Study
- Anukramaṇī
- Source
5 maitrāvaruṇirvasiṣṭha:| indra: | triṣṭup |
indra̱ṃ naro̍ ne̱madhi̍tā havante̱ yatpāryā̍ yu̱naja̍te̱ dhiya̱stāḥ |
śūro̱ nṛṣā̍tā̱ śava̍saścakā̱na ā goma̍ti vra̱je bha̍jā̱ tvaṃ na̍:
||1||इन्द्रं॒ नरो॑ ने॒मधि॑ता हवन्ते॒ यत्पार्या॑ यु॒नज॑ते॒ धिय॒स्ताः ।
शूरो॒ नृषा॑ता॒ शव॑सश्चका॒न आ गोम॑ति व्र॒जे भ॑जा॒ त्वं न॑:
ya i̍ndra̱ śuṣmo̍ maghavante̱ asti̱ śikṣā̱ sakhi̍bhyaḥ puruhūta̱ nṛbhya̍: |
tvaṃ hi dṛ̱l̤hā ma̍ghava̱nvice̍tā̱ apā̍ vṛdhi̱ pari̍vṛta̱ṃ na rādha̍:
||2||य इ॑न्द्र॒ शुष्मो॑ मघवन्ते॒ अस्ति॒ शिक्षा॒ सखि॑भ्यः पुरुहूत॒ नृभ्य॑: ।
त्वं हि दृ॒ळ्हा म॑घव॒न्विचे॑ता॒ अपा॑ वृधि॒ परि॑वृतं॒ न राध॑:
indro̱ rājā̱ jaga̍taścarṣaṇī̱nāmadhi̱ kṣami̱ viṣu̍rūpa̱ṃ yadasti̍ |
tato̍ dadāti dā̱śuṣe̱ vasū̍ni̱ coda̱drādha̱ upa̍stutaścida̱rvāk
||3||इन्द्रो॒ राजा॒ जग॑तश्चर्षणी॒नामधि॒ क्षमि॒ विषु॑रूपं॒ यदस्ति॑ ।
ततो॑ ददाति दा॒शुषे॒ वसू॑नि॒ चोद॒द्राध॒ उप॑स्तुतश्चिद॒र्वाक्
nū ci̍nna̱ indro̍ ma̱ghavā̱ sahū̍tī dā̱no vāja̱ṃ ni ya̍mate na ū̱tī |
anū̍nā̱ yasya̱ dakṣi̍ṇā pī̱pāya̍ vā̱maṃ nṛbhyo̍ a̱bhivī̍tā̱ sakhi̍bhyaḥ
||4||नू चि॑न्न॒ इन्द्रो॑ म॒घवा॒ सहू॑ती दा॒नो वाजं॒ नि य॑मते न ऊ॒ती ।
अनू॑ना॒ यस्य॒ दक्षि॑णा पी॒पाय॑ वा॒मं नृभ्यो॑ अ॒भिवी॑ता॒ सखि॑भ्यः
nū i̍ndra rā̱ye vari̍vaskṛdhī na̱ ā te̱ mano̍ vavṛtyāma ma̱ghāya̍ |
goma̱daśvā̍va̱dratha̍va̱dvyanto̍ yū̱yaṃ pā̍ta sva̱stibhi̱: sadā̍ naḥ
||5||नू इ॑न्द्र रा॒ये वरि॑वस्कृधी न॒ आ ते॒ मनो॑ ववृत्याम म॒घाय॑ ।
गोम॒दश्वा॑व॒द्रथ॑व॒द्व्यन्तो॑ यू॒यं पा॑त स्व॒स्तिभि॒: सदा॑ नः