Study
- Anukramaṇī
- Source
19 maitrāvaruṇirvasiṣṭha:| mitrāvaruṇau, 4-13 ādityā:, 14-16 sūrya: |gāyatrī,10-15 pragātha: = (samā bṛhatī, viṣamā satobṛhatī ), 16 pura uṣṇik |
pra mi̱trayo̱rvaru̍ṇayo̱: stomo̍ na etu śū̱ṣya̍: | nama̍svāntuvijā̱tayo̍:
||1||प्र मि॒त्रयो॒र्वरु॑णयो॒: स्तोमो॑ न एतु शू॒ष्य॑: । नम॑स्वान्तुविजा॒तयो॑:
yā dhā̱raya̍nta de̱vāḥ su̱dakṣā̱ dakṣa̍pitarā | a̱su̱ryā̍ya̱ prama̍hasā
||2||या धा॒रय॑न्त दे॒वाः सु॒दक्षा॒ दक्ष॑पितरा । अ॒सु॒र्या॑य॒ प्रम॑हसा
tā na̍: sti̱pā ta̍nū̱pā varu̍ṇa jaritṝ̱ṇām | mitra̍ sā̱dhaya̍ta̱ṃ dhiya̍:
||3||ता न॑: स्ति॒पा त॑नू॒पा वरु॑ण जरितॄ॒णाम् । मित्र॑ सा॒धय॑तं॒ धिय॑:
yada̱dya sūra̱ udi̱te'nā̍gā mi̱tro a̍rya̱mā | su̱vāti̍ savi̱tā bhaga̍:
||4||यद॒द्य सूर॒ उदि॒तेऽना॑गा मि॒त्रो अ॑र्य॒मा । सु॒वाति॑ सवि॒ता भग॑:
su̱prā̱vīra̍stu̱ sa kṣaya̱: pra nu yāma̍ntsudānavaḥ | ye no̱ aṃho̍'ti̱pipra̍ti
||5||सु॒प्रा॒वीर॑स्तु॒ स क्षय॒: प्र नु याम॑न्त्सुदानवः । ये नो॒ अंहो॑ऽति॒पिप्र॑ति
u̱ta sva̱rājo̱ adi̍ti̱rada̍bdhasya vra̱tasya̱ ye | ma̱ho rājā̍na īśate
||6||उ॒त स्व॒राजो॒ अदि॑ति॒रद॑ब्धस्य व्र॒तस्य॒ ये । म॒हो राजा॑न ईशते
prati̍ vā̱ṃ sūra̱ udi̍te mi̱traṃ gṛ̍ṇīṣe̱ varu̍ṇam | a̱rya̱maṇa̍ṃ ri̱śāda̍sam
||7||प्रति॑ वां॒ सूर॒ उदि॑ते मि॒त्रं गृ॑णीषे॒ वरु॑णम् । अ॒र्य॒मणं॑ रि॒शाद॑सम्
rā̱yā hi̍raṇya̱yā ma̱tiri̱yama̍vṛ̱kāya̱ śava̍se | i̱yaṃ viprā̍ me̱dhasā̍taye
||8||रा॒या हि॑रण्य॒या म॒तिरि॒यम॑वृ॒काय॒ शव॑से । इ॒यं विप्रा॑ मे॒धसा॑तये
te syā̍ma deva varuṇa̱ te mi̍tra sū̱ribhi̍: sa̱ha | iṣa̱ṃ sva̍śca dhīmahi
||9||ते स्या॑म देव वरुण॒ ते मि॑त्र सू॒रिभि॑: स॒ह । इषं॒ स्व॑श्च धीमहि
ba̱hava̱: sūra̍cakṣaso'gniji̱hvā ṛ̍tā̱vṛdha̍: | trīṇi̱ ye ye̱murvi̱dathā̍ni dhī̱tibhi̱rviśvā̍ni̱ pari̍bhūtibhiḥ
||10||ब॒हव॒: सूर॑चक्षसोऽग्निजि॒ह्वा ऋ॑ता॒वृध॑: । त्रीणि॒ ये ये॒मुर्वि॒दथा॑नि धी॒तिभि॒र्विश्वा॑नि॒ परि॑भूतिभिः
