Study
- Anukramaṇī
- Source
25 maitrāvaruṇirvasiṣṭha:| agni: | virāṭ ,19-25 triṣṭup |
a̱gniṃ naro̱ dīdhi̍tibhira̱raṇyo̱rhasta̍cyutī janayanta praśa̱stam |
dū̱re̱dṛśa̍ṃ gṛ̱hapa̍timatha̱ryum
||1||अ॒ग्निं नरो॒ दीधि॑तिभिर॒रण्यो॒र्हस्त॑च्युती जनयन्त प्रश॒स्तम् ।
दू॒रे॒दृशं॑ गृ॒हप॑तिमथ॒र्युम्
tama̱gnimaste̱ vasa̍vo̱ nyṛ̍ṇvantsuprati̱cakṣa̱mava̍se̱ kuta̍ścit |
da̱kṣāyyo̱ yo dama̱ āsa̱ nitya̍:
||2||तम॒ग्निमस्ते॒ वस॑वो॒ न्यृ॑ण्वन्त्सुप्रति॒चक्ष॒मव॑से॒ कुत॑श्चित् ।
द॒क्षाय्यो॒ यो दम॒ आस॒ नित्य॑:
preddho̍ agne dīdihi pu̱ro no'ja̍srayā sū̱rmyā̍ yaviṣṭha |
tvāṃ śaśva̍nta̱ upa̍ yanti̱ vājā̍:
||3||प्रेद्धो॑ अग्ने दीदिहि पु॒रो नोऽज॑स्रया सू॒र्म्या॑ यविष्ठ ।
त्वां शश्व॑न्त॒ उप॑ यन्ति॒ वाजा॑:
pra te a̱gnayo̱'gnibhyo̱ vara̱ṃ niḥ su̱vīrā̍saḥ śośucanta dyu̱manta̍: |
yatrā̱ nara̍: sa̱māsa̍te sujā̱tāḥ
||4||प्र ते अ॒ग्नयो॒ऽग्निभ्यो॒ वरं॒ निः सु॒वीरा॑सः शोशुचन्त द्यु॒मन्त॑: ।
यत्रा॒ नर॑: स॒मास॑ते सुजा॒ताः
dā no̍ agne dhi̱yā ra̱yiṃ su̱vīra̍ṃ svapa̱tyaṃ sa̍hasya praśa̱stam |
na yaṃ yāvā̱ tara̍ti yātu̱māvā̍n
||5||दा नो॑ अग्ने धि॒या र॒यिं सु॒वीरं॑ स्वप॒त्यं स॑हस्य प्रश॒स्तम् ।
न यं यावा॒ तर॑ति यातु॒मावा॑न्
upa̱ yameti̍ yuva̱tiḥ su̱dakṣa̍ṃ do̱ṣā vasto̍rha̱viṣma̍tī ghṛ̱tācī̍ |
upa̱ svaina̍ma̱rama̍tirvasū̱yuḥ
||6||उप॒ यमेति॑ युव॒तिः सु॒दक्षं॑ दो॒षा वस्तो॑र्ह॒विष्म॑ती घृ॒ताची॑ ।
उप॒ स्वैन॑म॒रम॑तिर्वसू॒युः
viśvā̍ a̱gne'pa̍ da̱hārā̍tī̱ryebhi̱stapo̍bhi̱rada̍ho̱ jarū̍tham |
pra ni̍sva̱raṃ cā̍taya̱svāmī̍vām
||7||विश्वा॑ अ॒ग्नेऽप॑ द॒हारा॑ती॒र्येभि॒स्तपो॑भि॒रद॑हो॒ जरू॑थम् ।
प्र नि॑स्व॒रं चा॑तय॒स्वामी॑वाम्
ā yaste̍ agna idha̱te anī̍ka̱ṃ vasi̍ṣṭha̱ śukra̱ dīdi̍va̱: pāva̍ka |
u̱to na̍ e̱bhiḥ sta̱vathai̍ri̱ha syā̍:
||8||आ यस्ते॑ अग्न इध॒ते अनी॑कं॒ वसि॑ष्ठ॒ शुक्र॒ दीदि॑व॒: पाव॑क ।
उ॒तो न॑ ए॒भिः स्त॒वथै॑रि॒ह स्या॑:
vi ye te̍ agne bheji̱re anī̍ka̱ṃ martā̱ nara̱: pitryā̍saḥ puru̱trā |
u̱to na̍ e̱bhiḥ su̱manā̍ i̱ha syā̍:
||9||वि ये ते॑ अग्ने भेजि॒रे अनी॑कं॒ मर्ता॒ नर॒: पित्र्या॑सः पुरु॒त्रा ।
