Study
- Anukramaṇī
- Source
5 maitrāvaruṇirvasiṣṭha:| uṣasa: | triṣṭup |
prati̍ ke̱tava̍: pratha̱mā a̍dṛśrannū̱rdhvā a̍syā a̱ñjayo̱ vi śra̍yante |
uṣo̍ a̱rvācā̍ bṛha̱tā rathe̍na̱ jyoti̍ṣmatā vā̱mama̱smabhya̍ṃ vakṣi
||1||प्रति॑ के॒तव॑: प्रथ॒मा अ॑दृश्रन्नू॒र्ध्वा अ॑स्या अ॒ञ्जयो॒ वि श्र॑यन्ते ।
उषो॑ अ॒र्वाचा॑ बृह॒ता रथे॑न॒ ज्योति॑ष्मता वा॒मम॒स्मभ्यं॑ वक्षि
prati̍ ṣīma̱gnirja̍rate̱ sami̍ddha̱: prati̱ viprā̍so ma̱tibhi̍rgṛ̱ṇanta̍: |
u̱ṣā yā̍ti̱ jyoti̍ṣā̱ bādha̍mānā̱ viśvā̱ tamā̍ṃsi duri̱tāpa̍ de̱vī
||2||प्रति॑ षीम॒ग्निर्ज॑रते॒ समि॑द्ध॒: प्रति॒ विप्रा॑सो म॒तिभि॑र्गृ॒णन्त॑: ।
उ॒षा या॑ति॒ ज्योति॑षा॒ बाध॑माना॒ विश्वा॒ तमां॑सि दुरि॒ताप॑ दे॒वी
e̱tā u̱ tyāḥ pratya̍dṛśranpu̱rastā̱jjyoti̱ryaccha̍ntīru̱ṣaso̍ vibhā̱tīḥ |
ajī̍jana̱ntsūrya̍ṃ ya̱jñama̱gnima̍pā̱cīna̱ṃ tamo̍ agā̱daju̍ṣṭam
||3||ए॒ता उ॒ त्याः प्रत्य॑दृश्रन्पु॒रस्ता॒ज्ज्योति॒र्यच्छ॑न्तीरु॒षसो॑ विभा॒तीः ।
अजी॑जन॒न्त्सूर्यं॑ य॒ज्ञम॒ग्निम॑पा॒चीनं॒ तमो॑ अगा॒दजु॑ष्टम्
ace̍ti di̱vo du̍hi̱tā ma̱ghonī̱ viśve̍ paśyantyu̱ṣasa̍ṃ vibhā̱tīm |
āsthā̱dratha̍ṃ sva̱dhayā̍ yu̱jyamā̍na̱mā yamaśvā̍saḥ su̱yujo̱ vaha̍nti
||4||अचे॑ति दि॒वो दु॑हि॒ता म॒घोनी॒ विश्वे॑ पश्यन्त्यु॒षसं॑ विभा॒तीम् ।
आस्था॒द्रथं॑ स्व॒धया॑ यु॒ज्यमा॑न॒मा यमश्वा॑सः सु॒युजो॒ वह॑न्ति
prati̍ tvā̱dya su̱mana̍so budhantā̱'smākā̍so ma̱ghavā̍no va̱yaṃ ca̍ |
ti̱lvi̱lā̱yadhva̍muṣaso vibhā̱tīryū̱yaṃ pā̍ta sva̱stibhi̱: sadā̍ naḥ
||5||प्रति॑ त्वा॒द्य सु॒मन॑सो बुधन्ता॒ऽस्माका॑सो म॒घवा॑नो व॒यं च॑ ।
ति॒ल्वि॒ला॒यध्व॑मुषसो विभा॒तीर्यू॒यं पा॑त स्व॒स्तिभि॒: सदा॑ नः