Study
- Anukramaṇī
- Source
6 maitrāvaruṇirvasiṣṭha:| aśvinau | triṣṭup |
apa̱ svasu̍ru̱ṣaso̱ nagji̍hīte ri̱ṇakti̍ kṛ̱ṣṇīra̍ru̱ṣāya̱ panthā̍m |
aśvā̍maghā̱ goma̍ghā vāṃ huvema̱ divā̱ nakta̱ṃ śaru̍ma̱smadyu̍yotam
||1||अप॒ स्वसु॑रु॒षसो॒ नग्जि॑हीते रि॒णक्ति॑ कृ॒ष्णीर॑रु॒षाय॒ पन्था॑म् ।
अश्वा॑मघा॒ गोम॑घा वां हुवेम॒ दिवा॒ नक्तं॒ शरु॑म॒स्मद्यु॑योतम्
u̱pāyā̍taṃ dā̱śuṣe̱ martyā̍ya̱ rathe̍na vā̱mama̍śvinā̱ vaha̍ntā |
yu̱yu̱tama̱smadani̍rā̱mamī̍vā̱ṃ divā̱ nakta̍ṃ mādhvī̱ trāsī̍thāṃ naḥ
||2||उ॒पाया॑तं दा॒शुषे॒ मर्त्या॑य॒ रथे॑न वा॒मम॑श्विना॒ वह॑न्ता ।
यु॒यु॒तम॒स्मदनि॑रा॒ममी॑वां॒ दिवा॒ नक्तं॑ माध्वी॒ त्रासी॑थां नः
ā vā̱ṃ ratha̍mava̱masyā̱ṃ vyu̍ṣṭau sumnā̱yavo̱ vṛṣa̍ṇo vartayantu |
syūma̍gabhastimṛta̱yugbhi̱raśvai̱rāśvi̍nā̱ vasu̍mantaṃ vahethām
||3||आ वां॒ रथ॑मव॒मस्यां॒ व्यु॑ष्टौ सुम्ना॒यवो॒ वृष॑णो वर्तयन्तु ।
स्यूम॑गभस्तिमृत॒युग्भि॒रश्वै॒राश्वि॑ना॒ वसु॑मन्तं वहेथाम्
yo vā̱ṃ ratho̍ nṛpatī̱ asti̍ vo̱l̤hā tri̍vandhu̱ro vasu̍mām̐ u̱srayā̍mā |
ā na̍ e̱nā nā̍sa̱tyopa̍ yātama̱bhi yadvā̍ṃ vi̱śvapsnyo̱ jigā̍ti
||4||यो वां॒ रथो॑ नृपती॒ अस्ति॑ वो॒ळ्हा त्रि॑वन्धु॒रो वसु॑माँ उ॒स्रया॑मा ।
आ न॑ ए॒ना ना॑स॒त्योप॑ यातम॒भि यद्वां॑ वि॒श्वप्स्न्यो॒ जिगा॑ति
yu̱vaṃ cyavā̍naṃ ja̱raso̍'mumukta̱ṃ ni pe̱dava̍ ūhathurā̱śumaśva̍m |
niraṃha̍sa̱stama̍saḥ sparta̱matri̱ṃ ni jā̍hu̱ṣaṃ śi̍thi̱re dhā̍tama̱ntaḥ
||5||यु॒वं च्यवा॑नं ज॒रसो॑ऽमुमुक्तं॒ नि पे॒दव॑ ऊहथुरा॒शुमश्व॑म् ।
निरंह॑स॒स्तम॑सः स्पर्त॒मत्रिं॒ नि जा॑हु॒षं शि॑थि॒रे धा॑तम॒न्तः
i̱yaṃ ma̍nī̱ṣā i̱yama̍śvinā̱ gīri̱māṃ su̍vṛ̱ktiṃ vṛ̍ṣaṇā juṣethām |
i̱mā brahmā̍ṇi yuva̱yūnya̍gmanyū̱yaṃ pā̍ta sva̱stibhi̱: sadā̍ naḥ
||6||इ॒यं म॑नी॒षा इ॒यम॑श्विना॒ गीरि॒मां सु॑वृ॒क्तिं वृ॑षणा जुषेथाम् ।
इ॒मा ब्रह्मा॑णि युव॒यून्य॑ग्मन्यू॒यं पा॑त स्व॒स्तिभि॒: सदा॑ नः