Study
- Anukramaṇī
- Source
5 maitrāvaruṇirvasiṣṭha:| indrāvaruṇau | triṣṭup |
ā vā̍ṃ rājānāvadhva̱re va̍vṛtyāṃ ha̱vyebhi̍rindrāvaruṇā̱ namo̍bhiḥ |
pra vā̍ṃ ghṛ̱tācī̍ bā̱hvordadhā̍nā̱ pari̱ tmanā̱ viṣu̍rūpā jigāti
||1||आ वां॑ राजानावध्व॒रे व॑वृत्यां ह॒व्येभि॑रिन्द्रावरुणा॒ नमो॑भिः ।
प्र वां॑ घृ॒ताची॑ बा॒ह्वोर्दधा॑ना॒ परि॒ त्मना॒ विषु॑रूपा जिगाति
yu̱vo rā̱ṣṭraṃ bṛ̱hadi̍nvati̱ dyauryau se̱tṛbhi̍rara̱jjubhi̍: sinī̱thaḥ |
pari̍ no̱ hel̤o̱ varu̍ṇasya vṛjyā u̱ruṃ na̱ indra̍: kṛṇavadu lo̱kam
||2||यु॒वो रा॒ष्ट्रं बृ॒हदि॑न्वति॒ द्यौर्यौ से॒तृभि॑रर॒ज्जुभि॑: सिनी॒थः ।
परि॑ नो॒ हेळो॒ वरु॑णस्य वृज्या उ॒रुं न॒ इन्द्र॑: कृणवदु लो॒कम्
kṛ̱taṃ no̍ ya̱jñaṃ vi̱dathe̍ṣu̱ cāru̍ṃ kṛ̱taṃ brahmā̍ṇi sū̱riṣu̍ praśa̱stā |
upo̍ ra̱yirde̱vajū̍to na etu̱ pra ṇa̍: spā̱rhābhi̍rū̱tibhi̍stiretam
||3||कृ॒तं नो॑ य॒ज्ञं वि॒दथे॑षु॒ चारुं॑ कृ॒तं ब्रह्मा॑णि सू॒रिषु॑ प्रश॒स्ता ।
उपो॑ र॒यिर्दे॒वजू॑तो न एतु॒ प्र ण॑: स्पा॒र्हाभि॑रू॒तिभि॑स्तिरेतम्
a̱sme i̍ndrāvaruṇā vi̱śvavā̍raṃ ra̱yiṃ dha̍tta̱ṃ vasu̍mantaṃ puru̱kṣum |
pra ya ā̍di̱tyo anṛ̍tā mi̱nātyami̍tā̱ śūro̍ dayate̱ vasū̍ni
||4||अ॒स्मे इ॑न्द्रावरुणा वि॒श्ववा॑रं र॒यिं ध॑त्तं॒ वसु॑मन्तं पुरु॒क्षुम् ।
प्र य आ॑दि॒त्यो अनृ॑ता मि॒नात्यमि॑ता॒ शूरो॑ दयते॒ वसू॑नि
i̱yamindra̱ṃ varu̍ṇamaṣṭa me̱ gīḥ prāva̍tto̱ke tana̍ye̱ tūtu̍jānā |
su̱ratnā̍so de̱vavī̍tiṃ gamema yū̱yaṃ pā̍ta sva̱stibhi̱: sadā̍ naḥ
||5||इ॒यमिन्द्रं॒ वरु॑णमष्ट मे॒ गीः प्राव॑त्तो॒के तन॑ये॒ तूतु॑जाना ।
सु॒रत्ना॑सो दे॒ववी॑तिं गमेम यू॒यं पा॑त स्व॒स्तिभि॒: सदा॑ नः