Study
- Anukramaṇī
- Source
12 maitrāvaruṇirvasiṣṭha:| 1-11 maruta:, 12 rūdra: ( mṛtyuvimocinī ṛk ) | pragātha: = ( viṣamā bṛhatī, samā satobṛhatī ), 7-8, 9-11 gāyatrī, 12 anuṣṭup |
yaṃ trāya̍dhva i̱dami̍da̱ṃ devā̍so̱ yaṃ ca̱ naya̍tha| tasmā̍ agne̱ varu̍ṇa̱ mitrārya̍ma̱nmaru̍ta̱: śarma̍ yacchata
||1||यं त्राय॑ध्व इ॒दमि॑दं॒ देवा॑सो॒ यं च॒ नय॑थ। तस्मा॑ अग्ने॒ वरु॑ण॒ मित्रार्य॑म॒न्मरु॑त॒: शर्म॑ यच्छत
yu̱ṣmāka̍ṃ devā̱ ava̱sāha̍ni pri̱ya ī̍jā̱nasta̍rati̱ dviṣa̍: |
pra sa kṣaya̍ṃ tirate̱ vi ma̱hīriṣo̱ yo vo̱ varā̍ya̱ dāśa̍ti
||2||यु॒ष्माकं॑ देवा॒ अव॒साह॑नि प्रि॒य ई॑जा॒नस्त॑रति॒ द्विष॑: ।
प्र स क्षयं॑ तिरते॒ वि म॒हीरिषो॒ यो वो॒ वरा॑य॒ दाश॑ति
na̱hi va̍ścara̱maṃ ca̱na vasi̍ṣṭhaḥ pari̱maṃsa̍te | a̱smāka̍ma̱dya ma̍rutaḥ su̱te sacā̱ viśve̍ pibata kā̱mina̍:
||3||न॒हि व॑श्चर॒मं च॒न वसि॑ष्ठः परि॒मंस॑ते । अ॒स्माक॑म॒द्य म॑रुतः सु॒ते सचा॒ विश्वे॑ पिबत का॒मिन॑:
na̱hi va̍ ū̱tiḥ pṛta̍nāsu̱ mardha̍ti̱ yasmā̱ arā̍dhvaṃ naraḥ |
a̱bhi va̱ āva̍rtsuma̱tirnavī̍yasī̱ tūya̍ṃ yāta pipīṣavaḥ
||4||न॒हि व॑ ऊ॒तिः पृत॑नासु॒ मर्ध॑ति॒ यस्मा॒ अरा॑ध्वं नरः ।
अ॒भि व॒ आव॑र्त्सुम॒तिर्नवी॑यसी॒ तूयं॑ यात पिपीषवः
o ṣu ghṛ̍ṣvirādhaso yā̱tanāndhā̍ṃsi pī̱taye̍ |
i̱mā vo̍ ha̱vyā ma̍ruto ra̱re hi ka̱ṃ mo ṣva1nyatra̍ gantana
||5||ओ षु घृ॑ष्विराधसो या॒तनान्धां॑सि पी॒तये॑ ।
इ॒मा वो॑ ह॒व्या म॑रुतो र॒रे हि कं॒ मो ष्व१न्यत्र॑ गन्तन
ā ca̍ no ba̱rhiḥ sada̍tāvi̱tā ca̍ naḥ spā̱rhāṇi̱ dāta̍ve̱ vasu̍ |
asre̍dhanto marutaḥ so̱mye madhau̱ svāhe̱ha mā̍dayādhvai
||6||आ च॑ नो ब॒र्हिः सद॑तावि॒ता च॑ नः स्पा॒र्हाणि॒ दात॑वे॒ वसु॑ ।
अस्रे॑धन्तो मरुतः सो॒म्ये मधौ॒ स्वाहे॒ह मा॑दयाध्वै
sa̱svaści̱ddhi ta̱nva1: śumbha̍mānā̱ ā ha̱ṃsāso̱ nīla̍pṛṣṭhā apaptan |
viśva̱ṃ śardho̍ a̱bhito̍ mā̱ ni ṣe̍da̱ naro̱ na ra̱ṇvāḥ sava̍ne̱ mada̍ntaḥ
||7||स॒स्वश्चि॒द्धि त॒न्व१: शुम्भ॑माना॒ आ हं॒सासो॒ नील॑पृष्ठा अपप्तन् ।
विश्वं॒ शर्धो॑ अ॒भितो॑ मा॒ नि षे॑द॒ नरो॒ न र॒ण्वाः सव॑ने॒ मद॑न्तः
yo no̍ maruto a̱bhi du̍rhṛṇā̱yusti̱raści̱ttāni̍ vasavo̱ jighā̍ṃsati |
dru̱haḥ pāśā̱nprati̱ sa mu̍cīṣṭa̱ tapi̍ṣṭhena̱ hanma̍nā hantanā̱ tam
||8||यो नो॑ मरुतो अ॒भि दु॑र्हृणा॒युस्ति॒रश्चि॒त्तानि॑ वसवो॒ जिघां॑सति ।
द्रु॒हः पाशा॒न्प्रति॒ स मु॑चीष्ट॒ तपि॑ष्ठेन॒ हन्म॑ना हन्तना॒ तम्
sāṃta̍panā i̱daṃ ha̱virmaru̍ta̱stajju̍juṣṭana | yu̱ṣmāko̱tī ri̍śādasaḥ
||9||सांत॑पना इ॒दं ह॒विर्मरु॑त॒स्तज्जु॑जुष्टन । यु॒ष्माको॒ती रि॑शादसः
gṛha̍medhāsa̱ ā ga̍ta̱ maru̍to̱ māpa̍ bhūtana | yu̱ṣmāko̱tī su̍dānavaḥ
||10||गृह॑मेधास॒ आ ग॑त॒ मरु॑तो॒ माप॑ भूतन । यु॒ष्माको॒ती सु॑दानवः
i̱heha̍ vaḥ svatavasa̱: kava̍ya̱: sūrya̍tvacaḥ | ya̱jñaṃ ma̍ruta̱ ā vṛ̍ṇe
||11||इ॒हेह॑ वः स्वतवस॒: कव॑य॒: सूर्य॑त्वचः । य॒ज्ञं म॑रुत॒ आ वृ॑णे
trya̍mbakaṃ yajāmahe su̱gandhi̍ṃ puṣṭi̱vardha̍nam | u̱rvā̱ru̱kami̍va̱ bandha̍nānmṛ̱tyormu̍kṣīya̱ māmṛtā̍t
||12||त्र्य॑म्बकं यजामहे सु॒गन्धिं॑ पुष्टि॒वर्ध॑नम् । उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ मामृता॑त्