Study
- Anukramaṇī
- Source
25 maitrāvaruṇirvasiṣṭha:| {rākṣoghnaṃ} indrāsomau , 8 ,16 ,19 -22 indra:, 9, 12-13 soma:, 10-14 agni:,11 devā:, 17 grāvāṇa:, 18 maruta:, 23 {pūrvārdhasya} vasiṣṭhāśī:, {uttarārdhasya} pṛthivyantarikṣe| triṣṭup , 1-6,18, 21 ,23 jagatī ; 7 jagatī triṣṭubvā, 25 anuṣṭup |
indrā̍somā̱ tapa̍ta̱ṃ rakṣa̍ u̱bjata̱ṃ nya̍rpayataṃ vṛṣaṇā tamo̱vṛdha̍: |
parā̍ śṛṇītama̱cito̱ nyo̍ṣataṃ ha̱taṃ nu̱dethā̱ṃ ni śi̍śītama̱triṇa̍:
||1||इन्द्रा॑सोमा॒ तप॑तं॒ रक्ष॑ उ॒ब्जतं॒ न्य॑र्पयतं वृषणा तमो॒वृध॑: ।
परा॑ शृणीतम॒चितो॒ न्यो॑षतं ह॒तं नु॒देथां॒ नि शि॑शीतम॒त्रिण॑:
indrā̍somā̱ sama̱ghaśa̍ṃsama̱bhya1ghaṃ tapu̍ryayastu ca̱rura̍gni̱vām̐ i̍va |
bra̱hma̱dviṣe̍ kra̱vyāde̍ gho̱raca̍kṣase̱ dveṣo̍ dhattamanavā̱yaṃ ki̍mī̱dine̍
||2||इन्द्रा॑सोमा॒ सम॒घशं॑सम॒भ्य१घं तपु॑र्ययस्तु च॒रुर॑ग्नि॒वाँ इ॑व ।
ब्र॒ह्म॒द्विषे॑ क्र॒व्यादे॑ घो॒रच॑क्षसे॒ द्वेषो॑ धत्तमनवा॒यं कि॑मी॒दिने॑
indrā̍somā du̱ṣkṛto̍ va̱vre a̱ntara̍nārambha̱ṇe tama̍si̱ pra vi̍dhyatam |
yathā̱ nāta̱: puna̱reka̍śca̱nodaya̱ttadvā̍mastu̱ saha̍se manyu̱macchava̍:
||3||इन्द्रा॑सोमा दु॒ष्कृतो॑ व॒व्रे अ॒न्तर॑नारम्भ॒णे तम॑सि॒ प्र वि॑ध्यतम् ।
यथा॒ नात॒: पुन॒रेक॑श्च॒नोदय॒त्तद्वा॑मस्तु॒ सह॑से मन्यु॒मच्छव॑:
indrā̍somā va̱rtaya̍taṃ di̱vo va̱dhaṃ saṃ pṛ̍thi̱vyā a̱ghaśa̍ṃsāya̱ tarha̍ṇam |
utta̍kṣataṃ sva̱ryaṃ1 parva̍tebhyo̱ yena̱ rakṣo̍ vāvṛdhā̱naṃ ni̱jūrva̍thaḥ
||4||इन्द्रा॑सोमा व॒र्तय॑तं दि॒वो व॒धं सं पृ॑थि॒व्या अ॒घशं॑साय॒ तर्ह॑णम् ।
उत्त॑क्षतं स्व॒र्यं१ पर्व॑तेभ्यो॒ येन॒ रक्षो॑ वावृधा॒नं नि॒जूर्व॑थः
indrā̍somā va̱rtaya̍taṃ di̱vasparya̍gnita̱ptebhi̍ryu̱vamaśma̍hanmabhiḥ |
tapu̍rvadhebhira̱jare̍bhira̱triṇo̱ ni parśā̍ne vidhyata̱ṃ yantu̍ nisva̱ram
||5||इन्द्रा॑सोमा व॒र्तय॑तं दि॒वस्पर्य॑ग्नित॒प्तेभि॑र्यु॒वमश्म॑हन्मभिः ।
तपु॑र्वधेभिर॒जरे॑भिर॒त्रिणो॒ नि पर्शा॑ने विध्यतं॒ यन्तु॑ निस्व॒रम्
indrā̍somā̱ pari̍ vāṃ bhūtu vi̱śvata̍ i̱yaṃ ma̱tiḥ ka̱kṣyāśve̍va vā̱jinā̍ |