उ॒तो न॑ ए॒भिः सु॒मना॑ इ॒ह स्या॑:
i̱me naro̍ vṛtra̱hatye̍ṣu̱ śūrā̱ viśvā̱ ade̍vīra̱bhi sa̍ntu mā̱yāḥ |
ye me̱ dhiya̍ṃ pa̱naya̍nta praśa̱stām
||10||इ॒मे नरो॑ वृत्र॒हत्ये॑षु॒ शूरा॒ विश्वा॒ अदे॑वीर॒भि स॑न्तु मा॒याः ।
ये मे॒ धियं॑ प॒नय॑न्त प्रश॒स्ताम्
mā śūne̍ agne̱ ni ṣa̍dāma nṛ̱ṇāṃ māśeṣa̍so̱'vīra̍tā̱ pari̍ tvā |
pra̱jāva̍tīṣu̱ duryā̍su durya
||11||मा शूने॑ अग्ने॒ नि ष॑दाम नृ॒णां माशेष॑सो॒ऽवीर॑ता॒ परि॑ त्वा ।
प्र॒जाव॑तीषु॒ दुर्या॑सु दुर्य
yama̱śvī nitya̍mupa̱yāti̍ ya̱jñaṃ pra̱jāva̍ntaṃ svapa̱tyaṃ kṣaya̍ṃ naḥ |
svaja̍nmanā̱ śeṣa̍sā vāvṛdhā̱nam
||12||यम॒श्वी नित्य॑मुप॒याति॑ य॒ज्ञं प्र॒जाव॑न्तं स्वप॒त्यं क्षयं॑ नः ।
स्वज॑न्मना॒ शेष॑सा वावृधा॒नम्
pā̱hi no̍ agne ra̱kṣaso̱ aju̍ṣṭātpā̱hi dhū̱rterara̍ruṣo aghā̱yoḥ |
tvā yu̱jā pṛ̍tanā̱yūm̐ra̱bhi ṣyā̍m
||13||पा॒हि नो॑ अग्ने र॒क्षसो॒ अजु॑ष्टात्पा॒हि धू॒र्तेरर॑रुषो अघा॒योः ।
त्वा यु॒जा पृ॑तना॒यूँर॒भि ष्या॑म्
seda̱gnira̱gnīm̐ratya̍stva̱nyānyatra̍ vā̱jī tana̍yo vī̱l̤upā̍ṇiḥ |
sa̱hasra̍pāthā a̱kṣarā̍ sa̱meti̍
||14||सेद॒ग्निर॒ग्नीँरत्य॑स्त्व॒न्यान्यत्र॑ वा॒जी तन॑यो वी॒ळुपा॑णिः ।
स॒हस्र॑पाथा अ॒क्षरा॑ स॒मेति॑
seda̱gniryo va̍nuṣya̱to ni̱pāti̍ same̱ddhāra̱maṃha̍sa uru̱ṣyāt |
su̱jā̱tāsa̱: pari̍ caranti vī̱rāḥ
||15||सेद॒ग्निर्यो व॑नुष्य॒तो नि॒पाति॑ समे॒द्धार॒मंह॑स उरु॒ष्यात् ।
सु॒जा॒तास॒: परि॑ चरन्ति वी॒राः
a̱yaṃ so a̱gnirāhu̍taḥ puru̱trā yamīśā̍na̱: samidi̱ndhe ha̱viṣmā̍n |
pari̱ yametya̍dhva̱reṣu̱ hotā̍
||16||अ॒यं सो अ॒ग्निराहु॑तः पुरु॒त्रा यमीशा॑न॒: समिदि॒न्धे ह॒विष्मा॑न् ।
परि॒ यमेत्य॑ध्व॒रेषु॒ होता॑
tve a̍gna ā̱hava̍nāni̱ bhūrī̍śā̱nāsa̱ ā ju̍huyāma̱ nityā̍ | u̱bhā kṛ̱ṇvanto̍ vaha̱tū mi̱yedhe̍
||17||त्वे अ॑ग्न आ॒हव॑नानि॒ भूरी॑शा॒नास॒ आ जु॑हुयाम॒ नित्या॑ । उ॒भा कृ॒ण्वन्तो॑ वह॒तू मि॒येधे॑
i̱mo a̍gne vī̱tata̍māni ha̱vyā 'ja̍sro vakṣi de̱vatā̍ti̱maccha̍ | prati̍ na īṃ sura̱bhīṇi̍ vyantu
||18||इ॒मो अ॑ग्ने वी॒तत॑मानि ह॒व्या ऽज॑स्रो वक्षि दे॒वता॑ति॒मच्छ॑ । प्रति॑ न ईं सुर॒भीणि॑ व्यन्तु
