Study
- Anukramaṇī
- Source
27 (1-25) maitrāvaruṇirvasiṣṭha: , 26 pūrvārdharcasya śaktirvāsiṣṭho vā (śāṭyāyane brāhmaṇe),26-27 śaktirvāsiṣṭho vā (tāṇḍake brāhmaṇe) | indra: | pragātha: – (bṛhatī , satobṛhatī),3 dvipadā virāṭ |
mo ṣu tvā̍ vā̱ghata̍śca̱nā''re a̱smanni rī̍raman |
ā̱rāttā̍ccitsadha̱māda̍ṃ na̱ ā ga̍hī̱ha vā̱ sannupa̍ śrudhi
||1||मो षु त्वा॑ वा॒घत॑श्च॒नाऽऽरे अ॒स्मन्नि री॑रमन् ।
आ॒रात्ता॑च्चित्सध॒मादं॑ न॒ आ ग॑ही॒ह वा॒ सन्नुप॑ श्रुधि
i̱me hi te̍ brahma̱kṛta̍: su̱te sacā̱ madhau̱ na makṣa̱ āsa̍te |
indre̱ kāma̍ṃ jari̱tāro̍ vasū̱yavo̱ rathe̱ na pāda̱mā da̍dhuḥ
||2||इ॒मे हि ते॑ ब्रह्म॒कृत॑: सु॒ते सचा॒ मधौ॒ न मक्ष॒ आस॑ते ।
इन्द्रे॒ कामं॑ जरि॒तारो॑ वसू॒यवो॒ रथे॒ न पाद॒मा द॑धुः
rā̱yaskā̍mo̱ vajra̍hastaṃ su̱dakṣi̍ṇaṃ pu̱tro na pi̱tara̍ṃ huve
||3||रा॒यस्का॑मो॒ वज्र॑हस्तं सु॒दक्षि॑णं पु॒त्रो न पि॒तरं॑ हुवे
i̱ma indrā̍ya sunvire̱ somā̍so̱ dadhyā̍śiraḥ |
tām̐ ā madā̍ya vajrahasta pī̱taye̱ hari̍bhyāṃ yā̱hyoka̱ ā
||4||इ॒म इन्द्रा॑य सुन्विरे॒ सोमा॑सो॒ दध्या॑शिरः ।
ताँ आ मदा॑य वज्रहस्त पी॒तये॒ हरि॑भ्यां या॒ह्योक॒ आ
śrava̱cchrutka̍rṇa īyate̱ vasū̍nā̱ṃ nū ci̍nno mardhiṣa̱dgira̍: |
sa̱dyaści̱dyaḥ sa̱hasrā̍ṇi śa̱tā dada̱nnaki̱rditsa̍nta̱mā mi̍nat
||5||श्रव॒च्छ्रुत्क॑र्ण ईयते॒ वसू॑नां॒ नू चि॑न्नो मर्धिष॒द्गिर॑: ।
स॒द्यश्चि॒द्यः स॒हस्रा॑णि श॒ता दद॒न्नकि॒र्दित्स॑न्त॒मा मि॑नत्
sa vī̱ro apra̍tiṣkuta̱ indre̍ṇa śūśuve̱ nṛbhi̍: |
yaste̍ gabhī̱rā sava̍nāni vṛtrahantsu̱notyā ca̱ dhāva̍ti
||6||स वी॒रो अप्र॑तिष्कुत॒ इन्द्रे॑ण शूशुवे॒ नृभि॑: ।
यस्ते॑ गभी॒रा सव॑नानि वृत्रहन्त्सु॒नोत्या च॒ धाव॑ति
bhavā̱ varū̍thaṃ maghavanma̱ghonā̱ṃ yatsa̱majā̍si̱ śardha̍taḥ |
