Study
- Anukramaṇī
- Source
5 | maitrāvaruṇirvasiṣṭha:| agni: | triṣṭup
u̱ṣo na jā̱raḥ pṛ̱thu pājo̍ aśre̱ddavi̍dyuta̱ddīdya̱cchośu̍cānaḥ |
vṛṣā̱ hari̱: śuci̱rā bhā̍ti bhā̱sā dhiyo̍ hinvā̱na u̍śa̱tīra̍jīgaḥ
||1||उ॒षो न जा॒रः पृ॒थु पाजो॑ अश्रे॒द्दवि॑द्युत॒द्दीद्य॒च्छोशु॑चानः ।
वृषा॒ हरि॒: शुचि॒रा भा॑ति भा॒सा धियो॑ हिन्वा॒न उ॑श॒तीर॑जीगः
sva1rṇa vasto̍ru̱ṣasā̍maroci ya̱jñaṃ ta̍nvā̱nā u̱śijo̱ na manma̍ |
a̱gnirjanmā̍ni de̱va ā vi vi̱dvāndra̱vaddū̱to de̍va̱yāvā̱ vani̍ṣṭhaḥ
||2||स्व१र्ण वस्तो॑रु॒षसा॑मरोचि य॒ज्ञं त॑न्वा॒ना उ॒शिजो॒ न मन्म॑ ।
अ॒ग्निर्जन्मा॑नि दे॒व आ वि वि॒द्वान्द्र॒वद्दू॒तो दे॑व॒यावा॒ वनि॑ष्ठः
acchā̱ giro̍ ma̱tayo̍ deva̱yantī̍ra̱gniṃ ya̍nti̱ dravi̍ṇa̱ṃ bhikṣa̍māṇāḥ |
su̱sa̱ṃdṛśa̍ṃ su̱pratī̍ka̱ṃ svañca̍ṃ havya̱vāha̍mara̱tiṃ mānu̍ṣāṇām
||3||अच्छा॒ गिरो॑ म॒तयो॑ देव॒यन्ती॑र॒ग्निं य॑न्ति॒ द्रवि॑णं॒ भिक्ष॑माणाः ।
सु॒सं॒दृशं॑ सु॒प्रती॑कं॒ स्वञ्चं॑ हव्य॒वाह॑मर॒तिं मानु॑षाणाम्
indra̍ṃ no agne̱ vasu̍bhiḥ sa̱joṣā̍ ru̱draṃ ru̱drebhi̱rā va̍hā bṛ̱hanta̍m |
ā̱di̱tyebhi̱radi̍tiṃ vi̱śvaja̍nyā̱ṃ bṛha̱spati̱mṛkva̍bhirvi̱śvavā̍ram
||4||इन्द्रं॑ नो अग्ने॒ वसु॑भिः स॒जोषा॑ रु॒द्रं रु॒द्रेभि॒रा व॑हा बृ॒हन्त॑म् ।
आ॒दि॒त्येभि॒रदि॑तिं वि॒श्वज॑न्यां॒ बृह॒स्पति॒मृक्व॑भिर्वि॒श्ववा॑रम्
ma̱ndraṃ hotā̍ramu̱śijo̱ yavi̍ṣṭhama̱gniṃ viśa̍ īl̤ate adhva̱reṣu̍ |
sa hi kṣapā̍vā̱m̐ abha̍vadrayī̱ṇāmata̍ndro dū̱to ya̱jathā̍ya de̱vān
||5||म॒न्द्रं होता॑रमु॒शिजो॒ यवि॑ष्ठम॒ग्निं विश॑ ईळते अध्व॒रेषु॑ ।
स हि क्षपा॑वाँ॒ अभ॑वद्रयी॒णामत॑न्द्रो दू॒तो य॒जथा॑य दे॒वान्