Study
- Anukramaṇī
- Source
6 maitrāvaruṇirvasiṣṭha:| indra: | triṣṭup |
yoni̍ṣṭa indra̱ sada̍ne akāri̱ tamā nṛbhi̍: puruhūta̱ pra yā̍hi |
aso̱ yathā̍ no'vi̱tā vṛ̱dhe ca̱ dado̱ vasū̍ni ma̱mada̍śca̱ somai̍:
||1||योनि॑ष्ट इन्द्र॒ सद॑ने अकारि॒ तमा नृभि॑: पुरुहूत॒ प्र या॑हि ।
असो॒ यथा॑ नोऽवि॒ता वृ॒धे च॒ ददो॒ वसू॑नि म॒मद॑श्च॒ सोमै॑:
gṛ̱bhī̱taṃ te̱ mana̍ indra dvi̱barhā̍: su̱taḥ soma̱: pari̍ṣiktā̱ madhū̍ni |
visṛ̍ṣṭadhenā bharate suvṛ̱ktiri̱yamindra̱ṃ johu̍vatī manī̱ṣā
||2||गृ॒भी॒तं ते॒ मन॑ इन्द्र द्वि॒बर्हा॑: सु॒तः सोम॒: परि॑षिक्ता॒ मधू॑नि ।
विसृ॑ष्टधेना भरते सुवृ॒क्तिरि॒यमिन्द्रं॒ जोहु॑वती मनी॒षा
ā no̍ di̱va ā pṛ̍thi̱vyā ṛ̍jīṣinni̱daṃ ba̱rhiḥ so̍ma̱peyā̍ya yāhi |
vaha̍ntu tvā̱ hara̍yo ma̱drya̍ñcamāṅgū̱ṣamacchā̍ ta̱vasa̱ṃ madā̍ya
||3||आ नो॑ दि॒व आ पृ॑थि॒व्या ऋ॑जीषिन्नि॒दं ब॒र्हिः सो॑म॒पेया॑य याहि ।
वह॑न्तु त्वा॒ हर॑यो म॒द्र्य॑ञ्चमाङ्गू॒षमच्छा॑ त॒वसं॒ मदा॑य
ā no̱ viśvā̍bhirū̱tibhi̍: sa̱joṣā̱ brahma̍ juṣā̱ṇo ha̍ryaśva yāhi |
varī̍vṛja̱tsthavi̍rebhiḥ suśiprā̱'sme dadha̱dvṛṣa̍ṇa̱ṃ śuṣma̍mindra
||4||आ नो॒ विश्वा॑भिरू॒तिभि॑: स॒जोषा॒ ब्रह्म॑ जुषा॒णो ह॑र्यश्व याहि ।
वरी॑वृज॒त्स्थवि॑रेभिः सुशिप्रा॒ऽस्मे दध॒द्वृष॑णं॒ शुष्म॑मिन्द्र
e̱ṣa stomo̍ ma̱ha u̱grāya̱ vāhe̍ dhu̱rī̱3vātyo̱ na vā̱jaya̍nnadhāyi |
indra̍ tvā̱yama̱rka ī̍ṭṭe̱ vasū̍nāṃ di̱vī̍va̱ dyāmadhi̍ na̱: śroma̍taṃ dhāḥ
||5||ए॒ष स्तोमो॑ म॒ह उ॒ग्राय॒ वाहे॑ धु॒री॒३वात्यो॒ न वा॒जय॑न्नधायि ।
इन्द्र॑ त्वा॒यम॒र्क ई॑ट्टे॒ वसू॑नां दि॒वी॑व॒ द्यामधि॑ न॒: श्रोम॑तं धाः
e̱vā na̍ indra̱ vārya̍sya pūrdhi̱ pra te̍ ma̱hīṃ su̍ma̱tiṃ ve̍vidāma |
iṣa̍ṃ pinva ma̱ghava̍dbhyaḥ su̱vīrā̍ṃ yū̱yaṃ pā̍ta sva̱stibhi̱: sadā̍ naḥ
||6||ए॒वा न॑ इन्द्र॒ वार्य॑स्य पूर्धि॒ प्र ते॑ म॒हीं सु॑म॒तिं वे॑विदाम ।
इषं॑ पिन्व म॒घव॑द्भ्यः सु॒वीरां॑ यू॒यं पा॑त स्व॒स्तिभि॒: सदा॑ नः