Study
- Anukramaṇī
- Source
6 maitrāvaruṇirvasiṣṭha:| maruta:| triṣṭup |
pra sā̍ka̱mukṣe̍ arcatā ga̱ṇāya̱ yo daivya̍sya̱ dhāmna̱stuvi̍ṣmān |
u̱ta kṣo̍danti̱ roda̍sī mahi̱tvā nakṣa̍nte̱ nāka̱ṃ niṝ̍terava̱ṃśāt
||1||प्र सा॑क॒मुक्षे॑ अर्चता ग॒णाय॒ यो दैव्य॑स्य॒ धाम्न॒स्तुवि॑ष्मान् ।
उ॒त क्षो॑दन्ति॒ रोद॑सी महि॒त्वा नक्ष॑न्ते॒ नाकं॒ निॠ॑तेरवं॒शात्
ja̱nūści̍dvo marutastve̱ṣye̍ṇa̱ bhīmā̍sa̱stuvi̍manya̱vo'yā̍saḥ |
pra ye maho̍bhi̱roja̍so̱ta santi̱ viśvo̍ vo̱ yāma̍nbhayate sva̱rdṛk
||2||ज॒नूश्चि॑द्वो मरुतस्त्वे॒ष्ये॑ण॒ भीमा॑स॒स्तुवि॑मन्य॒वोऽया॑सः ।
प्र ये महो॑भि॒रोज॑सो॒त सन्ति॒ विश्वो॑ वो॒ याम॑न्भयते स्व॒र्दृक्
bṛ̱hadvayo̍ ma̱ghava̍dbhyo dadhāta̱ jujo̍ṣa̱nninma̱ruta̍: suṣṭu̱tiṃ na̍: |
ga̱to nādhvā̱ vi ti̍rāti ja̱ntuṃ pra ṇa̍: spā̱rhābhi̍rū̱tibhi̍stireta
||3||बृ॒हद्वयो॑ म॒घव॑द्भ्यो दधात॒ जुजो॑ष॒न्निन्म॒रुत॑: सुष्टु॒तिं न॑: ।
ग॒तो नाध्वा॒ वि ति॑राति ज॒न्तुं प्र ण॑: स्पा॒र्हाभि॑रू॒तिभि॑स्तिरेत
yu̱ṣmoto̱ vipro̍ marutaḥ śata̱svī yu̱ṣmoto̱ arvā̱ sahu̍riḥ saha̱srī |
yu̱ṣmota̍: sa̱mrāl̤u̱ta ha̍nti vṛ̱traṃ pra tadvo̍ astu dhūtayo de̱ṣṇam
||4||यु॒ष्मोतो॒ विप्रो॑ मरुतः शत॒स्वी यु॒ष्मोतो॒ अर्वा॒ सहु॑रिः सह॒स्री ।
यु॒ष्मोत॑: स॒म्राळु॒त ह॑न्ति वृ॒त्रं प्र तद्वो॑ अस्तु धूतयो दे॒ष्णम्
tām̐ ā ru̱drasya̍ mī̱l̤huṣo̍ vivāse ku̱vinnaṃsa̍nte ma̱ruta̱: puna̍rnaḥ |
yatsa̱svartā̍ jihīl̤i̱re yadā̱virava̱ tadena̍ īmahe tu̱rāṇā̍m
||5||ताँ आ रु॒द्रस्य॑ मी॒ळ्हुषो॑ विवासे कु॒विन्नंस॑न्ते म॒रुत॒: पुन॑र्नः ।
यत्स॒स्वर्ता॑ जिहीळि॒रे यदा॒विरव॒ तदेन॑ ईमहे तु॒राणा॑म्
pra sā vā̍ci suṣṭu̱tirma̱ghonā̍mi̱daṃ sū̱ktaṃ ma̱ruto̍ juṣanta |
ā̱rācci̱ddveṣo̍ vṛṣaṇo yuyota yū̱yaṃ pā̍ta sva̱stibhi̱: sadā̍ naḥ
||6||प्र सा वा॑चि सुष्टु॒तिर्म॒घोना॑मि॒दं सू॒क्तं म॒रुतो॑ जुषन्त ।
आ॒राच्चि॒द्द्वेषो॑ वृषणो युयोत यू॒यं पा॑त स्व॒स्तिभि॒: सदा॑ नः