Study
- Anukramaṇī
- Source
7 maitrāvaruṇirvasiṣṭha:| uṣasa: | triṣṭup |
udu̱ jyoti̍ra̱mṛta̍ṃ vi̱śvaja̍nyaṃ vi̱śvāna̍raḥ savi̱tā de̱vo a̍śret |
kratvā̍ de̱vānā̍majaniṣṭa̱ cakṣu̍rā̱vira̍ka̱rbhuva̍na̱ṃ viśva̍mu̱ṣāḥ
||1||उदु॒ ज्योति॑र॒मृतं॑ वि॒श्वज॑न्यं वि॒श्वान॑रः सवि॒ता दे॒वो अ॑श्रेत् ।
क्रत्वा॑ दे॒वाना॑मजनिष्ट॒ चक्षु॑रा॒विर॑क॒र्भुव॑नं॒ विश्व॑मु॒षाः
pra me̱ panthā̍ deva̱yānā̍ adṛśra̱nnama̍rdhanto̱ vasu̍bhi̱riṣkṛ̍tāsaḥ |
abhū̍du ke̱turu̱ṣasa̍: pu̱rastā̍tpratī̱cyāgā̱dadhi̍ ha̱rmyebhya̍:
||2||प्र मे॒ पन्था॑ देव॒याना॑ अदृश्र॒न्नम॑र्धन्तो॒ वसु॑भि॒रिष्कृ॑तासः ।
अभू॑दु के॒तुरु॒षस॑: पु॒रस्ता॑त्प्रती॒च्यागा॒दधि॑ ह॒र्म्येभ्य॑:
tānīdahā̍ni bahu̱lānyā̍sa̱nyā prā̱cīna̱mudi̍tā̱ sūrya̍sya |
yata̱: pari̍ jā̱ra i̍vā̱cara̱ntyuṣo̍ dadṛ̱kṣe na puna̍rya̱tīva̍
||3||तानीदहा॑नि बहु॒लान्या॑स॒न्या प्रा॒चीन॒मुदि॑ता॒ सूर्य॑स्य ।
यत॒: परि॑ जा॒र इ॑वा॒चर॒न्त्युषो॑ ददृ॒क्षे न पुन॑र्य॒तीव॑
ta idde̱vānā̍ṃ sadha̱māda̍ āsannṛ̱tāvā̍naḥ ka̱vaya̍: pū̱rvyāsa̍: |
gū̱l̤haṃ jyoti̍: pi̱taro̱ anva̍vindantsa̱tyama̍ntrā ajanayannu̱ṣāsa̍m
||4||त इद्दे॒वानां॑ सध॒माद॑ आसन्नृ॒तावा॑नः क॒वय॑: पू॒र्व्यास॑: ।
गू॒ळ्हं ज्योति॑: पि॒तरो॒ अन्व॑विन्दन्त्स॒त्यम॑न्त्रा अजनयन्नु॒षास॑म्
sa̱mā̱na ū̱rve adhi̱ saṃga̍tāsa̱: saṃ jā̍nate̱ na ya̍tante mi̱thaste |
te de̱vānā̱ṃ na mi̍nanti vra̱tānyama̍rdhanto̱ vasu̍bhi̱ryāda̍mānāḥ
||5||स॒मा॒न ऊ॒र्वे अधि॒ संग॑तास॒: सं जा॑नते॒ न य॑तन्ते मि॒थस्ते ।
ते दे॒वानां॒ न मि॑नन्ति व्र॒तान्यम॑र्धन्तो॒ वसु॑भि॒र्याद॑मानाः
prati̍ tvā̱ stomai̍rīl̤ate̱ vasi̍ṣṭhā uṣa̱rbudha̍: subhage tuṣṭu̱vāṃsa̍: |
gavā̍ṃ ne̱trī vāja̍patnī na u̱cchoṣa̍: sujāte pratha̱mā ja̍rasva
||6||प्रति॑ त्वा॒ स्तोमै॑रीळते॒ वसि॑ष्ठा उष॒र्बुध॑: सुभगे तुष्टु॒वांस॑: ।
गवां॑ ने॒त्री वाज॑पत्नी न उ॒च्छोष॑: सुजाते प्रथ॒मा ज॑रस्व
e̱ṣā ne̱trī rādha̍saḥ sū̱nṛtā̍nāmu̱ṣā u̱cchantī̍ ribhyate̱ vasi̍ṣṭhaiḥ |
dī̱rgha̱śruta̍ṃ ra̱yima̱sme dadhā̍nā yū̱yaṃ pā̍ta sva̱stibhi̱: sadā̍ naḥ
||7||ए॒षा ने॒त्री राध॑सः सू॒नृता॑नामु॒षा उ॒च्छन्ती॑ रिभ्यते॒ वसि॑ष्ठैः ।
दी॒र्घ॒श्रुतं॑ र॒यिम॒स्मे दधा॑ना यू॒यं पा॑त स्व॒स्तिभि॒: सदा॑ नः