Study
- Anukramaṇī
- Source
11 maitrāvaruṇirvasiṣṭha:| indra: | triṣṭup |
yasti̱gmaśṛ̍ṅgo vṛṣa̱bho na bhī̱ma eka̍: kṛ̱ṣṭīścyā̱vaya̍ti̱ pra viśvā̍: |
yaḥ śaśva̍to̱ adā̍śuṣo̱ gaya̍sya praya̱ntāsi̱ suṣvi̍tarāya̱ veda̍:
||1||यस्ति॒ग्मशृ॑ङ्गो वृष॒भो न भी॒म एक॑: कृ॒ष्टीश्च्या॒वय॑ति॒ प्र विश्वा॑: ।
यः शश्व॑तो॒ अदा॑शुषो॒ गय॑स्य प्रय॒न्तासि॒ सुष्वि॑तराय॒ वेद॑:
tvaṃ ha̱ tyadi̍ndra̱ kutsa̍māva̱: śuśrū̍ṣamāṇasta̱nvā̍ sama̱rye |
dāsa̱ṃ yacchuṣṇa̱ṃ kuya̍va̱ṃ nya̍smā̱ ara̍ndhaya ārjune̱yāya̱ śikṣa̍n
||2||त्वं ह॒ त्यदि॑न्द्र॒ कुत्स॑माव॒: शुश्रू॑षमाणस्त॒न्वा॑ सम॒र्ये ।
दासं॒ यच्छुष्णं॒ कुय॑वं॒ न्य॑स्मा॒ अर॑न्धय आर्जुने॒याय॒ शिक्ष॑न्
tvaṃ dhṛ̍ṣṇo dhṛṣa̱tā vī̱taha̍vya̱ṃ prāvo̱ viśvā̍bhirū̱tibhi̍: su̱dāsa̍m |
pra pauru̍kutsiṃ tra̱sada̍syumāva̱: kṣetra̍sātā vṛtra̱hatye̍ṣu pū̱rum
||3||त्वं धृ॑ष्णो धृष॒ता वी॒तह॑व्यं॒ प्रावो॒ विश्वा॑भिरू॒तिभि॑: सु॒दास॑म् ।
प्र पौरु॑कुत्सिं त्र॒सद॑स्युमाव॒: क्षेत्र॑साता वृत्र॒हत्ये॑षु पू॒रुम्
tvaṃ nṛbhi̍rnṛmaṇo de̱vavī̍tau̱ bhūrī̍ṇi vṛ̱trā ha̍ryaśva haṃsi |
tvaṃ ni dasyu̱ṃ cumu̍ri̱ṃ dhuni̱ṃ cā'svā̍payo da̱bhīta̍ye su̱hantu̍
||4||त्वं नृभि॑र्नृमणो दे॒ववी॑तौ॒ भूरी॑णि वृ॒त्रा ह॑र्यश्व हंसि ।
त्वं नि दस्युं॒ चुमु॑रिं॒ धुनिं॒ चाऽस्वा॑पयो द॒भीत॑ये सु॒हन्तु॑
tava̍ cyau̱tnāni̍ vajrahasta̱ tāni̱ nava̱ yatpuro̍ nava̱tiṃ ca̍ sa̱dyaḥ |
ni̱veśa̍ne śatata̱māvi̍veṣī̱raha̍ñca vṛ̱traṃ namu̍cimu̱tāha̍n
||5||तव॑ च्यौ॒त्नानि॑ वज्रहस्त॒ तानि॒ नव॒ यत्पुरो॑ नव॒तिं च॑ स॒द्यः ।
नि॒वेश॑ने शतत॒मावि॑वेषी॒रह॑ञ्च वृ॒त्रं नमु॑चिमु॒ताह॑न्
sanā̱ tā ta̍ indra̱ bhoja̍nāni rā̱taha̍vyāya dā̱śuṣe̍ su̱dāse̍ |
