱m̐raphā̍ṇaya̱tsuyu̍ktā̱m̐ upa̍ dā̱śuṣe̍ | ta̱kvo ne̱tā tadidvapu̍rupa̱mā yo amu̍cyata
||13||यो व्यतीँ॒रफा॑णय॒त्सुयु॑क्ताँ॒ उप॑ दा॒शुषे॑ । त॒क्वो ने॒ता तदिद्वपु॑रुप॒मा यो अमु॑च्यत
atīdu̍ śa̱kra o̍hata̱ indro̱ viśvā̱ ati̱ dviṣa̍: | bhi̱natka̱nīna̍ oda̱naṃ pa̱cyamā̍naṃ pa̱ro gi̱rā
||14||अतीदु॑ श॒क्र ओ॑हत॒ इन्द्रो॒ विश्वा॒ अति॒ द्विष॑: । भि॒नत्क॒नीन॑ ओद॒नं प॒च्यमा॑नं प॒रो गि॒रा
a̱rbha̱ko na ku̍māra̱ko'dhi̍ tiṣṭha̱nnava̱ṃ ratha̍m | sa pa̍kṣanmahi̱ṣaṃ mṛ̱gaṃ pi̱tre mā̱tre vi̍bhu̱kratu̍m
||15||अ॒र्भ॒को न कु॑मार॒कोऽधि॑ तिष्ठ॒न्नवं॒ रथ॑म् । स प॑क्षन्महि॒षं मृ॒गं पि॒त्रे मा॒त्रे वि॑भु॒क्रतु॑म्
ā tū su̍śipra dampate̱ ratha̍ṃ tiṣṭhā hira̱ṇyaya̍m | adha̍ dyu̱kṣaṃ sa̍cevahi sa̱hasra̍pādamaru̱ṣaṃ sva̍sti̱gāma̍ne̱hasa̍m
||16||आ तू सु॑शिप्र दम्पते॒ रथं॑ तिष्ठा हिर॒ण्यय॑म् । अध॑ द्यु॒क्षं स॑चेवहि स॒हस्र॑पादमरु॒षं स्व॑स्ति॒गाम॑ने॒हस॑म्
taṃ ghe̍mi̱tthā na̍ma̱svina̱ upa̍ sva̱rāja̍māsate | artha̍ṃ cidasya̱ sudhi̍ta̱ṃ yadeta̍va āva̱rtaya̍nti dā̱vane̍
||17||तं घे॑मि॒त्था न॑म॒स्विन॒ उप॑ स्व॒राज॑मासते । अर्थं॑ चिदस्य॒ सुधि॑तं॒ यदेत॑व आव॒र्तय॑न्ति दा॒वने॑
anu̍ pra̱tnasyauka̍saḥ pri̱yame̍dhāsa eṣām | pūrvā̱manu̱ praya̍tiṃ vṛ̱ktaba̍rhiṣo hi̱tapra̍yasa āśata
||18||अनु॑ प्र॒त्नस्यौक॑सः प्रि॒यमे॑धास एषाम् । पूर्वा॒मनु॒ प्रय॑तिं वृ॒क्तब॑र्हिषो हि॒तप्र॑यस आशत