Study
- Anukramaṇī
- Source
6 maitrāvaruṇirvasiṣṭha:| agni: | triṣṭup |
abo̍dhi jā̱ra u̱ṣasā̍mu̱pasthā̱ddhotā̍ ma̱ndraḥ ka̱vita̍maḥ pāva̱kaḥ |
dadhā̍ti ke̱tumu̱bhaya̍sya ja̱ntorha̱vyā de̱veṣu̱ dravi̍ṇaṃ su̱kṛtsu̍
||1||अबो॑धि जा॒र उ॒षसा॑मु॒पस्था॒द्धोता॑ म॒न्द्रः क॒वित॑मः पाव॒कः ।
दधा॑ति के॒तुमु॒भय॑स्य ज॒न्तोर्ह॒व्या दे॒वेषु॒ द्रवि॑णं सु॒कृत्सु॑
sa su̱kratu̱ryo vi dura̍: paṇī̱nāṃ pu̍nā̱no a̱rkaṃ pu̍ru̱bhoja̍saṃ naḥ |
hotā̍ ma̱ndro vi̱śāṃ damū̍nāsti̱rastamo̍ dadṛśe rā̱myāṇā̍m
||2||स सु॒क्रतु॒र्यो वि दुर॑: पणी॒नां पु॑ना॒नो अ॒र्कं पु॑रु॒भोज॑सं नः ।
होता॑ म॒न्द्रो वि॒शां दमू॑नास्ति॒रस्तमो॑ ददृशे रा॒म्याणा॑म्
amū̍raḥ ka̱viradi̍tirvi̱vasvā̍ntsusa̱ṃsanmi̱tro ati̍thiḥ śi̱vo na̍: |
ci̱trabhā̍nuru̱ṣasā̍ṃ bhā̱tyagre̱'pāṃ garbha̍: pra̱sva1 ā vi̍veśa
||3||अमू॑रः क॒विरदि॑तिर्वि॒वस्वा॑न्त्सुसं॒सन्मि॒त्रो अति॑थिः शि॒वो न॑: ।
चि॒त्रभा॑नुरु॒षसां॑ भा॒त्यग्रे॒ऽपां गर्भ॑: प्र॒स्व१ आ वि॑वेश
ī̱l̤enyo̍ vo̱ manu̍ṣo yu̱geṣu̍ samana̱gā a̍śucajjā̱tave̍dāḥ |
su̱sa̱ṃdṛśā̍ bhā̱nunā̱ yo vi̱bhāti̱ prati̱ gāva̍: samidhā̱naṃ bu̍dhanta
||4||ई॒ळेन्यो॑ वो॒ मनु॑षो यु॒गेषु॑ समन॒गा अ॑शुचज्जा॒तवे॑दाः ।
सु॒सं॒दृशा॑ भा॒नुना॒ यो वि॒भाति॒ प्रति॒ गाव॑: समिधा॒नं बु॑धन्त
agne̍ yā̱hi dū̱tyaṃ1 mā ri̍ṣaṇyo de̱vām̐ acchā̍ brahma̱kṛtā̍ ga̱ṇena̍ |
sara̍svatīṃ ma̱ruto̍ a̱śvinā̱po yakṣi̍ de̱vānra̍tna̱dheyā̍ya̱ viśvā̍n
||5||अग्ने॑ या॒हि दू॒त्यं१ मा रि॑षण्यो दे॒वाँ अच्छा॑ ब्रह्म॒कृता॑ ग॒णेन॑ ।
सर॑स्वतीं म॒रुतो॑ अ॒श्विना॒पो यक्षि॑ दे॒वान्र॑त्न॒धेया॑य॒ विश्वा॑न्
tvāma̍gne samidhā̱no vasi̍ṣṭho̱ jarū̍thaṃ ha̱nyakṣi̍ rā̱ye pura̍ṃdhim |
pu̱ru̱ṇī̱thā jā̍tavedo jarasva yū̱yaṃ pā̍ta sva̱stibhi̱: sadā̍ naḥ
||6||त्वाम॑ग्ने समिधा॒नो वसि॑ष्ठो॒ जरू॑थं ह॒न्यक्षि॑ रा॒ये पुरं॑धिम् ।
पु॒रु॒णी॒था जा॑तवेदो जरस्व यू॒यं पा॑त स्व॒स्तिभि॒: सदा॑ नः