vi tvāha̍tasya̱ veda̍naṃ bhajema̱hyā dū̱ṇāśo̍ bharā̱ gaya̍m
||7||भवा॒ वरू॑थं मघवन्म॒घोनां॒ यत्स॒मजा॑सि॒ शर्ध॑तः ।
वि त्वाह॑तस्य॒ वेद॑नं भजेम॒ह्या दू॒णाशो॑ भरा॒ गय॑म्
su̱notā̍ soma̱pāvne̱ soma̱mindrā̍ya va̱jriṇe̍ |
paca̍tā pa̱ktīrava̍se kṛṇu̱dhvamitpṛ̱ṇannitpṛ̍ṇa̱te maya̍:
||8||सु॒नोता॑ सोम॒पाव्ने॒ सोम॒मिन्द्रा॑य व॒ज्रिणे॑ ।
पच॑ता प॒क्तीरव॑से कृणु॒ध्वमित्पृ॒णन्नित्पृ॑ण॒ते मय॑:
mā sre̍dhata somino̱ dakṣa̍tā ma̱he kṛ̍ṇu̱dhvaṃ rā̱ya ā̱tuje̍ |
ta̱raṇi̱rijja̍yati̱ kṣeti̱ puṣya̍ti̱ na de̱vāsa̍: kava̱tnave̍
||9||मा स्रे॑धत सोमिनो॒ दक्ष॑ता म॒हे कृ॑णु॒ध्वं रा॒य आ॒तुजे॑ ।
त॒रणि॒रिज्ज॑यति॒ क्षेति॒ पुष्य॑ति॒ न दे॒वास॑: कव॒त्नवे॑
naki̍: su̱dāso̱ ratha̱ṃ paryā̍sa̱ na rī̍ramat |
indro̱ yasyā̍vi̱tā yasya̍ ma̱ruto̱ gama̱tsa goma̍ti vra̱je
||10||नकि॑: सु॒दासो॒ रथं॒ पर्या॑स॒ न री॑रमत् ।
इन्द्रो॒ यस्या॑वि॒ता यस्य॑ म॒रुतो॒ गम॒त्स गोम॑ति व्र॒जे
gama̱dvāja̍ṃ vā̱jaya̍nnindra̱ martyo̱ yasya̱ tvama̍vi̱tā bhuva̍: |
a̱smāka̍ṃ bodhyavi̱tā rathā̍nāma̱smāka̍ṃ śūra nṛ̱ṇām
||11||गम॒द्वाजं॑ वा॒जय॑न्निन्द्र॒ मर्त्यो॒ यस्य॒ त्वम॑वि॒ता भुव॑: ।
अ॒स्माकं॑ बोध्यवि॒ता रथा॑नाम॒स्माकं॑ शूर नृ॒णाम्
udinnva̍sya ricya̱teṃ'śo̱ dhana̱ṃ na ji̱gyuṣa̍: |
ya indro̱ hari̍vā̱nna da̍bhanti̱ taṃ ripo̱ dakṣa̍ṃ dadhāti so̱mini̍
||12||उदिन्न्व॑स्य रिच्य॒तेंऽशो॒ धनं॒ न जि॒ग्युष॑: ।
य इन्द्रो॒ हरि॑वा॒न्न द॑भन्ति॒ तं रिपो॒ दक्षं॑ दधाति सो॒मिनि॑
mantra̱makha̍rva̱ṃ sudhi̍taṃ su̱peśa̍sa̱ṃ dadhā̍ta ya̱jñiye̱ṣvā |
pū̱rvīśca̱na prasi̍tayastaranti̱ taṃ ya indre̱ karma̍ṇā̱ bhuva̍t
||13||मन्त्र॒मख॑र्वं॒ सुधि॑तं सु॒पेश॑सं॒ दधा॑त य॒ज्ञिये॒ष्वा ।
पू॒र्वीश्च॒न प्रसि॑तयस्तरन्ति॒ तं य इन्द्रे॒ कर्म॑णा॒ भुव॑त्
kastami̍ndra̱ tvāva̍su̱mā martyo̍ dadharṣati |
