Study
- Anukramaṇī
- Source
7 maitrāvaruṇirvasiṣṭha:| indra:, 7 indrābṛhaspatī | triṣṭup |
adhva̍ryavo'ru̱ṇaṃ du̱gdhama̱ṃśuṃ ju̱hota̍na vṛṣa̱bhāya̍ kṣitī̱nām |
gau̱rādvedī̍yām̐ ava̱pāna̱mindro̍ vi̱śvāhedyā̍ti su̱taso̍mami̱cchan
||1||अध्व॑र्यवोऽरु॒णं दु॒ग्धमं॒शुं जु॒होत॑न वृष॒भाय॑ क्षिती॒नाम् ।
गौ॒राद्वेदी॑याँ अव॒पान॒मिन्द्रो॑ वि॒श्वाहेद्या॑ति सु॒तसो॑ममि॒च्छन्
yadda̍dhi̱ṣe pra̱divi̱ cārvanna̍ṃ di̱vedi̍ve pī̱timida̍sya vakṣi |
u̱ta hṛ̱dota mana̍sā juṣā̱ṇa u̱śanni̍ndra̱ prasthi̍tānpāhi̱ somā̍n
||2||यद्द॑धि॒षे प्र॒दिवि॒ चार्वन्नं॑ दि॒वेदि॑वे पी॒तिमिद॑स्य वक्षि ।
उ॒त हृ॒दोत मन॑सा जुषा॒ण उ॒शन्नि॑न्द्र॒ प्रस्थि॑तान्पाहि॒ सोमा॑न्
ja̱jñā̱naḥ soma̱ṃ saha̍se papātha̱ pra te̍ mā̱tā ma̍hi̱māna̍muvāca |
endra̍ paprātho̱rva1ntari̍kṣaṃ yu̱dhā de̱vebhyo̱ vari̍vaścakartha
||3||ज॒ज्ञा॒नः सोमं॒ सह॑से पपाथ॒ प्र ते॑ मा॒ता म॑हि॒मान॑मुवाच ।
एन्द्र॑ पप्राथो॒र्व१न्तरि॑क्षं यु॒धा दे॒वेभ्यो॒ वरि॑वश्चकर्थ
yadyo̱dhayā̍ maha̱to manya̍mānā̱ntsākṣā̍ma̱ tānbā̱hubhi̱: śāśa̍dānān |
yadvā̱ nṛbhi̱rvṛta̍ indrābhi̱yudhyā̱staṃ tvayā̱jiṃ sau̍śrava̱saṃ ja̍yema
||4||यद्यो॒धया॑ मह॒तो मन्य॑माना॒न्त्साक्षा॑म॒ तान्बा॒हुभि॒: शाश॑दानान् ।
यद्वा॒ नृभि॒र्वृत॑ इन्द्राभि॒युध्या॒स्तं त्वया॒जिं सौ॑श्रव॒सं ज॑येम
prendra̍sya vocaṃ pratha̱mā kṛ̱tāni̱ pra nūta̍nā ma̱ghavā̱ yā ca̱kāra̍ |
ya̱dedade̍vī̱rasa̍hiṣṭa mā̱yā athā̍bhava̱tkeva̍la̱: somo̍ asya
||5||प्रेन्द्र॑स्य वोचं प्रथ॒मा कृ॒तानि॒ प्र नूत॑ना म॒घवा॒ या च॒कार॑ ।
य॒देददे॑वी॒रस॑हिष्ट मा॒या अथा॑भव॒त्केव॑ल॒: सोमो॑ अस्य
tave̱daṃ viśva̍ma̱bhita̍: paśa̱vyaṃ1 yatpaśya̍si̱ cakṣa̍sā̱ sūrya̍sya |
gavā̍masi̱ gopa̍ti̱reka̍ indra bhakṣī̱mahi̍ te̱ praya̍tasya̱ vasva̍:
||6||तवे॒दं विश्व॑म॒भित॑: पश॒व्यं१ यत्पश्य॑सि॒ चक्ष॑सा॒ सूर्य॑स्य ।
गवा॑मसि॒ गोप॑ति॒रेक॑ इन्द्र भक्षी॒महि॑ ते॒ प्रय॑तस्य॒ वस्व॑:
bṛha̍spate yu̱vamindra̍śca̱ vasvo̍ di̱vyasye̍śāthe u̱ta pārthi̍vasya |
dha̱ttaṃ ra̱yiṃ stu̍va̱te kī̱raye̍ cidyū̱yaṃ pā̍ta sva̱stibhi̱: sadā̍ naḥ
||7||बृह॑स्पते यु॒वमिन्द्र॑श्च॒ वस्वो॑ दि॒व्यस्ये॑शाथे उ॒त पार्थि॑वस्य ।
ध॒त्तं र॒यिं स्तु॑व॒ते की॒रये॑ चिद्यू॒यं पा॑त स्व॒स्तिभि॒: सदा॑ नः