vi ye da̱dhuḥ śa̱rada̱ṃ māsa̱mādaha̍rya̱jñama̱ktuṃ cādṛca̍m |
a̱nā̱pyaṃ varu̍ṇo mi̱tro a̍rya̱mā kṣa̱traṃ rājā̍na āśata
||11||वि ये द॒धुः श॒रदं॒ मास॒मादह॑र्य॒ज्ञम॒क्तुं चादृच॑म् ।
अ॒ना॒प्यं वरु॑णो मि॒त्रो अ॑र्य॒मा क्ष॒त्रं राजा॑न आशत
tadvo̍ a̱dya ma̍nāmahe sū̱ktaiḥ sūra̱ udi̍te | yadoha̍te̱ varu̍ṇo mi̱tro a̍rya̱mā yū̱yamṛ̱tasya̍ rathyaḥ
||12||तद्वो॑ अ॒द्य म॑नामहे सू॒क्तैः सूर॒ उदि॑ते । यदोह॑ते॒ वरु॑णो मि॒त्रो अ॑र्य॒मा यू॒यमृ॒तस्य॑ रथ्यः
ṛ̱tāvā̍na ṛ̱tajā̍tā ṛtā̱vṛdho̍ gho̱rāso̍ anṛta̱dviṣa̍: |
teṣā̍ṃ vaḥ su̱mne su̍ccha̱rdiṣṭa̍me nara̱: syāma̱ ye ca̍ sū̱raya̍:
||13||ऋ॒तावा॑न ऋ॒तजा॑ता ऋता॒वृधो॑ घो॒रासो॑ अनृत॒द्विष॑: ।
तेषां॑ वः सु॒म्ने सु॑च्छ॒र्दिष्ट॑मे नर॒: स्याम॒ ये च॑ सू॒रय॑:
udu̱ tyadda̍rśa̱taṃ vapu̍rdi̱va e̍ti pratihva̱re | yadī̍mā̱śurvaha̍ti de̱va eta̍śo̱ viśva̍smai̱ cakṣa̍se̱ ara̍m
||14||उदु॒ त्यद्द॑र्श॒तं वपु॑र्दि॒व ए॑ति प्रतिह्व॒रे । यदी॑मा॒शुर्वह॑ति दे॒व एत॑शो॒ विश्व॑स्मै॒ चक्ष॑से॒ अर॑म्
śī̱rṣṇaḥśī̍rṣṇo̱ jaga̍tasta̱sthuṣa̱spati̍ṃ sa̱mayā̱ viśva̱mā raja̍: |
sa̱pta svasā̍raḥ suvi̱tāya̱ sūrya̱ṃ vaha̍nti ha̱rito̱ rathe̍
||15||शी॒र्ष्णःशी॑र्ष्णो॒ जग॑तस्त॒स्थुष॒स्पतिं॑ स॒मया॒ विश्व॒मा रज॑: ।
स॒प्त स्वसा॑रः सुवि॒ताय॒ सूर्यं॒ वह॑न्ति ह॒रितो॒ रथे॑
taccakṣu̍rde̱vahi̍taṃ śu̱kramu̱ccara̍t | paśye̍ma śa̱rada̍: śa̱taṃ jīve̍ma śa̱rada̍: śa̱tam
||16||तच्चक्षु॑र्दे॒वहि॑तं शु॒क्रमु॒च्चर॑त् । पश्ये॑म श॒रद॑: श॒तं जीवे॑म श॒रद॑: श॒तम्
kāvye̍bhiradā̱bhyā ''yā̍taṃ varuṇa dyu̱mat | mi̱traśca̱ soma̍pītaye
||17||काव्ये॑भिरदा॒भ्या ऽऽया॑तं वरुण द्यु॒मत् । मि॒त्रश्च॒ सोम॑पीतये
di̱vo dhāma̍bhirvaruṇa mi̱traścā yā̍tama̱druhā̍ | piba̍ta̱ṃ soma̍mātu̱jī
||18||दि॒वो धाम॑भिर्वरुण मि॒त्रश्चा या॑तम॒द्रुहा॑ । पिब॑तं॒ सोम॑मातु॒जी
ā yā̍taṃ mitrāvaruṇā juṣā̱ṇāvāhu̍tiṃ narā | pā̱taṃ soma̍mṛtāvṛdhā
||19||आ या॑तं मित्रावरुणा जुषा॒णावाहु॑तिं नरा । पा॒तं सोम॑मृतावृधा