Study
- Anukramaṇī
- Source
7 maitrāvaruṇirvasiṣṭha:| viśve devā: | triṣṭup |
ū̱rdhvo a̱gniḥ su̍ma̱tiṃ vasvo̍ aśretpratī̱cī jū̱rṇirde̱vatā̍timeti |
bhe̱jāte̱ adrī̍ ra̱thye̍va̱ panthā̍mṛ̱taṃ hotā̍ na iṣi̱to ya̍jāti
||1||ऊ॒र्ध्वो अ॒ग्निः सु॑म॒तिं वस्वो॑ अश्रेत्प्रती॒ची जू॒र्णिर्दे॒वता॑तिमेति ।
भे॒जाते॒ अद्री॑ र॒थ्ये॑व॒ पन्था॑मृ॒तं होता॑ न इषि॒तो य॑जाति
pra vā̍vṛje supra̱yā ba̱rhire̍ṣā̱mā vi̱śpatī̍va̱ bīri̍ṭa iyāte |
vi̱śāma̱ktoru̱ṣasa̍: pū̱rvahū̍tau vā̱yuḥ pū̱ṣā sva̱staye̍ ni̱yutvā̍n
||2||प्र वा॑वृजे सुप्र॒या ब॒र्हिरे॑षा॒मा वि॒श्पती॑व॒ बीरि॑ट इयाते ।
वि॒शाम॒क्तोरु॒षस॑: पू॒र्वहू॑तौ वा॒युः पू॒षा स्व॒स्तये॑ नि॒युत्वा॑न्
jma̱yā atra̱ vasa̍vo ranta de̱vā u̱rāva̱ntari̍kṣe marjayanta śu̱bhrāḥ |
a̱rvākpa̱tha u̍rujrayaḥ kṛṇudhva̱ṃ śrotā̍ dū̱tasya̍ ja̱gmuṣo̍ no a̱sya
||3||ज्म॒या अत्र॒ वस॑वो रन्त दे॒वा उ॒राव॒न्तरि॑क्षे मर्जयन्त शु॒भ्राः ।
अ॒र्वाक्प॒थ उ॑रुज्रयः कृणुध्वं॒ श्रोता॑ दू॒तस्य॑ ज॒ग्मुषो॑ नो अ॒स्य
te hi ya̱jñeṣu̍ ya̱jñiyā̍sa̱ ūmā̍: sa̱dhastha̱ṃ viśve̍ a̱bhi santi̍ de̱vāḥ |
tām̐ a̍dhva̱ra u̍śa̱to ya̍kṣyagne śru̱ṣṭī bhaga̱ṃ nāsa̍tyā̱ pura̍ṃdhim
||4||ते हि य॒ज्ञेषु॑ य॒ज्ञिया॑स॒ ऊमा॑: स॒धस्थं॒ विश्वे॑ अ॒भि सन्ति॑ दे॒वाः ।
ताँ अ॑ध्व॒र उ॑श॒तो य॑क्ष्यग्ने श्रु॒ष्टी भगं॒ नास॑त्या॒ पुरं॑धिम्
āgne̱ giro̍ di̱va ā pṛ̍thi̱vyā mi̱traṃ va̍ha̱ varu̍ṇa̱mindra̍ma̱gnim |
ārya̱maṇa̱madi̍ti̱ṃ viṣṇu̍meṣā̱ṃ sara̍svatī ma̱ruto̍ mādayantām
||5||आग्ने॒ गिरो॑ दि॒व आ पृ॑थि॒व्या मि॒त्रं व॑ह॒ वरु॑ण॒मिन्द्र॑म॒ग्निम् ।
आर्य॒मण॒मदि॑तिं॒ विष्णु॑मेषां॒ सर॑स्वती म॒रुतो॑ मादयन्ताम्
ra̱re ha̱vyaṃ ma̱tibhi̍rya̱jñiyā̍nā̱ṃ nakṣa̱tkāma̱ṃ martyā̍nā̱masi̍nvan |
dhātā̍ ra̱yima̍vida̱syaṃ sa̍dā̱sāṃ sa̍kṣī̱mahi̱ yujye̍bhi̱rnu de̱vaiḥ
||6||र॒रे ह॒व्यं म॒तिभि॑र्य॒ज्ञिया॑नां॒ नक्ष॒त्कामं॒ मर्त्या॑ना॒मसि॑न्वन् ।
धाता॑ र॒यिम॑विद॒स्यं स॑दा॒सां स॑क्षी॒महि॒ युज्ये॑भि॒र्नु दे॒वैः
nū roda̍sī a̱bhiṣṭu̍te̱ vasi̍ṣṭhaiṝ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṃ no̍ a̱rkaṃ yū̱yaṃ pā̍ta sva̱stibhi̱: sadā̍ naḥ
||7||नू रोद॑सी अ॒भिष्टु॑ते॒ वसि॑ष्ठैॠ॒तावा॑नो॒ वरु॑णो मि॒त्रो अ॒ग्निः ।
यच्छ॑न्तु च॒न्द्रा उ॑प॒मं नो॑ अ॒र्कं यू॒यं पा॑त स्व॒स्तिभि॒: सदा॑ नः