Study
- Anukramaṇī
- Source
10 maitrāvaruṇirvasiṣṭha:| indrāvaruṇau |jagatī |
indrā̍varuṇā yu̱vama̍dhva̱rāya̍ no vi̱śe janā̍ya̱ mahi̱ śarma̍ yacchatam |
dī̱rghapra̍yajyu̱mati̱ yo va̍nu̱ṣyati̍ va̱yaṃ ja̍yema̱ pṛta̍nāsu dū̱ḍhya̍:
||1||इन्द्रा॑वरुणा यु॒वम॑ध्व॒राय॑ नो वि॒शे जना॑य॒ महि॒ शर्म॑ यच्छतम् ।
दी॒र्घप्र॑यज्यु॒मति॒ यो व॑नु॒ष्यति॑ व॒यं ज॑येम॒ पृत॑नासु दू॒ढ्य॑:
sa̱mrāl̤a̱nyaḥ sva̱rāl̤a̱nya u̍cyate vāṃ ma̱hāntā̱vindrā̱varu̍ṇā ma̱hāva̍sū |
viśve̍ de̱vāsa̍: para̱me vyo̍mani̱ saṃ vā̱mojo̍ vṛṣaṇā̱ saṃ bala̍ṃ dadhuḥ
||2||स॒म्राळ॒न्यः स्व॒राळ॒न्य उ॑च्यते वां म॒हान्ता॒विन्द्रा॒वरु॑णा म॒हाव॑सू ।
विश्वे॑ दे॒वास॑: पर॒मे व्यो॑मनि॒ सं वा॒मोजो॑ वृषणा॒ सं बलं॑ दधुः
anva̱pāṃ khānya̍tṛnta̱moja̱sā sūrya̍mairayataṃ di̱vi pra̱bhum |
indrā̍varuṇā̱ made̍ asya mā̱yino'pi̍nvatama̱pita̱: pinva̍ta̱ṃ dhiya̍:
||3||अन्व॒पां खान्य॑तृन्त॒मोज॒सा सूर्य॑मैरयतं दि॒वि प्र॒भुम् ।
इन्द्रा॑वरुणा॒ मदे॑ अस्य मा॒यिनोऽपि॑न्वतम॒पित॒: पिन्व॑तं॒ धिय॑:
yu̱vāmidyu̱tsu pṛta̍nāsu̱ vahna̍yo yu̱vāṃ kṣema̍sya prasa̱ve mi̱tajña̍vaḥ |
ī̱śā̱nā vasva̍ u̱bhaya̍sya kā̱rava̱ indrā̍varuṇā su̱havā̍ havāmahe
||4||यु॒वामिद्यु॒त्सु पृत॑नासु॒ वह्न॑यो यु॒वां क्षेम॑स्य प्रस॒वे मि॒तज्ञ॑वः ।
ई॒शा॒ना वस्व॑ उ॒भय॑स्य का॒रव॒ इन्द्रा॑वरुणा सु॒हवा॑ हवामहे
indrā̍varuṇā̱ yadi̱māni̍ ca̱krathu̱rviśvā̍ jā̱tāni̱ bhuva̍nasya ma̱jmanā̍ |
kṣeme̍ṇa mi̱tro varu̍ṇaṃ duva̱syati̍ ma̱rudbhi̍ru̱graḥ śubha̍ma̱nya ī̍yate
||5||इन्द्रा॑वरुणा॒ यदि॒मानि॑ च॒क्रथु॒र्विश्वा॑ जा॒तानि॒ भुव॑नस्य म॒ज्मना॑ ।
क्षेमे॑ण मि॒त्रो वरु॑णं दुव॒स्यति॑ म॒रुद्भि॑रु॒ग्रः शुभ॑म॒न्य ई॑यते
ma̱he śu̱lkāya̱ varu̍ṇasya̱ nu tvi̱ṣa ojo̍ mimāte dhru̱vama̍sya̱ yatsvam |
ajā̍mima̱nyaḥ śna̱thaya̍nta̱māti̍radda̱bhrebhi̍ra̱nyaḥ pra vṛ̍ṇoti̱ bhūya̍saḥ
||6||म॒हे शु॒ल्काय॒ वरु॑णस्य॒ नु त्वि॒ष ओजो॑ मिमाते ध्रु॒वम॑स्य॒ यत्स्वम् ।
अजा॑मिम॒न्यः श्न॒थय॑न्त॒माति॑रद्द॒भ्रेभि॑र॒न्यः प्र वृ॑णोति॒ भूय॑सः
na tamaṃho̱ na du̍ri̱tāni̱ martya̱mindrā̍varuṇā̱ na tapa̱: kuta̍śca̱na |
yasya̍ devā̱ gaccha̍tho vī̱tho a̍dhva̱raṃ na taṃ marta̍sya naśate̱ pari̍hvṛtiḥ
||7||न तमंहो॒ न दु॑रि॒तानि॒ मर्त्य॒मिन्द्रा॑वरुणा॒ न तप॒: कुत॑श्च॒न ।
यस्य॑ देवा॒ गच्छ॑थो वी॒थो अ॑ध्व॒रं न तं मर्त॑स्य नशते॒ परि॑ह्वृतिः
a̱rvāṅna̍rā̱ daivye̱nāva̱sā ga̍taṃ śṛṇu̱taṃ hava̱ṃ yadi̍ me̱ jujo̍ṣathaḥ |
yu̱vorhi sa̱khyamu̱ta vā̱ yadāpya̍ṃ mārḍī̱kami̍ndrāvaruṇā̱ ni ya̍cchatam
||8||अ॒र्वाङ्न॑रा॒ दैव्ये॒नाव॒सा ग॑तं शृणु॒तं हवं॒ यदि॑ मे॒ जुजो॑षथः ।
यु॒वोर्हि स॒ख्यमु॒त वा॒ यदाप्यं॑ मार्डी॒कमि॑न्द्रावरुणा॒ नि य॑च्छतम्
a̱smāka̍mindrāvaruṇā̱ bhare̍bhare puroyo̱dhā bha̍vataṃ kṛṣṭyojasā |
yadvā̱ṃ hava̍nta u̱bhaye̱ adha̍ spṛ̱dhi nara̍sto̱kasya̱ tana̍yasya sā̱tiṣu̍
||9||अ॒स्माक॑मिन्द्रावरुणा॒ भरे॑भरे पुरोयो॒धा भ॑वतं कृष्ट्योजसा ।
यद्वां॒ हव॑न्त उ॒भये॒ अध॑ स्पृ॒धि नर॑स्तो॒कस्य॒ तन॑यस्य सा॒तिषु॑
a̱sme indro̱ varu̍ṇo mi̱tro a̍rya̱mā dyu̱mnaṃ ya̍cchantu̱ mahi̱ śarma̍ sa̱pratha̍: |
a̱va̱dhraṃ jyoti̱radi̍teṝtā̱vṛdho̍ de̱vasya̱ śloka̍ṃ savi̱turma̍nāmahe
||10||अ॒स्मे इन्द्रो॒ वरु॑णो मि॒त्रो अ॑र्य॒मा द्यु॒म्नं य॑च्छन्तु॒ महि॒ शर्म॑ स॒प्रथ॑: ।
अ॒व॒ध्रं ज्योति॒रदि॑तेॠता॒वृधो॑ दे॒वस्य॒ श्लोकं॑ सवि॒तुर्म॑नामहे