Study
- Anukramaṇī
- Source
5 maitrāvaruṇirvasiṣṭha:| aśvinau | triṣṭup |
atā̍riṣma̱ tama̍saspā̱rama̱sya prati̱ stoma̍ṃ deva̱yanto̱ dadhā̍nāḥ |
pu̱ru̱daṃsā̍ puru̱tamā̍ purā̱jā'ma̍rtyā havate a̱śvinā̱ gīḥ
||1||अता॑रिष्म॒ तम॑सस्पा॒रम॒स्य प्रति॒ स्तोमं॑ देव॒यन्तो॒ दधा॑नाः ।
पु॒रु॒दंसा॑ पुरु॒तमा॑ पुरा॒जाऽम॑र्त्या हवते अ॒श्विना॒ गीः
nyu̍ pri̱yo manu̍ṣaḥ sādi̱ hotā̱ nāsa̍tyā̱ yo yaja̍te̱ vanda̍te ca |
a̱śnī̱taṃ madhvo̍ aśvinā upā̱ka ā vā̍ṃ voce vi̱dathe̍ṣu̱ praya̍svān
||2||न्यु॑ प्रि॒यो मनु॑षः सादि॒ होता॒ नास॑त्या॒ यो यज॑ते॒ वन्द॑ते च ।
अ॒श्नी॒तं मध्वो॑ अश्विना उपा॒क आ वां॑ वोचे वि॒दथे॑षु॒ प्रय॑स्वान्
ahe̍ma ya̱jñaṃ pa̱thāmu̍rā̱ṇā i̱māṃ su̍vṛ̱ktiṃ vṛ̍ṣaṇā juṣethām |
śru̱ṣṭī̱veva̱ preṣi̍to vāmabodhi̱ prati̱ stomai̱rjara̍māṇo̱ vasi̍ṣṭhaḥ
||3||अहे॑म य॒ज्ञं प॒थामु॑रा॒णा इ॒मां सु॑वृ॒क्तिं वृ॑षणा जुषेथाम् ।
श्रु॒ष्टी॒वेव॒ प्रेषि॑तो वामबोधि॒ प्रति॒ स्तोमै॒र्जर॑माणो॒ वसि॑ष्ठः
upa̱ tyā vahnī̍ gamato̱ viśa̍ṃ no rakṣo̱haṇā̱ sambhṛ̍tā vī̱l̤upā̍ṇī |
samandhā̍ṃsyagmata matsa̱rāṇi̱ mā no̍ mardhiṣṭa̱mā ga̍taṃ śi̱vena̍
||4||उप॒ त्या वह्नी॑ गमतो॒ विशं॑ नो रक्षो॒हणा॒ सम्भृ॑ता वी॒ळुपा॑णी ।
समन्धां॑स्यग्मत मत्स॒राणि॒ मा नो॑ मर्धिष्ट॒मा ग॑तं शि॒वेन॑
ā pa̱ścātā̍nnāsa̱tyā pu̱rastā̱dāśvi̍nā yātamadha̱rāduda̍ktāt |
ā vi̱śvata̱: pāñca̍janyena rā̱yā yū̱yaṃ pā̍ta sva̱stibhi̱: sadā̍ naḥ
||5||आ प॒श्चाता॑न्नास॒त्या पु॒रस्ता॒दाश्वि॑ना यातमध॒रादुद॑क्तात् ।
आ वि॒श्वत॒: पाञ्च॑जन्येन रा॒या यू॒यं पा॑त स्व॒स्तिभि॒: सदा॑ नः