Study
- Anukramaṇī
- Source
5 maitrāvaruṇirvasiṣṭha:| uṣasa: | triṣṭup |
vyu1ṣā ā̍vaḥ pa̱thyā̱3 janā̍nā̱ṃ pañca̍ kṣi̱tīrmānu̍ṣīrbo̱dhaya̍ntī |
su̱sa̱ṃdṛgbhi̍ru̱kṣabhi̍rbhā̱numa̍śre̱dvi sūryo̱ roda̍sī̱ cakṣa̍sāvaḥ
||1||व्यु१षा आ॑वः प॒थ्या॒३ जना॑नां॒ पञ्च॑ क्षि॒तीर्मानु॑षीर्बो॒धय॑न्ती ।
सु॒सं॒दृग्भि॑रु॒क्षभि॑र्भा॒नुम॑श्रे॒द्वि सूर्यो॒ रोद॑सी॒ चक्ष॑सावः
vya̍ñjate di̱vo ante̍ṣva̱ktūnviśo̱ na yu̱ktā u̱ṣaso̍ yatante |
saṃ te̱ gāva̱stama̱ ā va̍rtayanti̱ jyoti̍ryacchanti savi̱teva̍ bā̱hū
||2||व्य॑ञ्जते दि॒वो अन्ते॑ष्व॒क्तून्विशो॒ न यु॒क्ता उ॒षसो॑ यतन्ते ।
सं ते॒ गाव॒स्तम॒ आ व॑र्तयन्ति॒ ज्योति॑र्यच्छन्ति सवि॒तेव॑ बा॒हू
abhū̍du̱ṣā indra̍tamā ma̱ghonyajī̍janatsuvi̱tāya̱ śravā̍ṃsi |
vi di̱vo de̱vī du̍hi̱tā da̍dhā̱tyaṅgi̍rastamā su̱kṛte̱ vasū̍ni
||3||अभू॑दु॒षा इन्द्र॑तमा म॒घोन्यजी॑जनत्सुवि॒ताय॒ श्रवां॑सि ।
वि दि॒वो दे॒वी दु॑हि॒ता द॑धा॒त्यङ्गि॑रस्तमा सु॒कृते॒ वसू॑नि
tāva̍duṣo̱ rādho̍ a̱smabhya̍ṃ rāsva̱ yāva̍tsto̱tṛbhyo̱ ara̍do gṛṇā̱nā |
yāṃ tvā̍ ja̱jñurvṛ̍ṣa̱bhasyā̱ rave̍ṇa̱ vi dṛ̱l̤hasya̱ duro̱ adre̍raurṇoḥ
||4||ताव॑दुषो॒ राधो॑ अ॒स्मभ्यं॑ रास्व॒ याव॑त्स्तो॒तृभ्यो॒ अर॑दो गृणा॒ना ।
यां त्वा॑ ज॒ज्ञुर्वृ॑ष॒भस्या॒ रवे॑ण॒ वि दृ॒ळ्हस्य॒ दुरो॒ अद्रे॑रौर्णोः
de̱vaṃde̍va̱ṃ rādha̍se co̱daya̍ntyasma̱drya̍ksū̱nṛtā̍ ī̱raya̍ntī |
vyu̱cchantī̍ naḥ sa̱naye̱ dhiyo̍ dhā yū̱yaṃ pā̍ta sva̱stibhi̱: sadā̍ naḥ
||5||दे॒वंदे॑वं॒ राध॑से चो॒दय॑न्त्यस्म॒द्र्य॑क्सू॒नृता॑ ई॒रय॑न्ती ।
व्यु॒च्छन्ती॑ नः स॒नये॒ धियो॑ धा यू॒यं पा॑त स्व॒स्तिभि॒: सदा॑ नः