śra̱ddhā itte̍ maghava̱npārye̍ di̱vi vā̱jī vāja̍ṃ siṣāsati
||14||कस्तमि॑न्द्र॒ त्वाव॑सु॒मा मर्त्यो॑ दधर्षति ।
श्र॒द्धा इत्ते॑ मघव॒न्पार्ये॑ दि॒वि वा॒जी वाजं॑ सिषासति
ma̱ghona̍: sma vṛtra̱hatye̍ṣu codaya̱ ye dada̍ti pri̱yā vasu̍ |
tava̱ praṇī̍tī haryaśva sū̱ribhi̱rviśvā̍ tarema duri̱tā
||15||म॒घोन॑: स्म वृत्र॒हत्ये॑षु चोदय॒ ये दद॑ति प्रि॒या वसु॑ ।
तव॒ प्रणी॑ती हर्यश्व सू॒रिभि॒र्विश्वा॑ तरेम दुरि॒ता
tavedi̍ndrāva̱maṃ vasu̱ tvaṃ pu̍ṣyasi madhya̱mam |
sa̱trā viśva̍sya para̱masya̍ rājasi̱ naki̍ṣṭvā̱ goṣu̍ vṛṇvate
||16||तवेदि॑न्द्राव॒मं वसु॒ त्वं पु॑ष्यसि मध्य॒मम् ।
स॒त्रा विश्व॑स्य पर॒मस्य॑ राजसि॒ नकि॑ष्ट्वा॒ गोषु॑ वृण्वते
tvaṃ viśva̍sya dhana̱dā a̍si śru̱to ya ī̱ṃ bhava̍ntyā̱jaya̍: |
tavā̱yaṃ viśva̍: puruhūta̱ pārthi̍vo'va̱syurnāma̍ bhikṣate
||17||त्वं विश्व॑स्य धन॒दा अ॑सि श्रु॒तो य ईं॒ भव॑न्त्या॒जय॑: ।
तवा॒यं विश्व॑: पुरुहूत॒ पार्थि॑वोऽव॒स्युर्नाम॑ भिक्षते
yadi̍ndra̱ yāva̍ta̱stvame̱tāva̍da̱hamīśī̍ya |
sto̱tāra̱middi̍dhiṣeya radāvaso̱ na pā̍pa̱tvāya̍ rāsīya
||18||यदि॑न्द्र॒ याव॑त॒स्त्वमे॒ताव॑द॒हमीशी॑य ।
स्तो॒तार॒मिद्दि॑धिषेय रदावसो॒ न पा॑प॒त्वाय॑ रासीय
śikṣe̍ya̱minma̍haya̱te di̱vedi̍ve rā̱ya ā ku̍haci̱dvide̍ |
na̱hi tvada̱nyanma̍ghavanna̱ āpya̱ṃ vasyo̱ asti̍ pi̱tā ca̱na
||19||शिक्षे॑य॒मिन्म॑हय॒ते दि॒वेदि॑वे रा॒य आ कु॑हचि॒द्विदे॑ ।
न॒हि त्वद॒न्यन्म॑घवन्न॒ आप्यं॒ वस्यो॒ अस्ति॑ पि॒ता च॒न
ta̱raṇi̱ritsi̍ṣāsati̱ vāja̱ṃ pura̍ṃdhyā yu̱jā |
ā va̱ indra̍ṃ puruhū̱taṃ na̍me gi̱rā ne̱miṃ taṣṭe̍va su̱drva̍m
||20||त॒रणि॒रित्सि॑षासति॒ वाजं॒ पुरं॑ध्या यु॒जा ।
आ व॒ इन्द्रं॑ पुरुहू॒तं न॑मे गि॒रा ने॒मिं तष्टे॑व सु॒द्र्व॑म्
na du̍:ṣṭu̱tī martyo̍ vindate̱ vasu̱ na sredha̍ntaṃ ra̱yirna̍śat |
