Study
- Anukramaṇī
- Source
11 kurusuti: kāṇva:| indra: |gāyatrī, 10 -11 pragātha:= ( bṛhatī, satobṛhatī) |
ja̱jñā̱no nu śa̱takra̍tu̱rvi pṛ̍ccha̱diti̍ mā̱tara̍m | ka u̱grāḥ ke ha̍ śṛṇvire
||1||ज॒ज्ञा॒नो नु श॒तक्र॑तु॒र्वि पृ॑च्छ॒दिति॑ मा॒तर॑म् । क उ॒ग्राः के ह॑ शृण्विरे
ādī̍ṃ śava̱sya̍bravīdaurṇavā̱bhama̍hī̱śuva̍m | te pu̍tra santu ni̱ṣṭura̍:
||2||आदीं॑ शव॒स्य॑ब्रवीदौर्णवा॒भम॑ही॒शुव॑म् । ते पु॑त्र सन्तु नि॒ष्टुर॑:
samittānvṛ̍tra̱hākhi̍da̱tkhe a̱rām̐ i̍va̱ kheda̍yā | pravṛ̍ddho dasyu̱hābha̍vat
||3||समित्तान्वृ॑त्र॒हाखि॑द॒त्खे अ॒राँ इ॑व॒ खेद॑या । प्रवृ॑द्धो दस्यु॒हाभ॑वत्
eka̍yā prati̱dhāpi̍batsā̱kaṃ sarā̍ṃsi tri̱ṃśata̍m | indra̱: soma̍sya kāṇu̱kā
||4||एक॑या प्रति॒धापि॑बत्सा॒कं सरां॑सि त्रिं॒शत॑म् । इन्द्र॒: सोम॑स्य काणु॒का
a̱bhi ga̍ndha̱rvama̍tṛṇadabu̱dhneṣu̱ raja̱ssvā | indro̍ bra̱hmabhya̱ idvṛ̱dhe
||5||अ॒भि ग॑न्ध॒र्वम॑तृणदबु॒ध्नेषु॒ रज॒स्स्वा । इन्द्रो॑ ब्र॒ह्मभ्य॒ इद्वृ॒धे
nirā̍vidhyadgi̱ribhya̱ ā dhā̱raya̍tpa̱kvamo̍da̱nam | indro̍ bu̱ndaṃ svā̍tatam
||6||निरा॑विध्यद्गि॒रिभ्य॒ आ धा॒रय॑त्प॒क्वमो॑द॒नम् । इन्द्रो॑ बु॒न्दं स्वा॑ततम्
śa̱tabra̍dhna̱ iṣu̱stava̍ sa̱hasra̍parṇa̱ eka̱ it | yami̍ndra cakṛ̱ṣe yuja̍m
||7||श॒तब्र॑ध्न॒ इषु॒स्तव॑ स॒हस्र॑पर्ण॒ एक॒ इत् । यमि॑न्द्र चकृ॒षे युज॑म्
tena̍ sto̱tṛbhya̱ ā bha̍ra̱ nṛbhyo̱ nāri̍bhyo̱ atta̍ve | sa̱dyo jā̱ta ṛ̍bhuṣṭhira
||8||तेन॑ स्तो॒तृभ्य॒ आ भ॑र॒ नृभ्यो॒ नारि॑भ्यो॒ अत्त॑वे । स॒द्यो जा॒त ऋ॑भुष्ठिर
e̱tā cyau̱tnāni̍ te kṛ̱tā varṣi̍ṣṭhāni̱ parī̍ṇasā | hṛ̱dā vī̱ḍva̍dhārayaḥ
||9||ए॒ता च्यौ॒त्नानि॑ ते कृ॒ता वर्षि॑ष्ठानि॒ परी॑णसा । हृ॒दा वी॒ड्व॑धारयः
viśvettā viṣṇu̱rābha̍radurukra̱mastveṣi̍taḥ | śa̱taṃ ma̍hi̱ṣānkṣī̍rapā̱kamo̍da̱naṃ va̍rā̱hamindra̍ emu̱ṣam
||10||विश्वेत्ता विष्णु॒राभ॑रदुरुक्र॒मस्त्वेषि॑तः । श॒तं म॑हि॒षान्क्षी॑रपा॒कमो॑द॒नं व॑रा॒हमिन्द्र॑ एमु॒षम्
tu̱vi̱kṣaṃ te̱ sukṛ̍taṃ sū̱maya̱ṃ dhanu̍: sā̱dhurbu̱ndo hi̍ra̱ṇyaya̍: | u̱bhā te̍ bā̱hū raṇyā̱ susa̍ṃskṛta ṛdū̱pe ci̍dṛdū̱vṛdhā̍
||11||तु॒वि॒क्षं ते॒ सुकृ॑तं सू॒मयं॒ धनु॑: सा॒धुर्बु॒न्दो हि॑र॒ण्यय॑: । उ॒भा ते॑ बा॒हू रण्या॒ सुसं॑स्कृत ऋदू॒पे चि॑दृदू॒वृधा॑