mā no̍ agne̱'vīra̍te̱ parā̍ dā du̱rvāsa̱se'ma̍taye̱ mā no̍ a̱syai |
mā na̍: kṣu̱dhe mā ra̱kṣasa̍ ṛtāvo̱ mā no̱ dame̱ mā vana̱ ā ju̍hūrthāḥ
||19||मा नो॑ अग्ने॒ऽवीर॑ते॒ परा॑ दा दु॒र्वास॒सेऽम॑तये॒ मा नो॑ अ॒स्यै ।
मा न॑: क्षु॒धे मा र॒क्षस॑ ऋतावो॒ मा नो॒ दमे॒ मा वन॒ आ जु॑हूर्थाः
nū me̱ brahmā̍ṇyagna̱ uccha̍śādhi̱ tvaṃ de̍va ma̱ghava̍dbhyaḥ suṣūdaḥ |
rā̱tau syā̍mo̱bhayā̍sa̱ ā te̍ yū̱yaṃ pā̍ta sva̱stibhi̱: sadā̍ naḥ
||20||नू मे॒ ब्रह्मा॑ण्यग्न॒ उच्छ॑शाधि॒ त्वं दे॑व म॒घव॑द्भ्यः सुषूदः ।
रा॒तौ स्या॑मो॒भया॑स॒ आ ते॑ यू॒यं पा॑त स्व॒स्तिभि॒: सदा॑ नः
tvama̍gne su̱havo̍ ra̱ṇvasa̍ṃdṛksudī̱tī sū̍no sahaso didīhi |
mā tve sacā̱ tana̍ye̱ nitya̱ ā dha̱ṅmā vī̱ro a̱smannaryo̱ vi dā̍sīt
||21||त्वम॑ग्ने सु॒हवो॑ र॒ण्वसं॑दृक्सुदी॒ती सू॑नो सहसो दिदीहि ।
मा त्वे सचा॒ तन॑ये॒ नित्य॒ आ ध॒ङ्मा वी॒रो अ॒स्मन्नर्यो॒ वि दा॑सीत्
mā no̍ agne durbhṛ̱taye̱ sacai̱ṣu de̱veddhe̍ṣva̱gniṣu̱ pra vo̍caḥ |
mā te̍ a̱smāndu̍rma̱tayo̍ bhṛ̱mācci̍dde̱vasya̍ sūno sahaso naśanta
||22||मा नो॑ अग्ने दुर्भृ॒तये॒ सचै॒षु दे॒वेद्धे॑ष्व॒ग्निषु॒ प्र वो॑चः ।
मा ते॑ अ॒स्मान्दु॑र्म॒तयो॑ भृ॒माच्चि॑द्दे॒वस्य॑ सूनो सहसो नशन्त
sa marto̍ agne svanīka re̱vānama̍rtye̱ ya ā̍ju̱hoti̍ ha̱vyam |
sa de̱vatā̍ vasu̱vani̍ṃ dadhāti̱ yaṃ sū̱rira̱rthī pṛ̱cchamā̍na̱ eti̍
||23||स मर्तो॑ अग्ने स्वनीक रे॒वानम॑र्त्ये॒ य आ॑जु॒होति॑ ह॒व्यम् ।
स दे॒वता॑ वसु॒वनिं॑ दधाति॒ यं सू॒रिर॒र्थी पृ॒च्छमा॑न॒ एति॑
ma̱ho no̍ agne suvi̱tasya̍ vi̱dvānra̱yiṃ sū̱ribhya̱ ā va̍hā bṛ̱hanta̍m |
yena̍ va̱yaṃ sa̍hasāva̱nmade̱mā'vi̍kṣitāsa̱ āyu̍ṣā su̱vīrā̍:
||24||म॒हो नो॑ अग्ने सुवि॒तस्य॑ वि॒द्वान्र॒यिं सू॒रिभ्य॒ आ व॑हा बृ॒हन्त॑म् ।
येन॑ व॒यं स॑हसाव॒न्मदे॒माऽवि॑क्षितास॒ आयु॑षा सु॒वीरा॑:
nū me̱ brahmā̍ṇyagna̱ uccha̍śādhi̱ tvaṃ de̍va ma̱ghava̍dbhyaḥ suṣūdaḥ |
rā̱tau syā̍mo̱bhayā̍sa̱ ā te̍ yū̱yaṃ pā̍ta sva̱stibhi̱: sadā̍ naḥ
||25||नू मे॒ ब्रह्मा॑ण्यग्न॒ उच्छ॑शाधि॒ त्वं दे॑व म॒घव॑द्भ्यः सुषूदः ।
रा॒तौ स्या॑मो॒भया॑स॒ आ ते॑ यू॒यं पा॑त स्व॒स्तिभि॒: सदा॑ नः