su̱śakti̱rinma̍ghava̱ntubhya̱ṃ māva̍te de̱ṣṇaṃ yatpārye̍ di̱vi
||21||न दु॑:ष्टु॒ती मर्त्यो॑ विन्दते॒ वसु॒ न स्रेध॑न्तं र॒यिर्न॑शत् ।
सु॒शक्ति॒रिन्म॑घव॒न्तुभ्यं॒ माव॑ते दे॒ष्णं यत्पार्ये॑ दि॒वि
a̱bhi tvā̍ śūra nonu̱mo'du̍gdhā iva dhe̱nava̍: |
īśā̍nama̱sya jaga̍taḥ sva̱rdṛśa̱mīśā̍namindra ta̱sthuṣa̍:
||22||अ॒भि त्वा॑ शूर नोनु॒मोऽदु॑ग्धा इव धे॒नव॑: ।
ईशा॑नम॒स्य जग॑तः स्व॒र्दृश॒मीशा॑नमिन्द्र त॒स्थुष॑:
na tvāvā̍m̐ a̱nyo di̱vyo na pārthi̍vo̱ na jā̱to na ja̍niṣyate |
a̱śvā̱yanto̍ maghavannindra vā̱jino̍ ga̱vyanta̍stvā havāmahe
||23||न त्वावाँ॑ अ॒न्यो दि॒व्यो न पार्थि॑वो॒ न जा॒तो न ज॑निष्यते ।
अ॒श्वा॒यन्तो॑ मघवन्निन्द्र वा॒जिनो॑ ग॒व्यन्त॑स्त्वा हवामहे
a̱bhī ṣa̱tastadā bha̱rendra̱ jyāya̱: kanī̍yasaḥ | pu̱rū̱vasu̱rhi ma̍ghavantsa̱nādasi̱ bhare̍bhare ca̱ havya̍:
||24||अ॒भी ष॒तस्तदा भ॒रेन्द्र॒ ज्याय॒: कनी॑यसः । पु॒रू॒वसु॒र्हि म॑घवन्त्स॒नादसि॒ भरे॑भरे च॒ हव्य॑:
parā̍ ṇudasva maghavanna̱mitrā̍ntsu̱vedā̍ no̱ vasū̍ kṛdhi |
a̱smāka̍ṃ bodhyavi̱tā ma̍hādha̱ne bhavā̍ vṛ̱dhaḥ sakhī̍nām
||25||परा॑ णुदस्व मघवन्न॒मित्रा॑न्त्सु॒वेदा॑ नो॒ वसू॑ कृधि ।
अ॒स्माकं॑ बोध्यवि॒ता म॑हाध॒ने भवा॑ वृ॒धः सखी॑नाम्
indra̱ kratu̍ṃ na̱ ā bha̍ra pi̱tā pu̱trebhyo̱ yathā̍ |
śikṣā̍ ṇo a̱sminpu̍ruhūta̱ yāma̍ni jī̱vā jyoti̍raśīmahi
||26||इन्द्र॒ क्रतुं॑ न॒ आ भ॑र पि॒ता पु॒त्रेभ्यो॒ यथा॑ ।
शिक्षा॑ णो अ॒स्मिन्पु॑रुहूत॒ याम॑नि जी॒वा ज्योति॑रशीमहि
mā no̱ ajñā̍tā vṛ̱janā̍ durā̱dhyo̱3 māśi̍vāso̱ ava̍ kramuḥ |
tvayā̍ va̱yaṃ pra̱vata̱: śaśva̍tīra̱po'ti̍ śūra tarāmasi
||27||मा नो॒ अज्ञा॑ता वृ॒जना॑ दुरा॒ध्यो॒३ माशि॑वासो॒ अव॑ क्रमुः ।
त्वया॑ व॒यं प्र॒वत॒: शश्व॑तीर॒पोऽति॑ शूर तरामसि