Study
- Anukramaṇī
- Source
6 maitrāvaruṇirvasiṣṭha:| uṣasa: | triṣṭup |
upo̍ ruruce yuva̱tirna yoṣā̱ viśva̍ṃ jī̱vaṃ pra̍su̱vantī̍ ca̱rāyai̍ |
abhū̍da̱gniḥ sa̱midhe̱ mānu̍ṣāṇā̱maka̱rjyoti̱rbādha̍mānā̱ tamā̍ṃsi
||1||उपो॑ रुरुचे युव॒तिर्न योषा॒ विश्वं॑ जी॒वं प्र॑सु॒वन्ती॑ च॒रायै॑ ।
अभू॑द॒ग्निः स॒मिधे॒ मानु॑षाणा॒मक॒र्ज्योति॒र्बाध॑माना॒ तमां॑सि
viśva̍ṃ pratī̱cī sa̱prathā̱ uda̍sthā̱druśa̱dvāso̱ bibhra̍tī śu̱krama̍śvait |
hira̍ṇyavarṇā su̱dṛśī̍kasaṃdṛ̱ggavā̍ṃ mā̱tā ne̱tryahnā̍maroci
||2||विश्वं॑ प्रती॒ची स॒प्रथा॒ उद॑स्था॒द्रुश॒द्वासो॒ बिभ्र॑ती शु॒क्रम॑श्वैत् ।
हिर॑ण्यवर्णा सु॒दृशी॑कसंदृ॒ग्गवां॑ मा॒ता ने॒त्र्यह्ना॑मरोचि
de̱vānā̱ṃ cakṣu̍: su̱bhagā̱ vaha̍ntī śve̱taṃ naya̍ntī su̱dṛśī̍ka̱maśva̍m |
u̱ṣā a̍darśi ra̱śmibhi̱rvya̍ktā ci̱trāma̍ghā̱ viśva̱manu̱ prabhū̍tā
||3||दे॒वानां॒ चक्षु॑: सु॒भगा॒ वह॑न्ती श्वे॒तं नय॑न्ती सु॒दृशी॑क॒मश्व॑म् ।
उ॒षा अ॑दर्शि र॒श्मिभि॒र्व्य॑क्ता चि॒त्राम॑घा॒ विश्व॒मनु॒ प्रभू॑ता
anti̍vāmā dū̱re a̱mitra̍muccho̱rvīṃ gavyū̍ti̱mabha̍yaṃ kṛdhī naḥ |
yā̱vaya̱ dveṣa̱ ā bha̍rā̱ vasū̍ni co̱daya̱ rādho̍ gṛṇa̱te ma̍ghoni
||4||अन्ति॑वामा दू॒रे अ॒मित्र॑मुच्छो॒र्वीं गव्यू॑ति॒मभ॑यं कृधी नः ।
या॒वय॒ द्वेष॒ आ भ॑रा॒ वसू॑नि चो॒दय॒ राधो॑ गृण॒ते म॑घोनि
a̱sme śreṣṭhe̍bhirbhā̱nubhi̱rvi bhā̱hyuṣo̍ devi prati̱rantī̍ na̱ āyu̍: |
iṣa̍ṃ ca no̱ dadha̍tī viśvavāre̱ goma̱daśvā̍va̱dratha̍vacca̱ rādha̍:
||5||अ॒स्मे श्रेष्ठे॑भिर्भा॒नुभि॒र्वि भा॒ह्युषो॑ देवि प्रति॒रन्ती॑ न॒ आयु॑: ।
इषं॑ च नो॒ दध॑ती विश्ववारे॒ गोम॒दश्वा॑व॒द्रथ॑वच्च॒ राध॑:
yāṃ tvā̍ divo duhitarva̱rdhaya̱ntyuṣa̍: sujāte ma̱tibhi̱rvasi̍ṣṭhāḥ |
sāsmāsu̍ dhā ra̱yimṛ̱ṣvaṃ bṛ̱hanta̍ṃ yū̱yaṃ pā̍ta sva̱stibhi̱: sadā̍ naḥ
||6||यां त्वा॑ दिवो दुहितर्व॒र्धय॒न्त्युष॑: सुजाते म॒तिभि॒र्वसि॑ष्ठाः ।
सास्मासु॑ धा र॒यिमृ॒ष्वं बृ॒हन्तं॑ यू॒यं पा॑त स्व॒स्तिभि॒: सदा॑ नः