vṛṣṇe̍ te̱ harī̱ vṛṣa̍ṇā yunajmi̱ vyantu̱ brahmā̍ṇi puruśāka̱ vāja̍m
||6||सना॒ ता त॑ इन्द्र॒ भोज॑नानि रा॒तह॑व्याय दा॒शुषे॑ सु॒दासे॑ ।
वृष्णे॑ ते॒ हरी॒ वृष॑णा युनज्मि॒ व्यन्तु॒ ब्रह्मा॑णि पुरुशाक॒ वाज॑म्
mā te̍ a̱syāṃ sa̍hasāva̱npari̍ṣṭāva̱ghāya̍ bhūma harivaḥ parā̱dai |
trāya̍sva no'vṛ̱kebhi̱rvarū̍thai̱stava̍ pri̱yāsa̍: sū̱riṣu̍ syāma
||7||मा ते॑ अ॒स्यां स॑हसाव॒न्परि॑ष्टाव॒घाय॑ भूम हरिवः परा॒दै ।
त्राय॑स्व नोऽवृ॒केभि॒र्वरू॑थै॒स्तव॑ प्रि॒यास॑: सू॒रिषु॑ स्याम
pri̱yāsa̱ itte̍ maghavanna̱bhiṣṭau̱ naro̍ madema śara̱ṇe sakhā̍yaḥ |
ni tu̱rvaśa̱ṃ ni yādva̍ṃ śiśīhyatithi̱gvāya̱ śaṃsya̍ṃ kari̱ṣyan
||8||प्रि॒यास॒ इत्ते॑ मघवन्न॒भिष्टौ॒ नरो॑ मदेम शर॒णे सखा॑यः ।
नि तु॒र्वशं॒ नि याद्वं॑ शिशीह्यतिथि॒ग्वाय॒ शंस्यं॑ करि॒ष्यन्
sa̱dyaści̱nnu te ma̍ghavanna̱bhiṣṭau̱ nara̍: śaṃsantyuktha̱śāsa̍ u̱kthā |
ye te̱ have̍bhi̱rvi pa̱ṇīm̐radā̍śanna̱smānvṛ̍ṇīṣva̱ yujyā̍ya̱ tasmai̍
||9||स॒द्यश्चि॒न्नु ते म॑घवन्न॒भिष्टौ॒ नर॑: शंसन्त्युक्थ॒शास॑ उ॒क्था ।
ये ते॒ हवे॑भि॒र्वि प॒णीँरदा॑शन्न॒स्मान्वृ॑णीष्व॒ युज्या॑य॒ तस्मै॑
e̱te stomā̍ na̱rāṃ nṛ̍tama̱ tubhya̍masma̱drya̍ñco̱ dada̍to ma̱ghāni̍ |
teṣā̍mindra vṛtra̱hatye̍ śi̱vo bhū̱: sakhā̍ ca̱ śūro̍'vi̱tā ca̍ nṛ̱ṇām
||10||ए॒ते स्तोमा॑ न॒रां नृ॑तम॒ तुभ्य॑मस्म॒द्र्य॑ञ्चो॒ दद॑तो म॒घानि॑ ।
तेषा॑मिन्द्र वृत्र॒हत्ये॑ शि॒वो भू॒: सखा॑ च॒ शूरो॑ऽवि॒ता च॑ नृ॒णाम्
nū i̍ndra śūra̱ stava̍māna ū̱tī brahma̍jūtasta̱nvā̍ vāvṛdhasva |
upa̍ no̱ vājā̍nmimī̱hyupa̱ stīnyū̱yaṃ pā̍ta sva̱stibhi̱: sadā̍ naḥ
||11||नू इ॑न्द्र शूर॒ स्तव॑मान ऊ॒ती ब्रह्म॑जूतस्त॒न्वा॑ वावृधस्व ।
उप॑ नो॒ वाजा॑न्मिमी॒ह्युप॒ स्तीन्यू॒यं पा॑त स्व॒स्तिभि॒: सदा॑ नः