Study
- Anukramaṇī
- Source
7 maitrāvaruṇirvasiṣṭha:| mitrāvaruṇau | triṣṭup |
udvā̱ṃ cakṣu̍rvaruṇa su̱pratī̍kaṃ de̱vayo̍reti̱ sūrya̍stata̱nvān |
a̱bhi yo viśvā̱ bhuva̍nāni̱ caṣṭe̱ sa ma̱nyuṃ martye̱ṣvā ci̍keta
||1||उद्वां॒ चक्षु॑र्वरुण सु॒प्रती॑कं दे॒वयो॑रेति॒ सूर्य॑स्तत॒न्वान् ।
अ॒भि यो विश्वा॒ भुव॑नानि॒ चष्टे॒ स म॒न्युं मर्त्ये॒ष्वा चि॑केत
pra vā̱ṃ sa mi̍trāvaruṇāvṛ̱tāvā̱ vipro̱ manmā̍ni dīrgha̱śrudi̍yarti |
yasya̱ brahmā̍ṇi sukratū̱ avā̍tha̱ ā yatkratvā̱ na śa̱rada̍: pṛ̱ṇaithe̍
||2||प्र वां॒ स मि॑त्रावरुणावृ॒तावा॒ विप्रो॒ मन्मा॑नि दीर्घ॒श्रुदि॑यर्ति ।
यस्य॒ ब्रह्मा॑णि सुक्रतू॒ अवा॑थ॒ आ यत्क्रत्वा॒ न श॒रद॑: पृ॒णैथे॑
prorormi̍trāvaruṇā pṛthi̱vyāḥ pra di̱va ṛ̱ṣvādbṛ̍ha̱taḥ su̍dānū |
spaśo̍ dadhāthe̱ oṣa̍dhīṣu vi̱kṣvṛdha̍gya̱to ani̍miṣa̱ṃ rakṣa̍māṇā
||3||प्रोरोर्मि॑त्रावरुणा पृथि॒व्याः प्र दि॒व ऋ॒ष्वाद्बृ॑ह॒तः सु॑दानू ।
स्पशो॑ दधाथे॒ ओष॑धीषु वि॒क्ष्वृध॑ग्य॒तो अनि॑मिषं॒ रक्ष॑माणा
śaṃsā̍ mi̱trasya̱ varu̍ṇasya̱ dhāma̱ śuṣmo̱ roda̍sī badbadhe mahi̱tvā |
aya̱nmāsā̱ aya̍jvanāma̱vīrā̱: pra ya̱jñama̍nmā vṛ̱jana̍ṃ tirāte
||4||शंसा॑ मि॒त्रस्य॒ वरु॑णस्य॒ धाम॒ शुष्मो॒ रोद॑सी बद्बधे महि॒त्वा ।
अय॒न्मासा॒ अय॑ज्वनाम॒वीरा॒: प्र य॒ज्ञम॑न्मा वृ॒जनं॑ तिराते
amū̍rā̱ viśvā̍ vṛṣaṇāvi̱mā vā̱ṃ na yāsu̍ ci̱traṃ dadṛ̍śe̱ na ya̱kṣam |
druha̍: sacante̱ anṛ̍tā̱ janā̍nā̱ṃ na vā̍ṃ ni̱ṇyānya̱cite̍ abhūvan
||5||अमू॑रा॒ विश्वा॑ वृषणावि॒मा वां॒ न यासु॑ चि॒त्रं ददृ॑शे॒ न य॒क्षम् ।
द्रुह॑: सचन्ते॒ अनृ॑ता॒ जना॑नां॒ न वां॑ नि॒ण्यान्य॒चिते॑ अभूवन्
samu̍ vāṃ ya̱jñaṃ ma̍haya̱ṃ namo̍bhirhu̱ve vā̍ṃ mitrāvaruṇā sa̱bādha̍: |
pra vā̱ṃ manmā̍nyṛ̱case̱ navā̍ni kṛ̱tāni̱ brahma̍ jujuṣanni̱māni̍
||6||समु॑ वां य॒ज्ञं म॑हयं॒ नमो॑भिर्हु॒वे वां॑ मित्रावरुणा स॒बाध॑: ।
प्र वां॒ मन्मा॑न्यृ॒चसे॒ नवा॑नि कृ॒तानि॒ ब्रह्म॑ जुजुषन्नि॒मानि॑
i̱yaṃ de̍va pu̱rohi̍tiryu̱vabhyā̍ṃ ya̱jñeṣu̍ mitrāvaruṇāvakāri |
viśvā̍ni du̱rgā pi̍pṛtaṃ ti̱ro no̍ yū̱yaṃ pā̍ta sva̱stibhi̱: sadā̍ naḥ
||7||इ॒यं दे॑व पु॒रोहि॑तिर्यु॒वभ्यां॑ य॒ज्ञेषु॑ मित्रावरुणावकारि ।
विश्वा॑नि दु॒र्गा पि॑पृतं ति॒रो नो॑ यू॒यं पा॑त स्व॒स्तिभि॒: सदा॑ नः