Study
- Anukramaṇī
- Source
12 maitrāvaruṇirvasiṣṭha:| agni: | pragātha: (=viṣamā bṛhatī , samā satobṛhatī ) |
e̱nā vo̍ a̱gniṃ nama̍so̱rjo napā̍ta̱mā hu̍ve | pri̱yaṃ ceti̍ṣṭhamara̱tiṃ sva̍dhva̱raṃ viśva̍sya dū̱tama̱mṛta̍m
||1||ए॒ना वो॑ अ॒ग्निं नम॑सो॒र्जो नपा॑त॒मा हु॑वे । प्रि॒यं चेति॑ष्ठमर॒तिं स्व॑ध्व॒रं विश्व॑स्य दू॒तम॒मृत॑म्
sa yo̍jate aru̱ṣā vi̱śvabho̍jasā̱ sa du̍drava̱tsvā̍hutaḥ |
su̱brahmā̍ ya̱jñaḥ su̱śamī̱ vasū̍nāṃ de̱vaṃ rādho̱ janā̍nām
||2||स यो॑जते अरु॒षा वि॒श्वभो॑जसा॒ स दु॑द्रव॒त्स्वा॑हुतः ।
सु॒ब्रह्मा॑ य॒ज्ञः सु॒शमी॒ वसू॑नां दे॒वं राधो॒ जना॑नाम्
uda̍sya śo̱cira̍sthādā̱juhvā̍nasya mī̱l̤huṣa̍: |
uddhū̱māso̍ aru̱ṣāso̍ divi̱spṛśa̱: sama̱gnimi̍ndhate̱ nara̍:
||3||उद॑स्य शो॒चिर॑स्थादा॒जुह्वा॑नस्य मी॒ळ्हुष॑: ।
उद्धू॒मासो॑ अरु॒षासो॑ दिवि॒स्पृश॒: सम॒ग्निमि॑न्धते॒ नर॑:
taṃ tvā̍ dū̱taṃ kṛ̍ṇmahe ya̱śasta̍maṃ de̱vām̐ ā vī̱taye̍ vaha |
viśvā̍ sūno sahaso marta̱bhoja̍nā̱ rāsva̱ tadyattvema̍he
||4||तं त्वा॑ दू॒तं कृ॑ण्महे य॒शस्त॑मं दे॒वाँ आ वी॒तये॑ वह ।
विश्वा॑ सूनो सहसो मर्त॒भोज॑ना॒ रास्व॒ तद्यत्त्वेम॑हे
tvama̍gne gṛ̱hapa̍ti̱stvaṃ hotā̍ no adhva̱re | tvaṃ potā̍ viśvavāra̱ prace̍tā̱ yakṣi̱ veṣi̍ ca̱ vārya̍m
||5||त्वम॑ग्ने गृ॒हप॑ति॒स्त्वं होता॑ नो अध्व॒रे । त्वं पोता॑ विश्ववार॒ प्रचे॑ता॒ यक्षि॒ वेषि॑ च॒ वार्य॑म्
kṛ̱dhi ratna̱ṃ yaja̍mānāya sukrato̱ tvaṃ hi ra̍tna̱dhā asi̍ |
ā na̍ ṛ̱te śi̍śīhi̱ viśva̍mṛ̱tvija̍ṃ su̱śaṃso̱ yaśca̱ dakṣa̍te
||6||कृ॒धि रत्नं॒ यज॑मानाय सुक्रतो॒ त्वं हि र॑त्न॒धा असि॑ ।
आ न॑ ऋ॒ते शि॑शीहि॒ विश्व॑मृ॒त्विजं॑ सु॒शंसो॒ यश्च॒ दक्ष॑ते
tve a̍gne svāhuta pri̱yāsa̍: santu sū̱raya̍: | ya̱ntāro̱ ye ma̱ghavā̍no̱ janā̍nāmū̱rvāndaya̍nta̱ gonā̍m
||7||त्वे अ॑ग्ने स्वाहुत प्रि॒यास॑: सन्तु सू॒रय॑: । य॒न्तारो॒ ये म॒घवा॑नो॒ जना॑नामू॒र्वान्दय॑न्त॒ गोना॑म्
yeṣā̱mil̤ā̍ ghṛ̱taha̍stā duro̱ṇa ām̐ api̍ prā̱tā ni̱ṣīda̍ti |
tām̐strā̍yasva sahasya dru̱ho ni̱do yacchā̍ na̱: śarma̍ dīrgha̱śrut
||8||येषा॒मिळा॑ घृ॒तह॑स्ता दुरो॒ण आँ अपि॑ प्रा॒ता नि॒षीद॑ति ।
ताँस्त्रा॑यस्व सहस्य द्रु॒हो नि॒दो यच्छा॑ न॒: शर्म॑ दीर्घ॒श्रुत्
sa ma̱ndrayā̍ ca ji̱hvayā̱ vahni̍rā̱sā vi̱duṣṭa̍raḥ | agne̍ ra̱yiṃ ma̱ghava̍dbhyo na̱ ā va̍ha ha̱vyadā̍tiṃ ca sūdaya
||9||स म॒न्द्रया॑ च जि॒ह्वया॒ वह्नि॑रा॒सा वि॒दुष्ट॑रः । अग्ने॑ र॒यिं म॒घव॑द्भ्यो न॒ आ व॑ह ह॒व्यदा॑तिं च सूदय
ye rādhā̍ṃsi̱ dada̱tyaśvyā̍ ma̱ghā kāme̍na̱ śrava̍so ma̱haḥ | tām̐ aṃha̍saḥ pipṛhi pa̱rtṛbhi̱ṣṭvaṃ śa̱taṃ pū̱rbhirya̍viṣṭhya
||10||ये राधां॑सि॒ दद॒त्यश्व्या॑ म॒घा कामे॑न॒ श्रव॑सो म॒हः । ताँ अंह॑सः पिपृहि प॒र्तृभि॒ष्ट्वं श॒तं पू॒र्भिर्य॑विष्ठ्य
de̱vo vo̍ draviṇo̱dāḥ pū̱rṇāṃ vi̍vaṣṭyā̱sica̍m | udvā̍ si̱ñcadhva̱mupa̍ vā pṛṇadhva̱mādidvo̍ de̱va o̍hate
||11||दे॒वो वो॑ द्रविणो॒दाः पू॒र्णां वि॑वष्ट्या॒सिच॑म् । उद्वा॑ सि॒ञ्चध्व॒मुप॑ वा पृणध्व॒मादिद्वो॑ दे॒व ओ॑हते
taṃ hotā̍ramadhva̱rasya̱ prace̍tasa̱ṃ vahni̍ṃ de̱vā a̍kṛṇvata | dadhā̍ti̱ ratna̍ṃ vidha̱te su̱vīrya̍ma̱gnirjanā̍ya dā̱śuṣe̍
||12||तं होता॑रमध्व॒रस्य॒ प्रचे॑तसं॒ वह्निं॑ दे॒वा अ॑कृण्वत । दधा॑ति॒ रत्नं॑ विध॒ते सु॒वीर्य॑म॒ग्निर्जना॑य दा॒शुषे॑