Study
- Anukramaṇī
- Source
6 maitrāvaruṇirvasiṣṭha:| indra: | triṣṭup |
ā te̍ ma̱ha i̍ndro̱tyu̍gra̱ sama̍nyavo̱ yatsa̱mara̍nta̱ senā̍: |
patā̍ti di̱dyunnarya̍sya bā̱hvormā te̱ mano̍ viṣva̱drya1gvi cā̍rīt
||1||आ ते॑ म॒ह इ॑न्द्रो॒त्यु॑ग्र॒ सम॑न्यवो॒ यत्स॒मर॑न्त॒ सेना॑: ।
पता॑ति दि॒द्युन्नर्य॑स्य बा॒ह्वोर्मा ते॒ मनो॑ विष्व॒द्र्य१ग्वि चा॑रीत्
ni du̱rga i̍ndra śnathihya̱mitrā̍na̱bhi ye no̱ martā̍so a̱manti̍ |
ā̱re taṃ śaṃsa̍ṃ kṛṇuhi nini̱tsorā no̍ bhara sa̱ṃbhara̍ṇa̱ṃ vasū̍nām
||2||नि दु॒र्ग इ॑न्द्र श्नथिह्य॒मित्रा॑न॒भि ये नो॒ मर्ता॑सो अ॒मन्ति॑ ।
आ॒रे तं शंसं॑ कृणुहि निनि॒त्सोरा नो॑ भर सं॒भर॑णं॒ वसू॑नाम्
śa̱taṃ te̍ śiprinnū̱taya̍: su̱dāse̍ sa̱hasra̱ṃ śaṃsā̍ u̱ta rā̱tira̍stu |
ja̱hi vadha̍rva̱nuṣo̱ martya̍syā̱'sme dyu̱mnamadhi̱ ratna̍ṃ ca dhehi
||3||श॒तं ते॑ शिप्रिन्नू॒तय॑: सु॒दासे॑ स॒हस्रं॒ शंसा॑ उ॒त रा॒तिर॑स्तु ।
ज॒हि वध॑र्व॒नुषो॒ मर्त्य॑स्या॒ऽस्मे द्यु॒म्नमधि॒ रत्नं॑ च धेहि
tvāva̍to̱ hī̍ndra̱ kratve̱ asmi̱ tvāva̍to'vi̱tuḥ śū̍ra rā̱tau |
viśvedahā̍ni taviṣīva ugra̱m̐ oka̍: kṛṇuṣva harivo̱ na ma̍rdhīḥ
||4||त्वाव॑तो॒ ही॑न्द्र॒ क्रत्वे॒ अस्मि॒ त्वाव॑तोऽवि॒तुः शू॑र रा॒तौ ।
विश्वेदहा॑नि तविषीव उग्रँ॒ ओक॑: कृणुष्व हरिवो॒ न म॑र्धीः
kutsā̍ e̱te harya̍śvāya śū̱ṣamindre̱ saho̍ de̱vajū̍tamiyā̱nāḥ |
sa̱trā kṛ̍dhi su̱hanā̍ śūra vṛ̱trā va̱yaṃ taru̍trāḥ sanuyāma̱ vāja̍m
||5||कुत्सा॑ ए॒ते हर्य॑श्वाय शू॒षमिन्द्रे॒ सहो॑ दे॒वजू॑तमिया॒नाः ।
स॒त्रा कृ॑धि सु॒हना॑ शूर वृ॒त्रा व॒यं तरु॑त्राः सनुयाम॒ वाज॑म्
e̱vā na̍ indra̱ vārya̍sya pūrdhi̱ pra te̍ ma̱hīṃ su̍ma̱tiṃ ve̍vidāma |
iṣa̍ṃ pinva ma̱ghava̍dbhyaḥ su̱vīrā̍ṃ yū̱yaṃ pā̍ta sva̱stibhi̱: sadā̍ naḥ
||6||ए॒वा न॑ इन्द्र॒ वार्य॑स्य पूर्धि॒ प्र ते॑ म॒हीं सु॑म॒तिं वे॑विदाम ।
इषं॑ पिन्व म॒घव॑द्भ्यः सु॒वीरां॑ यू॒यं पा॑त स्व॒स्तिभि॒: सदा॑ नः