Study
- Anukramaṇī
- Source
5 maitrāvaruṇirvasiṣṭha:| indrāvaruṇau | triṣṭup |
pu̱nī̱ṣe vā̍mara̱kṣasa̍ṃ manī̱ṣāṃ soma̱mindrā̍ya̱ varu̍ṇāya̱ juhva̍t |
ghṛ̱tapra̍tīkāmu̱ṣasa̱ṃ na de̱vīṃ tā no̱ yāma̍nnuruṣyatāma̱bhīke̍
||1||पु॒नी॒षे वा॑मर॒क्षसं॑ मनी॒षां सोम॒मिन्द्रा॑य॒ वरु॑णाय॒ जुह्व॑त् ।
घृ॒तप्र॑तीकामु॒षसं॒ न दे॒वीं ता नो॒ याम॑न्नुरुष्यताम॒भीके॑
spardha̍nte̱ vā u̍ deva̱hūye̱ atra̱ yeṣu̍ dhva̱jeṣu̍ di̱dyava̱: pata̍nti |
yu̱vaṃ tām̐ i̍ndrāvaruṇāva̱mitrā̍nha̱taṃ parā̍ca̱: śarvā̱ viṣū̍caḥ
||2||स्पर्ध॑न्ते॒ वा उ॑ देव॒हूये॒ अत्र॒ येषु॑ ध्व॒जेषु॑ दि॒द्यव॒: पत॑न्ति ।
यु॒वं ताँ इ॑न्द्रावरुणाव॒मित्रा॑न्ह॒तं परा॑च॒: शर्वा॒ विषू॑चः
āpa̍ści̱ddhi svaya̍śasa̱: sada̍:su de̱vīrindra̱ṃ varu̍ṇaṃ de̱vatā̱ dhuḥ |
kṛ̱ṣṭīra̱nyo dhā̱raya̍ti̱ pravi̍ktā vṛ̱trāṇya̱nyo a̍pra̱tīni̍ hanti
||3||आप॑श्चि॒द्धि स्वय॑शस॒: सद॑:सु दे॒वीरिन्द्रं॒ वरु॑णं दे॒वता॒ धुः ।
कृ॒ष्टीर॒न्यो धा॒रय॑ति॒ प्रवि॑क्ता वृ॒त्राण्य॒न्यो अ॑प्र॒तीनि॑ हन्ति
sa su̱kratu̍ṝta̱cida̍stu̱ hotā̱ ya ā̍ditya̱ śava̍sā vā̱ṃ nama̍svān |
ā̱va̱varta̱dava̍se vāṃ ha̱viṣmā̱nasa̱ditsa su̍vi̱tāya̱ praya̍svān
||4||स सु॒क्रतु॑ॠत॒चिद॑स्तु॒ होता॒ य आ॑दित्य॒ शव॑सा वां॒ नम॑स्वान् ।
आ॒व॒वर्त॒दव॑से वां ह॒विष्मा॒नस॒दित्स सु॑वि॒ताय॒ प्रय॑स्वान्
i̱yamindra̱ṃ varu̍ṇamaṣṭa me̱ gīḥ prāva̍tto̱ke tana̍ye̱ tūtu̍jānā |
su̱ratnā̍so de̱vavī̍tiṃ gamema yū̱yaṃ pā̍ta sva̱stibhi̱: sadā̍ naḥ
||5||इ॒यमिन्द्रं॒ वरु॑णमष्ट मे॒ गीः प्राव॑त्तो॒के तन॑ये॒ तूतु॑जाना ।
सु॒रत्ना॑सो दे॒ववी॑तिं गमेम यू॒यं पा॑त स्व॒स्तिभि॒: सदा॑ नः