yāṃ vā̱ṃ hotrā̍ṃ parihi̱nomi̍ me̱dhaye̱mā brahmā̍ṇi nṛ̱patī̍va jinvatam
||6||इन्द्रा॑सोमा॒ परि॑ वां भूतु वि॒श्वत॑ इ॒यं म॒तिः क॒क्ष्याश्वे॑व वा॒जिना॑ ।
यां वां॒ होत्रां॑ परिहि॒नोमि॑ मे॒धये॒मा ब्रह्मा॑णि नृ॒पती॑व जिन्वतम्
prati̍ smarethāṃ tu̱jaya̍dbhi̱revai̍rha̱taṃ dru̱ho ra̱kṣaso̍ bhaṅgu̱rāva̍taḥ |
indrā̍somā du̱ṣkṛte̱ mā su̱gaṃ bhū̱dyo na̍: ka̱dā ci̍dabhi̱dāsa̍ti dru̱hā
||7||प्रति॑ स्मरेथां तु॒जय॑द्भि॒रेवै॑र्ह॒तं द्रु॒हो र॒क्षसो॑ भङ्गु॒राव॑तः ।
इन्द्रा॑सोमा दु॒ष्कृते॒ मा सु॒गं भू॒द्यो न॑: क॒दा चि॑दभि॒दास॑ति द्रु॒हा
yo mā̱ pāke̍na̱ mana̍sā̱ cara̍ntamabhi̱caṣṭe̱ anṛ̍tebhi̱rvaco̍bhiḥ |
āpa̍ iva kā̱śinā̱ saṃgṛ̍bhītā̱ asa̍nna̱stvāsa̍ta indra va̱ktā
||8||यो मा॒ पाके॑न॒ मन॑सा॒ चर॑न्तमभि॒चष्टे॒ अनृ॑तेभि॒र्वचो॑भिः ।
आप॑ इव का॒शिना॒ संगृ॑भीता॒ अस॑न्न॒स्त्वास॑त इन्द्र व॒क्ता
ye pā̍kaśa̱ṃsaṃ vi̱hara̍nta̱ evai̱rye vā̍ bha̱draṃ dū̱ṣaya̍nti sva̱dhābhi̍: |
aha̍ye vā̱ tānpra̱dadā̍tu̱ soma̱ ā vā̍ dadhātu̱ niṝ̍teru̱pasthe̍
||9||ये पा॑कशं॒सं वि॒हर॑न्त॒ एवै॒र्ये वा॑ भ॒द्रं दू॒षय॑न्ति स्व॒धाभि॑: ।
अह॑ये वा॒ तान्प्र॒ददा॑तु॒ सोम॒ आ वा॑ दधातु॒ निॠ॑तेरु॒पस्थे॑
yo no̱ rasa̱ṃ dipsa̍ti pi̱tvo a̍gne̱ yo aśvā̍nā̱ṃ yo gavā̱ṃ yasta̱nūnā̍m |
ri̱puḥ ste̱naḥ ste̍ya̱kṛdda̱bhrame̍tu̱ ni ṣa hī̍yatāṃ ta̱nvā̱3 tanā̍ ca
||10||यो नो॒ रसं॒ दिप्स॑ति पि॒त्वो अ॑ग्ने॒ यो अश्वा॑नां॒ यो गवां॒ यस्त॒नूना॑म् ।
रि॒पुः स्ते॒नः स्ते॑य॒कृद्द॒भ्रमे॑तु॒ नि ष ही॑यतां त॒न्वा॒३ तना॑ च
pa̱raḥ so a̍stu ta̱nvā̱3 tanā̍ ca ti̱sraḥ pṛ̍thi̱vīra̱dho a̍stu̱ viśvā̍: |
prati̍ śuṣyatu̱ yaśo̍ asya devā̱ yo no̱ divā̱ dipsa̍ti̱ yaśca̱ nakta̍m
||11||प॒रः सो अ॑स्तु त॒न्वा॒३ तना॑ च ति॒स्रः पृ॑थि॒वीर॒धो अ॑स्तु॒ विश्वा॑: ।
प्रति॑ शुष्यतु॒ यशो॑ अस्य देवा॒ यो नो॒ दिवा॒ दिप्स॑ति॒ यश्च॒ नक्त॑म्
su̱vi̱jñā̱naṃ ci̍ki̱tuṣe̱ janā̍ya̱ saccāsa̍cca̱ vaca̍sī paspṛdhāte |
tayo̱ryatsa̱tyaṃ ya̍ta̱radṛjī̍ya̱staditsomo̍'vati̱ hantyāsa̍t
