Study
- Anukramaṇī
- Source
12 nṛmedha āṅgirasa: | indra: | uṣṇik ; 7, 10-11 kakup ; 9,12 purauṣṇik |
indrā̍ya̱ sāma̍ gāyata̱ viprā̍ya bṛha̱te bṛ̱hat | dha̱rma̱kṛte̍ vipa̱ścite̍ pana̱syave̍
||1||इन्द्रा॑य॒ साम॑ गायत॒ विप्रा॑य बृह॒ते बृ॒हत् । ध॒र्म॒कृते॑ विप॒श्चिते॑ पन॒स्यवे॑
tvami̍ndrābhi̱bhūra̍si̱ tvaṃ sūrya̍marocayaḥ | vi̱śvaka̍rmā vi̱śvade̍vo ma̱hām̐ a̍si
||2||त्वमि॑न्द्राभि॒भूर॑सि॒ त्वं सूर्य॑मरोचयः । वि॒श्वक॑र्मा वि॒श्वदे॑वो म॒हाँ अ॑सि
vi̱bhrāja̱ñjyoti̍ṣā̱ sva1raga̍ccho roca̱naṃ di̱vaḥ | de̱vāsta̍ indra sa̱khyāya̍ yemire
||3||वि॒भ्राज॒ञ्ज्योति॑षा॒ स्व१रग॑च्छो रोच॒नं दि॒वः । दे॒वास्त॑ इन्द्र स॒ख्याय॑ येमिरे
endra̍ no gadhi pri̱yaḥ sa̍trā̱jidago̍hyaḥ | gi̱rirna vi̱śvata̍spṛ̱thuḥ pati̍rdi̱vaḥ
||4||एन्द्र॑ नो गधि प्रि॒यः स॑त्रा॒जिदगो॑ह्यः । गि॒रिर्न वि॒श्वत॑स्पृ॒थुः पति॑र्दि॒वः
a̱bhi hi sa̍tya somapā u̱bhe ba̱bhūtha̱ roda̍sī | indrāsi̍ sunva̱to vṛ̱dhaḥ pati̍rdi̱vaḥ
||5||अ॒भि हि स॑त्य सोमपा उ॒भे ब॒भूथ॒ रोद॑सी । इन्द्रासि॑ सुन्व॒तो वृ॒धः पति॑र्दि॒वः
tvaṃ hi śaśva̍tīnā̱mindra̍ da̱rtā pu̱rāmasi̍ | ha̱ntā dasyo̱rmano̍rvṛ̱dhaḥ pati̍rdi̱vaḥ
||6||त्वं हि शश्व॑तीना॒मिन्द्र॑ द॒र्ता पु॒रामसि॑ । ह॒न्ता दस्यो॒र्मनो॑र्वृ॒धः पति॑र्दि॒वः
adhā̱ hī̍ndra girvaṇa̱ upa̍ tvā̱ kāmā̍nma̱haḥ sa̍sṛ̱jmahe̍ | u̱deva̱ yanta̍ u̱dabhi̍:
||7||अधा॒ ही॑न्द्र गिर्वण॒ उप॑ त्वा॒ कामा॑न्म॒हः स॑सृ॒ज्महे॑ । उ॒देव॒ यन्त॑ उ॒दभि॑:
vārṇa tvā̍ ya̱vyābhi̱rvardha̍nti śūra̱ brahmā̍ṇi | vā̱vṛ̱dhvāṃsa̍ṃ cidadrivo di̱vedi̍ve
||8||वार्ण त्वा॑ य॒व्याभि॒र्वर्ध॑न्ति शूर॒ ब्रह्मा॑णि । वा॒वृ॒ध्वांसं॑ चिदद्रिवो दि॒वेदि॑वे
yu̱ñjanti̱ harī̍ iṣi̱rasya̱ gātha̍yo̱rau ratha̍ u̱ruyu̍ge | i̱ndra̱vāhā̍ vaco̱yujā̍
||9||यु॒ञ्जन्ति॒ हरी॑ इषि॒रस्य॒ गाथ॑यो॒रौ रथ॑ उ॒रुयु॑गे । इ॒न्द्र॒वाहा॑ वचो॒युजा॑
tvaṃ na̍ i̱ndrā bha̍ra̱m̐ ojo̍ nṛ̱mṇaṃ śa̍takrato vicarṣaṇe | ā vī̱raṃ pṛ̍tanā̱ṣaha̍m
||10||त्वं न॑ इ॒न्द्रा भ॑रँ॒ ओजो॑ नृ॒म्णं श॑तक्रतो विचर्षणे । आ वी॒रं पृ॑तना॒षह॑म्
tvaṃ hi na̍: pi̱tā va̍so̱ tvaṃ mā̱tā śa̍takrato ba̱bhūvi̍tha | adhā̍ te su̱mnamī̍mahe
||11||त्वं हि न॑: पि॒ता व॑सो॒ त्वं मा॒ता श॑तक्रतो ब॒भूवि॑थ । अधा॑ ते सु॒म्नमी॑महे
tvāṃ śu̍ṣminpuruhūta vāja̱yanta̱mupa̍ bruve śatakrato | sa no̍ rāsva su̱vīrya̍m
||12||त्वां शु॑ष्मिन्पुरुहूत वाज॒यन्त॒मुप॑ ब्रुवे शतक्रतो । स नो॑ रास्व सु॒वीर्य॑म्