Study
- Anukramaṇī
- Source
10 āyu: kāṇva:| indra: | pragātha:= ( viṣamā bṛhatī, samā satobṛhatī ) |
yathā̱ manau̱ viva̍svati̱ soma̍ṃ śa̱krāpi̍baḥ su̱tam | yathā̍ tri̱te chanda̍ indra̱ jujo̍ṣasyā̱yau mā̍dayase̱ sacā̍
||1||यथा॒ मनौ॒ विव॑स्वति॒ सोमं॑ श॒क्रापि॑बः सु॒तम् । यथा॑ त्रि॒ते छन्द॑ इन्द्र॒ जुजो॑षस्या॒यौ मा॑दयसे॒ सचा॑
pṛṣa̍dhre̱ medhye̍ māta̱riśva̱nīndra̍ suvā̱ne ama̍ndathāḥ | yathā̱ soma̱ṃ daśa̍śipre̱ daśo̍ṇye̱ syūma̍raśmā̱vṛjū̍nasi
||2||पृष॑ध्रे॒ मेध्ये॑ मात॒रिश्व॒नीन्द्र॑ सुवा॒ने अम॑न्दथाः । यथा॒ सोमं॒ दश॑शिप्रे॒ दशो॑ण्ये॒ स्यूम॑रश्मा॒वृजू॑नसि
ya u̱kthā keva̍lā da̱dhe yaḥ soma̍ṃ dhṛṣi̱tāpi̍bat | yasmai̱ viṣṇu̱strīṇi̍ pa̱dā vi̍cakra̱ma upa̍ mi̱trasya̱ dharma̍bhiḥ
||3||य उ॒क्था केव॑ला द॒धे यः सोमं॑ धृषि॒तापि॑बत् । यस्मै॒ विष्णु॒स्त्रीणि॑ प॒दा वि॑चक्र॒म उप॑ मि॒त्रस्य॒ धर्म॑भिः
yasya̱ tvami̍ndra̱ stome̍ṣu cā̱kano̱ vāje̍ vājiñchatakrato |
taṃ tvā̍ va̱yaṃ su̱dughā̍miva go̱duho̍ juhū̱masi̍ śrava̱syava̍:
||4||यस्य॒ त्वमि॑न्द्र॒ स्तोमे॑षु चा॒कनो॒ वाजे॑ वाजिञ्छतक्रतो ।
तं त्वा॑ व॒यं सु॒दुघा॑मिव गो॒दुहो॑ जुहू॒मसि॑ श्रव॒स्यव॑:
yo no̍ dā̱tā sa na̍: pi̱tā ma̱hām̐ u̱gra ī̍śāna̱kṛt | ayā̍mannu̱gro ma̱ghavā̍ purū̱vasu̱rgoraśva̍sya̱ pra dā̍tu naḥ
||5||यो नो॑ दा॒ता स न॑: पि॒ता म॒हाँ उ॒ग्र ई॑शान॒कृत् । अया॑मन्नु॒ग्रो म॒घवा॑ पुरू॒वसु॒र्गोरश्व॑स्य॒ प्र दा॑तु नः
yasmai̱ tvaṃ va̍so dā̱nāya̱ maṃha̍se̱ sa rā̱yaspoṣa̍minvati | va̱sū̱yavo̱ vasu̍patiṃ śa̱takra̍tu̱ṃ stomai̱rindra̍ṃ havāmahe
||6||यस्मै॒ त्वं व॑सो दा॒नाय॒ मंह॑से॒ स रा॒यस्पोष॑मिन्वति । व॒सू॒यवो॒ वसु॑पतिं श॒तक्र॑तुं॒ स्तोमै॒रिन्द्रं॑ हवामहे
ka̱dā ca̱na pra yu̍cchasyu̱bhe ni pā̍si̱ janma̍nī | turī̍yāditya̱ hava̍naṃ ta indri̱yamā ta̍sthāva̱mṛta̍ṃ di̱vi
||7||क॒दा च॒न प्र यु॑च्छस्यु॒भे नि पा॑सि॒ जन्म॑नी । तुरी॑यादित्य॒ हव॑नं त इन्द्रि॒यमा त॑स्थाव॒मृतं॑ दि॒वि
yasmai̱ tvaṃ ma̍ghavannindra girvaṇa̱: śikṣo̱ śikṣa̍si dā̱śuṣe̍ |
a̱smāka̱ṃ gira̍ u̱ta su̍ṣṭu̱tiṃ va̍so kaṇva̱vacchṛ̍ṇudhī̱ hava̍m
||8||यस्मै॒ त्वं म॑घवन्निन्द्र गिर्वण॒: शिक्षो॒ शिक्ष॑सि दा॒शुषे॑ ।
अ॒स्माकं॒ गिर॑ उ॒त सु॑ष्टु॒तिं व॑सो कण्व॒वच्छृ॑णुधी॒ हव॑म्
astā̍vi̱ manma̍ pū̱rvyaṃ brahmendrā̍ya vocata | pū̱rvīṝ̱tasya̍ bṛha̱tīra̍nūṣata sto̱turme̱dhā a̍sṛkṣata
||9||अस्ता॑वि॒ मन्म॑ पू॒र्व्यं ब्रह्मेन्द्रा॑य वोचत । पू॒र्वीॠ॒तस्य॑ बृह॒तीर॑नूषत स्तो॒तुर्मे॒धा अ॑सृक्षत
samindro̱ rāyo̍ bṛha̱tīra̍dhūnuta̱ saṃ kṣo̱ṇī samu̱ sūrya̍m |
saṃ śu̱krāsa̱: śuca̍ya̱: saṃ gavā̍śira̱: somā̱ indra̍mamandiṣuḥ
||10||समिन्द्रो॒ रायो॑ बृह॒तीर॑धूनुत॒ सं क्षो॒णी समु॒ सूर्य॑म् ।
सं शु॒क्रास॒: शुच॑य॒: सं गवा॑शिर॒: सोमा॒ इन्द्र॑ममन्दिषुः