||12||सु॒वि॒ज्ञा॒नं चि॑कि॒तुषे॒ जना॑य॒ सच्चास॑च्च॒ वच॑सी पस्पृधाते ।
तयो॒र्यत्स॒त्यं य॑त॒रदृजी॑य॒स्तदित्सोमो॑ऽवति॒ हन्त्यास॑त्
na vā u̱ somo̍ vṛji̱naṃ hi̍noti̱ na kṣa̱triya̍ṃ mithu̱yā dhā̱raya̍ntam |
hanti̱ rakṣo̱ hantyāsa̱dvada̍ntamu̱bhāvindra̍sya̱ prasi̍tau śayāte
||13||न वा उ॒ सोमो॑ वृजि॒नं हि॑नोति॒ न क्ष॒त्रियं॑ मिथु॒या धा॒रय॑न्तम् ।
हन्ति॒ रक्षो॒ हन्त्यास॒द्वद॑न्तमु॒भाविन्द्र॑स्य॒ प्रसि॑तौ शयाते
yadi̍ vā̱hamanṛ̍tadeva̱ āsa̱ mogha̍ṃ vā de̱vām̐ a̍pyū̱he a̍gne |
kima̱smabhya̍ṃ jātavedo hṛṇīṣe drogha̱vāca̍ste niṝ̱thaṃ sa̍cantām
||14||यदि॑ वा॒हमनृ॑तदेव॒ आस॒ मोघं॑ वा दे॒वाँ अ॑प्यू॒हे अ॑ग्ने ।
किम॒स्मभ्यं॑ जातवेदो हृणीषे द्रोघ॒वाच॑स्ते निॠ॒थं स॑चन्ताम्
a̱dyā mu̍rīya̱ yadi̍ yātu̱dhāno̱ asmi̱ yadi̱ vāyu̍sta̱tapa̱ pūru̍ṣasya |
adhā̱ sa vī̱rairda̱śabhi̱rvi yū̍yā̱ yo mā̱ mogha̱ṃ yātu̍dhā̱netyāha̍
||15||अ॒द्या मु॑रीय॒ यदि॑ यातु॒धानो॒ अस्मि॒ यदि॒ वायु॑स्त॒तप॒ पूरु॑षस्य ।
अधा॒ स वी॒रैर्द॒शभि॒र्वि यू॑या॒ यो मा॒ मोघं॒ यातु॑धा॒नेत्याह॑
yo māyā̍tu̱ṃ yātu̍dhā̱netyāha̱ yo vā̍ ra̱kṣāḥ śuci̍ra̱smītyāha̍ |
indra̱staṃ ha̍ntu maha̱tā va̱dhena̱ viśva̍sya ja̱ntora̍dha̱maspa̍dīṣṭa
||16||यो माया॑तुं॒ यातु॑धा॒नेत्याह॒ यो वा॑ र॒क्षाः शुचि॑र॒स्मीत्याह॑ ।
इन्द्र॒स्तं ह॑न्तु मह॒ता व॒धेन॒ विश्व॑स्य ज॒न्तोर॑ध॒मस्प॑दीष्ट
pra yā jigā̍ti kha̱rgale̍va̱ nakta̱mapa̍ dru̱hā ta̱nvaṃ1 gūha̍mānā |
va̱vrām̐ a̍na̱ntām̐ ava̱ sā pa̍dīṣṭa̱ grāvā̍ṇo ghnantu ra̱kṣasa̍ upa̱bdaiḥ
||17||प्र या जिगा॑ति ख॒र्गले॑व॒ नक्त॒मप॑ द्रु॒हा त॒न्वं१ गूह॑माना ।
व॒व्राँ अ॑न॒न्ताँ अव॒ सा प॑दीष्ट॒ ग्रावा॑णो घ्नन्तु र॒क्षस॑ उप॒ब्दैः
vi ti̍ṣṭhadhvaṃ maruto vi̱kṣvi1cchata̍ gṛbhā̱yata̍ ra̱kṣasa̱: saṃ pi̍naṣṭana |
vayo̱ ye bhū̱tvī pa̱taya̍nti na̱ktabhi̱rye vā̱ ripo̍ dadhi̱re de̱ve a̍dhva̱re
||18||वि ति॑ष्ठध्वं मरुतो वि॒क्ष्वि१च्छत॑ गृभा॒यत॑ र॒क्षस॒: सं पि॑नष्टन ।
वयो॒ ये भू॒त्वी प॒तय॑न्ति न॒क्तभि॒र्ये वा॒ रिपो॑ दधि॒रे दे॒वे अ॑ध्व॒रे
pra va̍rtaya di̱vo aśmā̍namindra̱ soma̍śitaṃ maghava̱ntsaṃ śi̍śādhi |
