Study
- Anukramaṇī
- Source
6 maitrāvaruṇirvasiṣṭha:| aśvinau |pragātha:=(viṣamā bṛhatī, samā satobṛhatī) |
i̱mā u̍ vā̱ṃ divi̍ṣṭaya u̱srā ha̍vante aśvinā |
a̱yaṃ vā̍ma̱hve'va̍se śacīvasū̱ viśa̍ṃviśa̱ṃ hi gaccha̍thaḥ
||1||इ॒मा उ॑ वां॒ दिवि॑ष्टय उ॒स्रा ह॑वन्ते अश्विना ।
अ॒यं वा॑म॒ह्वेऽव॑से शचीवसू॒ विशं॑विशं॒ हि गच्छ॑थः
yu̱vaṃ ci̱traṃ da̍dathu̱rbhoja̍naṃ narā̱ code̍thāṃ sū̱nṛtā̍vate |
a̱rvāgratha̱ṃ sama̍nasā̱ ni ya̍cchata̱ṃ piba̍taṃ so̱myaṃ madhu̍
||2||यु॒वं चि॒त्रं द॑दथु॒र्भोज॑नं नरा॒ चोदे॑थां सू॒नृता॑वते ।
अ॒र्वाग्रथं॒ सम॑नसा॒ नि य॑च्छतं॒ पिब॑तं सो॒म्यं मधु॑
ā yā̍ta̱mupa̍ bhūṣata̱ṃ madhva̍: pibatamaśvinā |
du̱gdhaṃ payo̍ vṛṣaṇā jenyāvasū̱ mā no̍ mardhiṣṭa̱mā ga̍tam
||3||आ या॑त॒मुप॑ भूषतं॒ मध्व॑: पिबतमश्विना ।
दु॒ग्धं पयो॑ वृषणा जेन्यावसू॒ मा नो॑ मर्धिष्ट॒मा ग॑तम्
aśvā̍so̱ ye vā̱mupa̍ dā̱śuṣo̍ gṛ̱haṃ yu̱vāṃ dīya̍nti̱ bibhra̍taḥ |
ma̱kṣū̱yubhi̍rnarā̱ haye̍bhiraśvi̱nā ''de̍vā yātamasma̱yū
||4||अश्वा॑सो॒ ये वा॒मुप॑ दा॒शुषो॑ गृ॒हं यु॒वां दीय॑न्ति॒ बिभ्र॑तः ।
म॒क्षू॒युभि॑र्नरा॒ हये॑भिरश्वि॒ना ऽऽदे॑वा यातमस्म॒यू
adhā̍ ha̱ yanto̍ a̱śvinā̱ pṛkṣa̍: sacanta sū̱raya̍: |
tā ya̍ṃsato ma̱ghava̍dbhyo dhru̱vaṃ yaśa̍ścha̱rdira̱smabhya̱ṃ nāsa̍tyā
||5||अधा॑ ह॒ यन्तो॑ अ॒श्विना॒ पृक्ष॑: सचन्त सू॒रय॑: ।
ता यं॑सतो म॒घव॑द्भ्यो ध्रु॒वं यश॑श्छ॒र्दिर॒स्मभ्यं॒ नास॑त्या
pra ye ya̱yura̍vṛ̱kāso̱ rathā̍ iva nṛpā̱tāro̱ janā̍nām |
u̱ta svena̱ śava̍sā śūśuvu̱rnara̍ u̱ta kṣi̍yanti sukṣi̱tim
||6||प्र ये य॒युर॑वृ॒कासो॒ रथा॑ इव नृपा॒तारो॒ जना॑नाम् ।
उ॒त स्वेन॒ शव॑सा शूशुवु॒र्नर॑ उ॒त क्षि॑यन्ति सुक्षि॒तिम्