Study
- Anukramaṇī
- Source
6 maitrāvaruṇirvasiṣṭha:| sarasvatī , 3 sarasvān | triṣṭup |
pra kṣoda̍sā̱ dhāya̍sā sasra e̱ṣā sara̍svatī dha̱ruṇa̱māya̍sī̱ pūḥ |
pra̱bāba̍dhānā ra̱thye̍va yāti̱ viśvā̍ a̱po ma̍hi̱nā sindhu̍ra̱nyāḥ
||1||प्र क्षोद॑सा॒ धाय॑सा सस्र ए॒षा सर॑स्वती ध॒रुण॒माय॑सी॒ पूः ।
प्र॒बाब॑धाना र॒थ्ये॑व याति॒ विश्वा॑ अ॒पो म॑हि॒ना सिन्धु॑र॒न्याः
ekā̍ceta̱tsara̍svatī na̱dīnā̱ṃ śuci̍rya̱tī gi̱ribhya̱ ā sa̍mu̱drāt |
rā̱yaśceta̍ntī̱ bhuva̍nasya̱ bhūre̍rghṛ̱taṃ payo̍ duduhe̱ nāhu̍ṣāya
||2||एका॑चेत॒त्सर॑स्वती न॒दीनां॒ शुचि॑र्य॒ती गि॒रिभ्य॒ आ स॑मु॒द्रात् ।
रा॒यश्चेत॑न्ती॒ भुव॑नस्य॒ भूरे॑र्घृ॒तं पयो॑ दुदुहे॒ नाहु॑षाय
sa vā̍vṛdhe̱ naryo̱ yoṣa̍ṇāsu̱ vṛṣā̱ śiśu̍rvṛṣa̱bho ya̱jñiyā̍su |
sa vā̱jina̍ṃ ma̱ghava̍dbhyo dadhāti̱ vi sā̱taye̍ ta̱nva̍ṃ māmṛjīta
||3||स वा॑वृधे॒ नर्यो॒ योष॑णासु॒ वृषा॒ शिशु॑र्वृष॒भो य॒ज्ञिया॑सु ।
स वा॒जिनं॑ म॒घव॑द्भ्यो दधाति॒ वि सा॒तये॑ त॒न्वं॑ मामृजीत
u̱ta syā na̱: sara̍svatī juṣā̱ṇopa̍ śravatsu̱bhagā̍ ya̱jṇe a̱smin |
mi̱tajñu̍bhirnama̱syai̍riyā̱nā rā̱yā yu̱jā ci̱dutta̍rā̱ sakhi̍bhyaḥ
||4||उ॒त स्या न॒: सर॑स्वती जुषा॒णोप॑ श्रवत्सु॒भगा॑ य॒ज्णे अ॒स्मिन् ।
मि॒तज्ञु॑भिर्नम॒स्यै॑रिया॒ना रा॒या यु॒जा चि॒दुत्त॑रा॒ सखि॑भ्यः
i̱mā juhvā̍nā yu̱ṣmadā namo̍bhi̱: prati̱ stoma̍ṃ sarasvati juṣasva |
tava̱ śarma̍npri̱yata̍me̱ dadhā̍nā̱ upa̍ stheyāma śara̱ṇaṃ na vṛ̱kṣam
||5||इ॒मा जुह्वा॑ना यु॒ष्मदा नमो॑भि॒: प्रति॒ स्तोमं॑ सरस्वति जुषस्व ।
तव॒ शर्म॑न्प्रि॒यत॑मे॒ दधा॑ना॒ उप॑ स्थेयाम शर॒णं न वृ॒क्षम्
a̱yamu̍ te sarasvati̱ vasi̍ṣṭho̱ dvārā̍vṛ̱tasya̍ subhage̱ vyā̍vaḥ |
vardha̍ śubhre stuva̱te rā̍si̱ vājā̍nyū̱yaṃ pā̍ta sva̱stibhi̱: sadā̍ naḥ
||6||अ॒यमु॑ ते सरस्वति॒ वसि॑ष्ठो॒ द्वारा॑वृ॒तस्य॑ सुभगे॒ व्या॑वः ।
वर्ध॑ शुभ्रे स्तुव॒ते रा॑सि॒ वाजा॑न्यू॒यं पा॑त स्व॒स्तिभि॒: सदा॑ नः