prāktā̱dapā̍ktādadha̱rāduda̍ktāda̱bhi ja̍hi ra̱kṣasa̱: parva̍tena
||19||प्र व॑र्तय दि॒वो अश्मा॑नमिन्द्र॒ सोम॑शितं मघव॒न्त्सं शि॑शाधि ।
प्राक्ता॒दपा॑क्तादध॒रादुद॑क्ताद॒भि ज॑हि र॒क्षस॒: पर्व॑तेन
e̱ta u̱ tye pa̍tayanti̱ śvayā̍tava̱ indra̍ṃ dipsanti di̱psavo'dā̍bhyam |
śiśī̍te śa̱kraḥ piśu̍nebhyo va̱dhaṃ nū̱naṃ sṛ̍jada̱śani̍ṃ yātu̱madbhya̍:
||20||ए॒त उ॒ त्ये प॑तयन्ति॒ श्वया॑तव॒ इन्द्रं॑ दिप्सन्ति दि॒प्सवोऽदा॑भ्यम् ।
शिशी॑ते श॒क्रः पिशु॑नेभ्यो व॒धं नू॒नं सृ॑जद॒शनिं॑ यातु॒मद्भ्य॑:
indro̍ yātū̱nāma̍bhavatparāśa̱ro ha̍vi̱rmathī̍nāma̱bhyā̱3vivā̍satām |
a̱bhīdu̍ śa̱kraḥ pa̍ra̱śuryathā̱ vana̱ṃ pātre̍va bhi̱ndantsa̱ta e̍ti ra̱kṣasa̍:
||21||इन्द्रो॑ यातू॒नाम॑भवत्पराश॒रो ह॑वि॒र्मथी॑नाम॒भ्या॒३विवा॑सताम् ।
अ॒भीदु॑ श॒क्रः प॑र॒शुर्यथा॒ वनं॒ पात्रे॑व भि॒न्दन्त्स॒त ए॑ति र॒क्षस॑:
ulū̍kayātuṃ śuśu̱lūka̍yātuṃ ja̱hi śvayā̍tumu̱ta koka̍yātum |
su̱pa̱rṇayā̍tumu̱ta gṛdhra̍yātuṃ dṛ̱ṣade̍va̱ pra mṛ̍ṇa̱ rakṣa̍ indra
||22||उलू॑कयातुं शुशु॒लूक॑यातुं ज॒हि श्वया॑तुमु॒त कोक॑यातुम् ।
सु॒प॒र्णया॑तुमु॒त गृध्र॑यातुं दृ॒षदे॑व॒ प्र मृ॑ण॒ रक्ष॑ इन्द्र
mā no̱ rakṣo̍ a̱bhi na̍ḍyātu̱māva̍tā̱mapo̍cchatu mithu̱nā yā ki̍mī̱dinā̍ |
pṛ̱thi̱vī na̱: pārthi̍vātpā̱tvaṃha̍so̱'ntari̍kṣaṃ di̱vyātpā̍tva̱smān
||23||मा नो॒ रक्षो॑ अ॒भि न॑ड्यातु॒माव॑ता॒मपो॑च्छतु मिथु॒ना या कि॑मी॒दिना॑ ।
पृ॒थि॒वी न॒: पार्थि॑वात्पा॒त्वंह॑सो॒ऽन्तरि॑क्षं दि॒व्यात्पा॑त्व॒स्मान्
indra̍ ja̱hi pumā̍ṃsaṃ yātu̱dhāna̍mu̱ta striya̍ṃ mā̱yayā̱ śāśa̍dānām |
vigrī̍vāso̱ mūra̍devā ṛdantu̱ mā te dṛ̍śa̱ntsūrya̍mu̱ccara̍ntam
||24||इन्द्र॑ ज॒हि पुमां॑सं यातु॒धान॑मु॒त स्त्रियं॑ मा॒यया॒ शाश॑दानाम् ।
विग्री॑वासो॒ मूर॑देवा ऋदन्तु॒ मा ते दृ॑श॒न्त्सूर्य॑मु॒च्चर॑न्तम्
prati̍ cakṣva̱ vi ca̱kṣvendra̍śca soma jāgṛtam | rakṣo̍bhyo va̱dhama̍syatama̱śani̍ṃ yātu̱madbhya̍:
||25||प्रति॑ चक्ष्व॒ वि च॒क्ष्वेन्द्र॑श्च सोम जागृतम् । रक्षो॑भ्यो व॒धम॑स्यतम॒शनिं॑ यातु॒मद्भ्य॑: