Study
- Anukramaṇī
- Source
12 nābhāka: kāṇva:| indrāgnī | mahāpaṃkti:, 2 śakvarī ,12 triṣṭup |
indrā̍gnī yu̱vaṃ su na̱: saha̍ntā̱ dāsa̍tho ra̱yim |
yena̍ dṛ̱l̤hā sa̱matsvā vī̱l̤u ci̍tsāhiṣī̱mahya̱gnirvane̍va̱ vāta̱ innabha̍ntāmanya̱ke sa̍me
||1||इन्द्रा॑ग्नी यु॒वं सु न॒: सह॑न्ता॒ दास॑थो र॒यिम् ।
येन॑ दृ॒ळ्हा स॒मत्स्वा वी॒ळु चि॑त्साहिषी॒मह्य॒ग्निर्वने॑व॒ वात॒ इन्नभ॑न्तामन्य॒के स॑मे
na̱hi vā̍ṃ va̱vrayā̍ma̱he'thendra̱midya̍jāmahe̱ śavi̍ṣṭhaṃ nṛ̱ṇāṃ nara̍m |
sa na̍: ka̱dā ci̱darva̍tā̱ gama̱dā vāja̍sātaye̱ gama̱dā me̱dhasā̍taye̱ nabha̍ntāmanya̱ke sa̍me
||2||न॒हि वां॑ व॒व्रया॑म॒हेऽथेन्द्र॒मिद्य॑जामहे॒ शवि॑ष्ठं नृ॒णां नर॑म् ।
स न॑: क॒दा चि॒दर्व॑ता॒ गम॒दा वाज॑सातये॒ गम॒दा मे॒धसा॑तये॒ नभ॑न्तामन्य॒के स॑मे
tā hi madhya̱ṃ bharā̍ṇāmindrā̱gnī a̍dhikṣi̱taḥ |
tā u̍ kavitva̱nā ka̱vī pṛ̱cchyamā̍nā sakhīya̱te saṃ dhī̱tama̍śnutaṃ narā̱ nabha̍ntāmanya̱ke sa̍me
||3||ता हि मध्यं॒ भरा॑णामिन्द्रा॒ग्नी अ॑धिक्षि॒तः ।
ता उ॑ कवित्व॒ना क॒वी पृ॒च्छ्यमा॑ना सखीय॒ते सं धी॒तम॑श्नुतं नरा॒ नभ॑न्तामन्य॒के स॑मे
a̱bhya̍rca nabhāka̱vadi̍ndrā̱gnī ya̱jasā̍ gi̱rā |
yayo̱rviśva̍mi̱daṃ jaga̍di̱yaṃ dyauḥ pṛ̍thi̱vī ma̱hyu1pasthe̍ bibhṛ̱to vasu̱ nabha̍ntāmanya̱ke sa̍me
||4||अ॒भ्य॑र्च नभाक॒वदि॑न्द्रा॒ग्नी य॒जसा॑ गि॒रा ।
ययो॒र्विश्व॑मि॒दं जग॑दि॒यं द्यौः पृ॑थि॒वी म॒ह्यु१पस्थे॑ बिभृ॒तो वसु॒ नभ॑न्तामन्य॒के स॑मे
pra brahmā̍ṇi nabhāka̱vadi̍ndrā̱gnibhyā̍mirajyata |
yā sa̱ptabu̍dhnamarṇa̱vaṃ ji̱hmabā̍ramaporṇu̱ta indra̱ īśā̍na̱ oja̍sā̱ nabha̍ntāmanya̱ke sa̍me
||5||प्र ब्रह्मा॑णि नभाक॒वदि॑न्द्रा॒ग्निभ्या॑मिरज्यत ।
या स॒प्तबु॑ध्नमर्ण॒वं जि॒ह्मबा॑रमपोर्णु॒त इन्द्र॒ ईशा॑न॒ ओज॑सा॒ नभ॑न्तामन्य॒के स॑मे
api̍ vṛśca purāṇa̱vadvra̱tate̍riva guṣpi̱tamojo̍ dā̱sasya̍ dambhaya |
va̱yaṃ tada̍sya̱ sambhṛ̍ta̱ṃ vasvindre̍ṇa̱ vi bha̍jemahi̱ nabha̍ntāmanya̱ke sa̍me
||6||अपि॑ वृश्च पुराण॒वद्व्र॒तते॑रिव गुष्पि॒तमोजो॑ दा॒सस्य॑ दम्भय ।
व॒यं तद॑स्य॒ सम्भृ॑तं॒ वस्विन्द्रे॑ण॒ वि भ॑जेमहि॒ नभ॑न्तामन्य॒के स॑मे
yadi̍ndrā̱gnī janā̍ i̱me vi̱hvaya̍nte̱ tanā̍ gi̱rā |
a̱smāke̍bhi̱rnṛbhi̍rva̱yaṃ sā̍sa̱hyāma̍ pṛtanya̱to va̍nu̱yāma̍ vanuṣya̱to nabha̍ntāmanya̱ke sa̍me
||7||यदि॑न्द्रा॒ग्नी जना॑ इ॒मे वि॒ह्वय॑न्ते॒ तना॑ गि॒रा ।
अ॒स्माके॑भि॒र्नृभि॑र्व॒यं सा॑स॒ह्याम॑ पृतन्य॒तो व॑नु॒याम॑ वनुष्य॒तो नभ॑न्तामन्य॒के स॑मे
yā nu śve̱tāva̱vo di̱va u̱ccarā̍ta̱ upa̱ dyubhi̍: |
i̱ndrā̱gnyoranu̍ vra̱tamuhā̍nā yanti̱ sindha̍vo̱ yāntsī̍ṃ ba̱ndhādamu̍ñcatā̱ṃ nabha̍ntāmanya̱ke sa̍me
||8||या नु श्वे॒ताव॒वो दि॒व उ॒च्चरा॑त॒ उप॒ द्युभि॑: ।
इ॒न्द्रा॒ग्न्योरनु॑ व्र॒तमुहा॑ना यन्ति॒ सिन्ध॑वो॒ यान्त्सीं॑ ब॒न्धादमु॑ञ्चतां॒ नभ॑न्तामन्य॒के स॑मे
pū̱rvīṣṭa̍ i̱ndropa̍mātayaḥ pū̱rvīru̱ta praśa̍staya̱: sūno̍ hi̱nvasya̍ harivaḥ |
vasvo̍ vī̱rasyā̱pṛco̱ yā nu sādha̍nta no̱ dhiyo̱ nabha̍ntāmanya̱ke sa̍me
||9||पू॒र्वीष्ट॑ इ॒न्द्रोप॑मातयः पू॒र्वीरु॒त प्रश॑स्तय॒: सूनो॑ हि॒न्वस्य॑ हरिवः ।
वस्वो॑ वी॒रस्या॒पृचो॒ या नु साध॑न्त नो॒ धियो॒ नभ॑न्तामन्य॒के स॑मे
taṃ śi̍śītā suvṛ̱ktibhi̍stve̱ṣaṃ satvā̍namṛ̱gmiya̍m |
u̱to nu ci̱dya oja̍sā̱ śuṣṇa̍syā̱ṇḍāni̱ bheda̍ti̱ jeṣa̱tsva̍rvatīra̱po nabha̍ntāmanya̱ke sa̍me
||10||तं शि॑शीता सुवृ॒क्तिभि॑स्त्वे॒षं सत्वा॑नमृ॒ग्मिय॑म् ।
उ॒तो नु चि॒द्य ओज॑सा॒ शुष्ण॑स्या॒ण्डानि॒ भेद॑ति॒ जेष॒त्स्व॑र्वतीर॒पो नभ॑न्तामन्य॒के स॑मे
taṃ śi̍śītā svadhva̱raṃ sa̱tyaṃ satvā̍namṛ̱tviya̍m |
u̱to nu ci̱dya oha̍ta ā̱ṇḍā śuṣṇa̍sya̱ bheda̱tyajai̱: sva̍rvatīra̱po nabha̍ntāmanya̱ke sa̍me
||11||तं शि॑शीता स्वध्व॒रं स॒त्यं सत्वा॑नमृ॒त्विय॑म् ।
उ॒तो नु चि॒द्य ओह॑त आ॒ण्डा शुष्ण॑स्य॒ भेद॒त्यजै॒: स्व॑र्वतीर॒पो नभ॑न्तामन्य॒के स॑मे
e̱vendrā̱gnibhyā̍ṃ pitṛ̱vannavī̍yo mandhātṛ̱vada̍ṅgira̱svada̍vāci |
tri̱dhātu̍nā̱ śarma̍ṇā pātama̱smānva̱yaṃ syā̍ma̱ pata̍yo rayī̱ṇām
||12||ए॒वेन्द्रा॒ग्निभ्यां॑ पितृ॒वन्नवी॑यो मन्धातृ॒वद॑ङ्गिर॒स्वद॑वाचि ।
त्रि॒धातु॑ना॒ शर्म॑णा पातम॒स्मान्व॒यं स्या॑म॒ पत॑यो रयी॒णाम्